Yelemiya 30 - Luganuzi Luswanu Kuli Wanhu Wose 2002

U wihuwizo wo Mulungu, kuli wanhu wakwe

¹ U Muwaha Mulungu, u Mulungu wa Isilayeli

² yakanonjela yakatya, “Yelemiya! Alu wuzandikaje mu citabu, zinghani zose zono nghulonjeye.

³ Hambi i vilo nha vyokuza vyono nolowaziza wanhu wangu Isilayeli na Yuda. Nolowagomola kanyhi ku yisi yono nawapela walezi wawo, nawo wayisole kanyhi, yiwe yisi yawo. Vyo nghutya, ane no Muwaha Mulungu.”

⁴ Nayo u Muwaha Mulungu yakulonga za kuli wanhu wa Isilayeli na Yuda, yakutya nhavi,

⁵ “Nahulika lizi lye cililo co wogofye, cililo co woga, hamba si cililo co mulamu yaye.

⁶ Alu, ta mwihwesaje! Mwene mbeka, u munhu we cilume, kosuma kulela mwana hongo? Alu nhawulenyi nghumuwonenyi anye we cilume wose, mwibatilize zinda zenyu ne miwoko, nho mucekulu mono yali mu nghunga yo lusawo? Nhawulenyi, nha nghuwona wose musininghaye lo?

⁷ Ninga lizuwa lyo wogofye likuza, hasina hamba lizuwa linji lyono lyolowa lihwanile ne lizuwa lilyo, lizuwa lyo wugaye we wanhu wangu, wo lulelo lwa Yakobo, ninga hamba nhavivyo, wolopona du.”

⁸ U Muwaha Mulungu we mihanga yakutya nhavi, “Ne lizuwa lilyo kolo likuza, nololubena lubano lono luli mu zisingo zawo, niwawopole ne manyolo gawo. Na ku wulawa mwizuwa lilyo, nawo si wolowa kanyhi wawanda we wanhu wajenzi yaye.

⁹ Langa wolonyitumamila nene nili wene du, ane no Muwaha Mulungu wawo, hamonga no mwana wa Dawudi, mono nolomutemya yawe mutemi wawo.

¹⁰ “Nye nyo wanhu wangu, mulece kuwa no woga, nyo wanhu wa Isilayeli, mulece kogofywa na cinji ye! Hambi ane, nha nomuponyenyi ku wulawa kuko ku yisi yo kutali, ku yisi yiyo yono mufunjigwe mu jela. Nanye molowuya du kono kwenyu, mwikale no mulamu. Kanyhi holowa hasina hamba munhu yunji wo wose, mono kolomogofyenyi yaye.

¹¹ Ane nolomuzizenyi, nimuponyenyi. Nologongomeza i makungugo gose, i hanhu hose hono namwiyagazizenyi. Anye langa, si nolomongomezenyi yaye. Ninga hamba nhavivyo, si nolomulecenyi du, ndece kumulipicizenyi yaye, langa nolomulipicizenyi kwe ling'ani du, vyo nghutya, ane no Muwaha Mulungu.”

¹² U Muwaha Mulungu yakuwalonjela i wanhu wakwe yakutya nhavi, “Alu mulanje ta, ne zinghomele zenyu hamba si zikunoga yaye, no wutamiswe wenyu hamba si wukulagulwa ng'o.

¹³ Alu lanje, hasina hamba munhu wo wose mono yakumululenyi, hasina hamba miti yo yose yono yokwila mu zinghomele zenyu. Hasina hamba witumbilo wo kuponywa yaye.

¹⁴ Ne wendece wenyu wose, wakondya kumusemwenyi, hamba si womululenyi kanyhi yaye. Nane nghamuhomenyi nha muli walugu, no wulipicizwe wukawa wukali muno, ku soko yo wubi wenyu vyono winji muno, hambi i metumo genyu mabi, nha gali gonjelezeka muno.

¹⁵ Holeka mulece kung'ung'ulika muno, ku soko yo wutamiswe wenyu, hambi nha si moponywa yaye. Nane nghamulipicizenyi nhavivi, ku soko yo winji wo wubi wenyu, hambi i metumo genyu mabi, nha gali gonjelezeka muno.

¹⁶ Ninga ku wulawilila lulu, i wanhu wose wono wolomusolelenyi vinhu vyenyu, ale nawo wolosolelwa vinhu vyawo nhavivyo. Ne walugu wenyu wose, wolosolwa wategulwe kutali nha wafungwa. Ne wanhu wose wono wolomwiwonelenyi, nawo wolokwiwonelwa, ne wanhu wose wono wolomupumhenyi nawo wolopumhwa nhavivyo.

¹⁷ Hambi nha nolomugomolelenyi kanyhi u wuswanu wenyu, kanyhi nolomuponyenyi ne zinghomele zenyu, hamba i walugu wenyu wawe kutya, ‘Alu mulanje, Sayuni yakondya kulekwa hasina hamba yunji kanyhi mono yakuyitondowoza yaye.’ Vyo nghutya, ane no Muwaha Mulungu.”

¹⁸ U Muwaha Mulungu yakutya nhavi, “Nowagomola wanhu wangu ku yisi yawo, ne zimhuga zawo zose, nowawonela lusungu. Nayo Yelusalemi yolozengwa kanyhi, ne likaya lyayo lye likulu, nalyo lyolozengwa kanyhi mu matongo galyo.

¹⁹ Ne wanhu wono wowa wekaye mumo, wolokwimba zinyimbo zo lukumyo, wolowa wazozize so nyemo mbaha. Nane nolowamotya, waze welele wawe wenji muno, no wumoteswe wangu wolowaletela lilumbo liwaha.

²⁰ Nolowagomolela i vilungo vye likungugo lyawo, nha vyono wali isonje, no kuwasikamya kanyhi. Nolowalipiciza wanhu wose wono wawewonelaga.

²¹ No mutemi wawo, kololawilila mumo du mu nghungugo yawo. Na mono kolowatema, kolowa wa mu mhuga yawo weneco. Nane kolo nghumucema, nayo kolonyiziza. Hambi nha sikolokwijelela nyanyizize, lono nene nghali sinamucema yaye.

²² Nawo wolowa wanhu wangu nane nolowa Mulungu wawo. Vyo nghutya, ane no Muwaha Mulungu.”

²³ Ne likuwo lyo Muwaha Mulungu, mbeka wo mukukunzo we civulavumbi ce vilungo, cono cowaziza ko wukali, ciwagwile mu mitwe yawo i wanhu wabi.

²⁴ Nalyo likuwo lilyo likali lyo Muwaha Mulungu, hamba si lyolowuka mbela yaye, sunga langa kolo lyakondya kwituma zose no kufisiliza wuhile wakwe. Ne wanhu wakwe, wolozitanga zizi, mu vilo vye ndumo.