Yelemiya 18 - Luganuzi Luswanu Kuli Wanhu Wose 2002

Yelemiya ha kaya yo muwumbi

¹ U Muwaha Mulungu yakanonjela yakatya nhavi,

² “Gwe Yelemiya, alu, ta wubite ku kaya yo muwumbi, nane kuko ko nokulonjelela i nghani yangu.”

³ Ale du, nane nghawa kubita, nghawa kumwagana u muwumbi, yali mu mulimo wakwe wo wuwumbi, yakwitumamila liguludumu.

⁴ Ne ciya co cose cono cejelaga si cilawiye viswanu lono yaciwumbaga, yasolaga lilongo lyaco, kawumba ciya cinji kanyhi, nha vyono yasakaga mweneco.

⁵ Nane lono nazilangaga zizo, u Muwaha Mulungu yakanonjela yakutya,

⁶ “Wule! Alu ane si nosuma kumunozezenyi nhavivi, anye nyo wanhu wa Isilayeli lo, nha vyono u muwumbi yalinozize lilongo lili? Nanye nha muli mu miwoko yangu, nha vyono linha lilongo mu miwoko yo muwumbi.

⁷ “Na mu mapango go gose, hono nene no mweneco sace, niwuwuse, hamba niwubenanje, hamba niwongomeze wutemi wo wose, hamba nghungugo yo yose,

⁸ na hono nghungugo yiyo yono niyitambuye yipituce no kuwuleka wubi wayo, hodu, nane si noyinoza vibi nha vyono nali nihwesize.

⁹ Na ku lubavu lunji, hono nitye, alu nowuhadika no kuwuzenga wutemi wo wose, hamba nghungugo yo yose,

¹⁰ na hono nghungugo yiyo yilece kuwa ne cihuliko kuli'ne, yijendelele kwituma ze metumo mabi, hodu nane si nosuma kuwatendela ziswanu zono nali nihwesize niwatendele.

¹¹ Holeka luno, wuwalonjelaje i wanhu wa Yuda, hamonga ne wanyawusi wa Yelusalemi, nha vyono, nane nhondo, neza kwiwikaniza niwalipicize. Holeka wuwalonjele vyono, yiwanojeye walece kujendelela ne mikalile yiyo yo wituma wubi. Langa yiwanojeye luno wazipitule zinzila zawo, hamonga ne zimbi zono wakwituma.

¹² Ninga wene wokupitula watye nhavi, ‘Aa, ng'o! Ase calema! Langa 'se, cojendelela du kugatyatya mahweso getu co weneco, no kwituma munhu no wuhile wakwe mweneco, nha vyono yakusaka mu nhumbula yakwe.’ ”

I wanhu wakumulema Muwaha Mulungu

¹³ U Muwaha Mulungu yakutya nhavi, “Ale ta, wuwawuzaje we makungugo gose, hono ku wulawa na katali, yejela nghani yono yinha yiyi. Nye! I wanhu wa Isilayeli, mbeka wetuma nghani yo wizine!

¹⁴ Hamba mu mabwe matali ga mu Lebanoni, ho hali mapango ganji, gono gekala gasina seluji lo? Hamba i malenga ge mbeho, gono gakulawa mu vikolongo, vyono vilawiliye mwi'tunda, vinyalaga lo?

¹⁵ Ninga i wanhu wangu wakondya kusemwa 'ne nalu wakuvifusiza wuvumba i vihwani. Nawo wekobaza mu zinzila zawo, hamba si wakusuma kuzityatya kanyhi zinzila ze katali, alu weza kukola mu zinzila zono si nozelezwe yaye.

¹⁶ Nalu, wakondya kuyinoza yisi yiyi, yaweza cinhu ca kogofya muno muno, alu yeza yisi yono yowa yibedegaywe cibitilila. Na wose wono wowa kukola behi nayo, wocelewala muno ku soko ya zono woziwona, wowa kuyizugunza ne mitwe yawo ko wizine wuwaha.

¹⁷ Holeka nane luno, noweyagaziza wanhu wangu kuli walugu wawo, wowa nhe manghundi, gono gakuputwa ne mbeho ya kucilima. Nane nowapitucila mugongo. Hamba si nowapela wutazi kanyhi, mwizuwa lyo wugaye wawo.”

Yelemiya yakunozezwa ciwungu cibi

¹⁸ Hanyuma i wanhu nawo wakalongana weneco wose, wakutya, “Alu nye! Alenyi cimunozeze Yelemiya ciwungu cibi! Hambi nha cowa cina wakohani nhondo zose, wono wowa kucijiza, ne wanhu we mahala, wono wowa kucitonga, hamonga ne wawizi, wono wowa kuyiganula i nghani yo Mulungu. Holeka lu muze cimulonganje, cilece kuzihuliciza kanyhi ne zinghani zakwe.”

¹⁹ Ale nane baho, nghawa kumulomba Mulungu nghatya, “Gwe go Muwaha Mulungu, nghukunena wuhulice zono i walugu wangu wakumhinjila'ne.

²⁰ Alo 'mbi u wuswanu, wukuwa kulipwa i zimbi? Hambi nha wakondya kuhimbila likombo, ane ho ngwile mumo. Ninga wukumbucile nha vyono, nakuziza nghalongana nagwe ku soko ya wene, nghukunena, nha vyono wulece kuwatendela mwi'kuwo lyako.

²¹ Ninga aluno 'gwe go Muwaha Mulungu, wuwalekaje wana wawo wafwe ne nzala, nawo wawulajilwe ku wulugu. Nawo i wacekulu, wawajilize i walume zawo, hamonga ne wana wawo. Nawo i walume matamwa gawawulaje, ne wazelelo nawo wafwile ku wulugu.

²² Wuwategulile ciwumbi ca wanhu, wakazitece zikaya zawo nhinicizo. Wuwalece walile muno ko woga wuwaha, hambi nha wakondya kuhimbila likombo, ane ho ngwile mumo, kanyhi wanhejile no mutego ho wangwize.

²³ Ninga agwe go Muwaha Mulungu, wuwumanyiye lukulu wuhile wawo, nha vyono wakusaka kumbulaga. Holeka, wulece kuwanenela masutya gawo, hamba kuwupata wubi wawo. Langa wuwagwisaje hasi, wasumwe, kanyhi wuwaling'anize mu madaha ge likuwo lyako.”