Yelemiya 2 - Luganuzi Luswanu Kuli Wanhu Wose 2002

Lidimo lyo Mulungu kuli wanhu wa Isilayeli

¹ U Muwaha Mulungu yakanonjela,

² niyiganule nghani yiyi kuli wanhu wose wono wekaye mu Yelusalemi niwatye, Muwaha Mulungu yakutya nhavi, “Ane nghumbuciye vyono, lono wali wukali mudodo, wali wuli mwihuwilwa muno, na vyono lono cepogozeza ane na agwe, wali wunyendile muno. Hambi nha wanhyatya, cikakola wose mu nyika mu yisi yono yali yikali hamba nahadikwa cinji.

³ Gwe Isilayeli, yo gwegwe du wuli wene mono wali wuli wangu, yo gwegwe mono wali yo sawo yangu siwanulwe. Nane nghawaletela magazo no wongomezwe, i wanhu wose wono wakutamisaga. Vyo nghutya ane no Muwaha Mulungu.”

U wubi we walezi we Waisilayeli

⁴ Nye nyo lulelo lwa Yakobo, ale muhulicize ta, zono Muwaha Mulungu yakulonga, anye nyo we mhuga yose ya Isilayeli.

⁵ U Muwaha Mulungu yakutya nhavi, “Alu i walezi wenyu wambona nina lisutyaci? Hamba nghani yono yikaleka wene wakundeka 'ne? Hambi wene nha wakahemba vihwani viseswe vyono visina cambuzi, na weneco wakawa wasina cambuzi.

⁶ Hamba si wenda no kunyhelelela yaye, hamba yiwe yo nene mono nawaponya ku wulawa ku yisi ya Misili nghawatonga mu mbago, mu yisi ye nyika ne manhimbwisa, mu yisi nghavu, yono yina mbali mbaha. Yisi yono si yikalagwa na munhu wo wose hamba hasina munhu wo wose mono kolo kola mu yisi yiyo.

⁷ Nane nghawaleta sunga ku yisi yono yina moso muno, ho wayisangalalile mikalo yayo, hamonga ne vinhu vinji viswanu vyono vili mumo. Ninga wene wakayihodanga yisi yiyo, wakayavufya i yisi yono nawapela.

⁸ Ne wakohani nawo, hamba si wawuza watye, ‘Alu u Muwaha Mulungu yali hayi lo?’ Heya si wasuma kuwuza, hambi i wejizi wangu wo wulajilize nha si wali wamanyile 'ne. Nawo i walongola wakambedegala 'ne, i wawizi nawo, wakawa wakuwilila mwi'tagwa lya Baali, wakawa wakuvihemba vihwani, vyono si vikwiliye cinji co cose.

U Muwaha Mulungu yakuwasitaka wanhu wakwe

⁹ “Ale, ku soko ya zizo, holeka nane no Muwaha Mulungu cokwimana ne wanhu wangu, cilongane calo nawo. Kanyhi niwahose hamonga ne wana wawo.

¹⁰ Aluno, wubite ku lubavu lwa kumwezi ku vizingwa vya Kupulo, wumutume yunji yabite ku cilima ku yisi ya Kedali. Nagwe kowona nha vyono, kusina nghani yinji yono yihwanile yiyi, yono yejela kuko.

¹¹ Vyono hasina hamba likungugo linji lyo lyose, lyono lyakondya kuyikawaniza milungu yalyo muli lyene, hamba yiwe milungu yiyo si ya mbeka yaye. Ninga i wanhu wangu wakondya kundeka'ne, no Mulungu mono nawaletela lilumbo, wakayityatya i milungu yono si yosuma hamba kuwataza cinji yaye.

¹² Holeka nanye nyo wulanga mucicime so woga, kanyhi mwizine, mwinjilwe no wucelewale so zinghani zizi.

¹³ Hambi i wanhu wangu nha wetuma wubi wuli hejete, wandeka 'ne mono nili muvwilo we malenga go wumi. Wene wehimbila visima vyono vikung'welela mbela mbela, vyono si vyosuma kwikala na malenga.

Cambuzi ce Waisilayeli, so wu wula wihuwilwa wawo

¹⁴ “Ninga Isilayeli, si muwanda yaye, hamba si yalelelwa mu wuwanda yaye. Alu ku sokoci i walugu wakwe wakumupelemba?

¹⁵ Alu lanje, wakumukolomela wenha simba. Ne yisi yakwe, wayinoza yawa nyika, ne vikaya vyayo, vyaweza matongo du, gono gagwiye hasi no kulekwa.

¹⁶ Heya, sunga ne wanhu wa ku Memufisi, ne wanhu wa ku Tapenesi, wakondya kulitula lindosi lyakwe.

¹⁷ Gwe Isilayeli, alu zizi, nha kwiletela gwegwe go mweneco! Hambi nha kundeka 'ne no Muwaha Mulungu, u Mulungu wako, mono nakulongoza agwe mu nzila.

¹⁸ Alu mwene 'gwe, wukwihwesa kotuga cambuzici, hono wubite ku Misili, wukang'we i malenga ga mwi'kolongo lya Nile? Hamba wukwihwesa kotuga cambuzici lo, hono wubite ku Ashuli, wukang'we i malenga ga mwi'kolongo lya Efulata?

¹⁹ Ninga u wubi wako, wo wokulipiciza, no wibavye wako, nawo wo wokuling'aniza 'gwe. Nagwe baho ho kokwifundila u wubi we nghani yiyi, hamonga no wusungu wo kundeka 'ne, ane no Muwaha Mulungu, u Mulungu wako, no wuwe wako wo kuwa wusina cihuliko ca kuli'ne kanyhi. Vyo nghutya, ane no Muwaha Mulungu we mihanga.”

Waisilayeli wakulema kumuhemba u Muwaha Mulungu

²⁰ U Muwaha Mulungu yakutya nhavi, “Agwe Isilayeli, wulawa katali walema wutonji wangu, wukalema kuhulika 'ne no kuhemba nene. Langa wukawa kubita mwi'tunda litali, na mu masina ge mabici gono gadedewaye, wukawa kuhemba i milungu yinji.

²¹ Ninga ane ho nakuhadika 'gwe nha muzabibu muhagulwa, mu wulawa mu mbeyu swanu muno. Ninga lu lanje vyono weza winha! Weza winha muzabibu wono wudodile wono wusina kanyhi cambuzi co cose.

²² Holeka alu, hamba wikweme ne sabuni nghali muno, ninga u wubi wako vyo wowa wijeye du ha meso gangu.

²³ Alu mwene, ho kosuma nhawule kutya, vyono agwe si wiyavufye yaye, hamba wukali nahembela lukulu Baali? Ninga wulanje vyono wetumila wubi mwi'lolo, wuziwone ta zono wetuma kuko! Agwe wehwana ngamiya, yono yilecigwe si mbope, yikumangha caka du ako na ako!

²⁴ Wihwanile nyhenje yono yizoweye nyika, yono yinusaga mbeho ako na ako so masulumizi gayo, alo nani mwene mono kosuma kuyimila u wusulumizi wayo? Kanyhi nha hasina nume yono yogazika lono yikuyilondola hambi yene nha yijelaga du nhondo zose mu madaha gayo.

²⁵ Gwe Isilayeli, wulece kuyisakaza migulu yako bwete, hamba kwipela nyhilu bwete, so wulondolela milungu yinji. Hambi agwe nha wukutya, ‘Ane nalema kukuwuyila, hambi nha niyendile i milungu mijenzi, holeka nane noyityatya du.’ ”

Isilayeli wanojeye walipicizwe

²⁶ U Muwaha Mulungu yakutya nhavi, “Ninga nha vyono u muhizi kakolwaga cevu lono yebatwa, ale na nyenye nhavivyo nyo wanhu wa Isilayeli, nanye molokolwa cevu, hamonga ne watemi wenyu, ne wawaha wenyu, ne wakohani wenyu, hamonga ne wawizi.

²⁷ Nanye wose molokozwa cevu, anye wose mono mutezaga u mubici awulya, yo sogo yenyu, ne libwe alilya, yo nyina yenyu. Na zizi zolomwijelelenyi vyono anye mwakondya kundeka 'ne, hamba si mukusaka no kumbuyila yaye. Ninga kolo mwenjila mu wugaye, hobaho mukuwa kunondola ho nize nimuponyenyi.

²⁸ “Alu i milungu yono mweyinozeza nyenye nyo weneco, yili hayi lu? Nanye kolo mwenjila mu magayo, mweze yileka le yimuponyenyi, hono mbeka yosuma kumuponyenyi! Nagwe Yuda, wina milungu minji muno, hambi liwalo lye milungu yako, nha liling'aniye ne liwalo lye zikaya zako.

²⁹ Alo mwina nghanici nane? Hamba nhawule mweza musina cihuliko kuli'ne?

³⁰ Nghamulipicizenyi, ninga wulipicize wangu wono nghamulipicizenyi, hamba si wakwila cinji yaye, nanye hamba si mwenda ho nimugomolenyi. Mukawawulaga i wawizi wenyu, mukehwana nhe simba yono yisagahaye muno.

³¹ Nye nyo wanhu wa Isilayeli, muhulicize ta zono nghulonga ye. Mwene ane, nha cinji nehwana nhe nyika hongo kuli'nye, hamba naweza nha wutitu kuli'nye, ne yisi ye zimbali? Alu nhawulenyi mukutya mokwituma nha vyono mwendile nyenye, si mowuyila lukulu kuli'ne kanyhi ng'o?

³² Alu mwene mukwihwesa nha vyono muhinza kosuma kuwusemwa wihambo wakwe hongo? Hamba bibi halusi kocisemwa i civwalo cakwe ce halusi hongo? Ninga anye nyo wanhu wangu, mbeka mwakondya kusemwa'ne vilo vinji, vyono visina liwalo.

³³ Ninga 'nye langa muli wasugu du, ku wulondola zo wusenyha. Sunga ne wacekulu wabi, wosuma kwiyijiza ku wulawa kuli'nye.

³⁴ Sunga ne vivwalo vyenyu vikwilile sakami ye waciwa, wono wasina masutya, hamba si sakami ye wahizi yaye, i wabena zikaya za wanhu. ‘Ninga hamonga na zizi,’

³⁵ anye mukutya nhavi, ‘Ane sina masutya go gose, holeka u Muwaha Mulungu, si kongholelwa likuwo yaye.’ Ninga mumanye vyono ane no Muwaha Mulungu, nomulipicizenyi du, hamba yiwe nyenye nyo weneco, si mukulumba yaye vyono mwitumile wubi.

³⁶ Hambi nha mweyibedegala nyo weneco, mukawa kuyipitucila i milungu ye makungugo ganji. Ninga mumanye vyono molokozwa cevu ne yisi ya Misili, nha vyono mwakozwa cevu ne yisi ya Ashuli.

³⁷ Molosumwa ne Wamisili, mukolwe cevu. Ninga ane no Muwaha Mulungu, nane nawalema wawo wono muwetumbiye, hambi nha si motuga cambuzi co cose kuli wene.”