Yelemiya 12 - Luganuzi Luswanu Kuli Wanhu Wose 2002

Yelemiya yakumuwuza Muwaha Mulungu

¹ Gwe go Muwaha Mulungu, hamba ciwangane nagwe muli zangu, agwe ninga vyo kojendelela kuwa mu mbeka du. Holeka nane luno, nosuma kukuwuza zinghani zono zinojeye wiling'ano, nha vyono nhavi, Alu mwene, nhawule i wanhu wabi nawo wamoteswe muno? Hamba nhawule i wanhu wono si wehuwilwa nawo wekaye wacehile?

² Alu wawahadika, nawo wahimbiza milela, weza kuwiluka, wakulavya mikalo. Na nhondo zose, walongaga zako, ninga walongaga kwe milomo yawo du, mu zinhumbula zawo, hamba si wakuceleleye bwete.

³ Ninga go Muwaha Mulungu, agwe wuzimanyile zangu, kanyhi kuziwonaga na zono nitumaga zose kanyhi wumanyile nha vyono nghwendile 'gwe. Ale, wuwakulunhye wanhu wawa i wabi, nha ngholo zono zikutegulwa ku wuwulagwe, holeka wuwawikanizaje, sunga lizuwa lyawo lyo kuwulagwa liwaficile.

⁴ Alo yisi yetu yijendelele kuwa yinyalile, hamonga ne mahanze ga mu mawimbi gose sunga nili lo? Sunga nalu, i vilimu, hamonga ne zindeje zose nha zakondya kongomezwa, ku soko yo wubi we wanhu wetu, i wanhu wono watezaga “Hambi u Mulungu nha si yakuziwona yaye zono citumaga.”

⁵ Nayo Muwaha Mulungu yakatya nhavi, “Alu mwene 'gwe Yelemiya, hono i wanhu du wono wajendaga kwe migulu, wakukukataza no lumangho, alu ho kokatalila hayi waco, hono mwitije lumangho ne zifwalasi? Na hono wuwe si wukusuma kwima wukamile mu yisi yono yipolile, alu ho kosuma wule mu yisi ya Yoludani yono yina widunhumuzi?

⁶ Alu, lanje, vyono, sunga ne wanduguzo wose mono muli mhuga monga, nawo wakugaluka, nalu wakondya kwilunza mwi'puga lya wono wakukuhoma 'gwe. Holeka nagwe, hamba wakulonjele nghani swanu muno, ninga wulecele lukulu kuwetumbila hamba hadodo.”

U wukalale wo Muwaha Mulungu, ku soko ye wanhu wakwe

⁷ U Muwaha Mulungu yakutya nhavi, “Holeka nane luno, nakondya kuwaleka wanhu wa Isilayeli, nakondya kuwalema i wanhu wangu we nghungugo hagulwa. Nalu i wanhu wono niwendile, nakondya kuwakombola mu miwoko ye walugu wawo.

⁸ Hambi wene i wanhu wangu, nha wakondya kundeka, nalu wakungholomela, wehwana nhe simba ya mu mbago, holeka nane nawasula.

⁹ Nalu i wanhu wangu, luno wehwana nhe ndeje, yono yipilimwe ne zindeje zinghali mbavu zose, zono zikucemeleza i malimu gose ga mu mbago, gaze vihanje kulya sikukuu yiyo!

¹⁰ Ne wadimi wenji wakondya kuwuhodanga u mugunda wangu we mizabibu wayikanyanjiza migunda yangu no kuyinoza yisi yangu yono niyendile yiwe nyika.

¹¹ Wayinoza yawa mbago, nalu yawa wambuce du hali'ne. Ne yisi yose yakondya kuwa nyika na hasina hamba yunji mono yakuyitondowoza yaye.

¹² Ne wanhu wakulawa mu yisi yose yono yili mu matunda, mu nyika, wakuza kuyiteka yisi yangu. Holeka nane luno, nayiletela wulugu wuyongomeze yisi yose. Na howa hasina hamba monga mono kokwikala yapolile.

¹³ Hambi i wanhu wangu, nha wahadika wuhemba, ninga wakadudula mabeleje du. Na mbeka, wetuma mulimo mukamu muno hamba kutuga cambuzi yaye. Heya, si watuga nhwanga yaye ku soko ye likuwo lyangu likali.”

U wihuwizo wo Muwaha Mulungu kuli wono wekalane ne Waisilayeli

¹⁴ U Muwaha Mulungu yakutya nhavi, “Ane nina nghani yono nghusaka niwalonjele wono wekalane ne wanhu wangu Waisilayeli, wono wakondya kuyinoza matongo, i yisi yono nawapela i wanhu wangu Waisilayeli. Nha vyono nane, nowawusa wawo i wanhu wabi, mu zi'si zawo, niwakule, niwawuse ne milela nho mubici, nimuponye Yuda muli wene.

¹⁵ Nane kolo nakondya kuwawusiza lukulu, ale, baho langa nane ho nolowawonelela nawo lusungu, niwagomole kanyhi mu zi'si zawo, wanhu na yisi yawo.

¹⁶ Nawo hono wawuvumile mu zinhumbula zawo u wuhembi we wanhu wangu, kanyhi welahize wawe kutya, ‘Nha vyono Muwaha Mulungu kekalaga mumi,’ nha vyono nawo wali wawafunda i wanhu wangu, kwilahiza kuli Baali, ale, nawo baho, nhondo ho wowalilizwa hamonga ne wanhu wangu, no kumoteswa.

¹⁷ Ninga likungugo lyo lyose lyono lyowa lisina cihuliko, nane noliwusiza lukulu likungugo lilyo, nilyongomeze. Vyo nghutya ane no Muwaha Mulungu.”