Yelemiya 3 - Luganuzi Luswanu Kuli Wanhu Wose 2002

Isilayeli mono si mwihuwilwa

¹ U Muwaha Mulungu yakutya nhavi, “Hono munhu yamulece mugolece wakwe no kumupela talaka, nayo mucekulu yuyo ho yabite yakatolwe na munhu yunji, hodu u munhu yuyo si kosuma kumuwuyila kanyhi u mucekulu yuyo. Ku soko hono yanoze nhavivyo, nghani yiyo, yoyavufya yisi muno muno. Gwe Isilayeli, alu nha watuga wendece wenji muno muno, kanyhi kunji ho wukusaka wumbuyile'ne!

² Alu wugalamile ta wulanje mu matunda mucanyha, wule, ho hali hanhu hanji hono agwe si wetuma nha munhu musenyha? Hambi agwe nha wekalaga ha mhelo ye zinzila wuwalindiye wendece wako, wukawa wehwana u mwalabu mono kehundikaga mu nyika, ho yawatendele vibi i wakola nzila. Nagwe Isilayeli wakondya kuyavufya yisi, ku soko yo wusenyha wako.

³ Na ku soko yiyo, holeka nayo mvula si yikutonya, sunga ne mahalavu gose hamba si gakuza yaye. Hambi nha wehwana i wanhu wasenyha, akuno wusina hamba cevu yaye.

⁴ “Na kanyhi vyo wukali du kunyitya, ‘Agwe wuli Baba, hambi nha wali wunyendile 'ne ku wulawa wudodo wangu.

⁵ Holeka si kosuma kwikala ne likuwo lyako nhondo zose, hamba kungholelwa likuwo cibitilila.’ Heya 'gwe Isilayeli, nhavivi vyo kulongaga, ninga akuno vyo wukwituma ne makani mabi du, nha vyono wukusaka gwegwe.”

Isilayeli na Yuda yiwanojeye wanene

⁶ Kanyhi mu vilo vyo mutemi Yosiya, u Muwaha Mulungu yakanonjela yakatya, “Alu wule, waziwona zono yetumile Isilayeli, mono si mwihuwilwa? Hambi nha yakondya kundeka 'ne, kawa kubita mu matunda matali gose, na hasi ye mabici gose gono gena mahamha gadedewaye, kawa kwituma zo wusenyha wakwe.

⁷ Nane nghawa kwihwesa nha vyono, kolo yakukondya kwituma zizo zose, nhondo ho kosuma kumbuyila'ne. Ninga mwene hamba si yasuma kumbuyila 'ne hamba nhavi, sunga no lumbulye Yuda mono si mwihuwilwa, nayo yakaziwona zizi zose.

⁸ Nayo Yuda, yaziwona, nha vyono nakondya kumuleka Isilayeli, namupela talaka, na vyono namuwinga, ku soko yandeka 'ne, no kuzityatya zo wusenyha. Ninga nayo Yuda munghalo lumbulye Isilayeli mono si mwihuwilwa, nayo hamba si yatuga woga yaye. Langa nayo yakawa musenyha,

⁹ akuno yasina ne cevu yaye. Yakayavufya yisi, yakasenyha mu nzila yo wuhemba mabwe ne mibici.

¹⁰ Ninga hamba nhavivyo, mwene Yuda u lumbulye lya Isilayeli mono si mwihuwilwa, nayo yakenoza nha yakumbuyila 'ne, ninga hamba si yali mbeka, langa ko wulambi du. Vyo nghutya ane no Muwaha Mulungu.”

¹¹ Hanyuma kanyhi, u Muwaha Mulungu yakanonjela, nha vyono, hamba yawe Isilayeli yali yakondya kumuleka, ninga hamba nhavivyo, kelajila nha vyono yali ling'ani si yenha Yuda mono si mwihuwilwa.

¹² Holeka yakawa kunyitya nha vyono mbite nghamulonjele Isilayeli nimutye nhavi, “Agwe Isilayeli, mono si wuli mwihuwilwa, ale wumbuyile 'ne. Hambi ane nha nili lusungu, hamba si nokolwa ne likuwo, hamba kukukolelwa likuwo cibitilila.

¹³ Langa ane yono nghusaka kuli 'gwe, wuvumile masutya gako gose nha vyono wali wamubedegala u Muwaha Mulungu, u Mulungu weko. Kanyhi wunene, nha vyono wali kusenyha ne milungu mijenzi, hasi ye mibici yose yono yina mahamha gono gadedewaye, hamba kugebata malajilizo gangu yaye. Vyo nghutya ane no Muwaha Mulungu.

¹⁴ “Nye nyo wanhu mono si muli wehuwilwa, ale mumbuyilaje 'ne, hambi nha muli wangu. Nane nomusolenyi munhu yumonga yumonga, mu wulawa mu makaya gose. Kanyhi nosola wanhu wejete wejete, mu wulawa mu milango yenyu yose. Nane nomugomolenyi sunga kwi'tunda lya Sayuni.

¹⁵ “Nane nomuwicilenyi watemi wono wowa wena cihuliko kuli'ne. Nawo womutemenyi mu nzila ye mahala no wizuce.

¹⁶ Nanye kolo mweza kuwa mwenjipa, no kuwa wenji muno mu yisi yiyo, ne wanhu hamba si wololonga kanyhi ze Lisanduku lyangu lye Cilagane yaye, hamba si wolowa kulihwesa kanyhi hamba kulikumbucila kose, hamba kulisaka kanyhi, hamba kuwa no wuhile wo kunoza Lisanduku linji kanyhi lye Cilagane.

¹⁷ Ne vilo vivyo kolo vyakondya kuza, Yelusalemi nhondo, yolocemwa, ‘I ligoda lyo wutemi lyo Muwaha Mulungu.’ Ne makungugo gose golokwikongholela baho gawe kuhemba nene du. Nawo lulo, hamba si wolokwitumila lukulu kanyhi za mu cibede cawo, hamba i zimbi za mu zinhumbula zawo.

¹⁸ Mu vilo vivyo, i wanhu wa Isilayeli ne wanhu wa Yuda, wolokwilunza hamonga. Nawo wolowukana hamonga ku wulawa ku wuhamywe, mu yisi yo lubavu lwa kusumuka, wawe kuwuya kanyhi ku yisi yono ane nawapela i walezi wenyu yiwe wuhazi wawo.”

Wanhu wo Mulungu wakuhemba vihwani

¹⁹ U Muwaha Mulungu yakutya nhavi, “Gwe Isilayeli, ane nasakaga nghubocele 'gwe kotya wuli mwanangu, nghupele ne yisi swanu muno, i hanhu haswanu hono hacizize yinze yose. Ane nasakaga agwe wunyheme'ne, baba, ho wulece kundeka 'ne kanyhi.

²⁰ Ninga kumbe nagwe, wukawa si wuli mwihuwilwa kuli'ne yaye, wukehwana nho mucekulu musenyha. Vyo nghutya ane no Muwaha Mulungu.

²¹ Ne lizi likuhulikwa ku wulawa mu matunda mucanyha. Lizi lye wanhu wa Isilayeli, so wulile wawo, no wulombe wawo. Hambi nha wekalaga mu mikalile yo wubi du, wakondya kumusemwa u Muwaha Mulungu, u Mulungu wawo.

²² Holeka anye wose, mono mwali mwakondya kumuleka u Muwaha Mulungu wenyu, alu mumuwuyilaje nhondo. Nayo komuponyenyi, no kumunozenyi muwe wehuwilwa kuli mwene. Nanye mukutya, “Heya cikuza kuli'gwe go Muwaha Mulungu, hambi 'gwe nha yo gwegwe go Muwaha Mulungu wetu.

²³ Hambi nha si casuma kutuga wutazi wo wose kuli wuhembi we wanhu wono si wamumanyile Mulungu wono cahembaga mucanyha ye vizuli vye matunda. Hambi u wutazi kuli Isilayeli, nha wulawaga kuli Muwaha Mulungu, u Mulungu wetu du.

²⁴ “Ninga u wuhembi wo kumuhemba Baali, u mulungu we cevu, wakondya kucinoza ciwe matewa gono gajiliye. Hamonga ne wana wetu we cilume na we cicekulu, cakondya kuyajiliza sunga ne milimo ye walezi wetu yono wetuma, ku wulawa vilo vye katali.

²⁵ Holeka alu yicinojeye cigone hasi so cevu cetu, cilece zisoni zetu zicifunice. Hambi ase hamonga ne walezi wetu, nha cikalaga cikwituma wubi du hali Muwaha Mulungu, u Mulungu wetu, kanyhi hamba si cigebate ne malajilizo gakwe.”