Yelemiya 10 - Luganuzi Luswanu Kuli Wanhu Wose 2002

U wuhemba vihwani, no Wuhembi we mbeka

¹ Nye nyo wanhu wa Isilayeli, alu muhulicize ta zono u Muwaha Mulungu yakusaka kumulonjelenyi,

² Yakutya nhavi, “Mulecele lukulu kuzityatya zinzila ze makungugo ganji, hamba kogofywa ne vitanjilo vya kucanyha, hamba wawe wene we makungugo vikuwogofya muno.

³ No wuhembi we wanhu wawo, nha wusina cambuzi hamba hadodo, hambi u mubici, nha wukutemwa mu mbago, hanyuma wuwa kuseswa ne wasesi ko wunghula,

⁴ no kuhambwa kwa fweza na zahabu, na hanyuma wawa kuwukomelela misumali, ho wulece kudegandega.

⁵ Ne vihwani vivyo, vihwanile nhe cihwani ciseswe co munhu, cono ciwicigwe mu mugunda we matanga, ho cogofye zindeje. Ne vihwani vivyo, si vikusuma kulonga yaye, hamba kujenda, langa sunga wuvidinghule du. Holeka anye, mulecele lukulu kuvyogopa, hambi nha si vyosuma kumutamisenyi yaye, hamba kumunozezenyi nghani yo yose yono swanu.”

⁶ Gwe go Muwaha Mulungu, nha hasina yunji wo wose kanyhi, mono yehwanile gwegwe, agwe wuli vilungo. Ne litagwa lyako likumucile muno, na mu wusume.

⁷ Hamba nani 'mbi kanyhi, mono si kakogopaga gwegwe go mutemi we makungugo gose? Yo gwegwe du wuli wene mono wunojeye kogopwa, hambi nha hasina yunji wo wose, mono yehwanile gwegwe, muli we mahala wose wa mu makungugo, hamba muli watemi wawo.

⁸ Wose nha walele du, kanyhi wasina mahala. Ale wene, wakwihwesa hamba wosuma kwiyijiza cicici, mumo mu vihwani lo vye mabici?

⁹ Hambi i vihwani vivyo, nha vihiliwe du fweza yono yikulawa ku Sipeyini, ne zahabu yono yikulawa ku Ufazi, nayo yo milimo ye watyani wanghula, yivwalile myenda ye liwala lyo lugandu, hamonga na ye liwala lidunghu, i myenda mihone ne wanghula.

¹⁰ Ninga agwe go Muwaha Mulungu, nha yo gwegwe du, go Mulungu we mbeka, yo gwegwe du go Mulungu mumi, kanyhi yo gwegwe du go mutemi we cibitilila. Na lono wuwe wakolwa ne likuwo, i yinze yicicimaga, sunga ne makungugo, si gakuwa kusuma yaye kulikangalila likuwo lyako.

¹¹ (Holeka anye nyo wanhu, munojeye muwalonjele we makungugo, vyono i milungu yiyo yono yeneco si yayiwumba yinze, hamba wulanga, yokongomezwa yose. Hamba si yolokwijela kanyhi hanhu ho hose mono yinze.)

U lwimbo lo kumukumya Mulungu

¹² Hambi u Muwaha Mulungu, nha yayiwumba yinze kwe vilungo vyakwe mweneco, yakayiwumba yinze kwe mahala gakwe mweneco, yakawutandalika sunga no wulanga.

¹³ Yakagalajiliza i malenga ga ku wulanga gakolome, kanyhi yo mweneco mono kagaletaga mavunde, ku wulawilila ku ndumo ye yinze. Kanyhi yo mweneco mono kaganozaga mamuli, gawe kumulika mu madaha ge mvula, kanyhi kayiletaga mbeho mbaha mu wulawa mu viwutwa vyakwe.

¹⁴ Na muli zizi zose, i wanhu wakwijela walele, kanyhi wasina mahala, na wawo wono wakuvisesa vivyo vihwani, wakondya kukozwa cevu, ku soko ye vihwani vyawo, hambi i milungu yawo yono wakuyisesa, nha ya wulambi du, kanyhi yisina wehele muli yene.

¹⁵ Holeka yisina cambuzi, langa co cinhu ca caka du. Ninga i lizuwa lyono Muwaha Mulungu yalaziza, kolokuza yayongomezeze lukulu, i milungu yiyo yose.

¹⁶ Hambi u Mulungu wa Yakobo, nha si yehwanile na wene, hambi mwene, nha yo yavinoza vinhu vyose, kanyhi yo mweneco mono yawahagula i wanhu wa Isilayeli, wawe wo wanhu wakwe wahagulwa. Ne litagwa lyakwe yakucemwa, U Muwaha Mulungu, we mihanga.

I mazizo go wuhamywe

¹⁷ Nye nyo wanhu wa Yelusalemi, alu mwakondya kupilimwa ne walugu! Holeka alu, munhu wo ose, yakongholeze vinhu vyakwe.

¹⁸ Hambi u Muwaha Mulungu, nha yakuza yamuwusenyi mu muno mono yisi yiyi, yamugumilenyi kutali, komutajilenyi mu magayo mawaha, hamba holowa hasina kanyhi yunji mono kolosigala mu yisi yiyi. Vyo yakutya u Muwaha Mulungu.

¹⁹ Nawo i wanhu wa Yelusalemi wakalila wakutya, “Woyi hee, catamiswa nye, ne zinghomele zetu, hamba si zolopona yaye. Nase cehwesaga nha vyono cosuma kuwukangalila u wugaye wono winha vivi!

²⁰ Alu lanje vyono, sunga ne mahema getu gasakala, ne milejehe yono yali yigawopile, nayo yakondya kudumukanjika. Ne wana wetu nawo, wose wakondya kubita, alu wali hasina. Holeka heza hasina, hamba munhu wo wose kanyhi, mono kocikomela mahema getu, hamba mono kosuma kucidumulila mabupa ne magayo pazigeya.”

²¹ Nane nghapitula nghatya, “Nye! I watonji wetu, nha weza wasina mahala, hamba si wasakaga no kuwuza wutonji yaye kuli Muwaha Mulungu. Na yiyi yo soko yono yikuleka sunga ne milimo yawalemela, sunga ne wanhu wetu luno, wakondya kwiyagala ako na ako.

²² Ninga luno ta muhulicize! Nghani yakondya kuza! Lanje, kowuli musindo muwaha muno, wukulawa ku yisi yo lubavu lwa kusumuka, ne lipuga lyayo lye wasilikale, lyogongomeza i makaya ga Yuda gawe nha nyika, hawe hanhu hono gowa kwikala macewe du.”

²³ Gwe go Muwaha Mulungu, ane manyile nha vyono hasina munhu hamba yumonga yaye, mono kewumipilaga mweneco. Hamba hasina munhu mono kawibatilizaga wumi wakwe mweneco.

²⁴ Gwe go Muwaha Mulungu, ale wuwakongholezaje wanhu wako, wulece kucileka yaye, hamba wulece kucilipiciziza mwi'kuwo lyako, hambi nha ho kocongomezeza lukulu.

²⁵ Langa wite likuwo lyako kuli we makungugo wono si wakumanyile, hamba kukuhemba gwegwe, na muli wanhu wono si wakwendile 'gwe. Hambi nha wawawulaganga i wanhu wako, kanyhi wakondya kucongomezeza lukulu, wakondya kuyinoza ne yisi yetu yeza matongo du.