Wuwale 9 - Luganuzi Luswanu Kuli Wanhu Wose 2002

Pasaka ye kejete

¹ Muwaha Mulungu yakalongana na Musa mu nyika ya Sinayi, mu mwezi mulongozi wa mu mwaka we kejete, lono wanhu wa Isilayeli wali wakondya kuwuka ku Misili. Yalonga yakatya,

² “Mwi'zuwa lye likumi na yine lyo mwezi wuwu, cinyamihe,

³ i wanhu Waisilayeli, wayinoze Pasaka mu nghango nha vyono winha wulajilize, hamonga no wityatye wayo.”

⁴ Nayo Musa yakawa kuwalonjela wanhu wa Isilayeli wayinoze Pasaka na kuyikamisa.

⁵ Na mwi'pango lye cinyamihe lya mwizuwa lye likumi na yine lya mu mwezi mulongozi, wakawa kuyinoza Pasaka, lono wali wali mu nyika ya Sinayi. Wanhu wakazinoza zose nha vyono Muwaha Mulungu yamulajiliza Musa.

⁶ Ninga mwizuwa lilyo hakawa ho wali wanhu wanji wono wali wakondya kwiyavufya so wupamiza muvimba. Holeka si wasuma kuyinoza yiyo Pasaka mwi'zuwa lilyo. Wawo wakamubitila Musa hamonga na Haluni wakawa kutya,

⁷ “Ase heya cili wavufywe, hambi nha cipamiza muvimba. Ninga alu, nhawule cikwimilwa, ho cilece kumulavizya Muwaha Mulungu cilavywa, hamonga ne Waisilayeli wayetu.”

⁸ Nayo Musa yakawapitula yakawatya, “Ale lecenyi ta, sunga nhuje lipitulo ku wulawa kuli Muwaha Mulungu.”

⁹ Nayo Muwaha Mulungu yakamulonjela Musa

¹⁰ yawalonjele Waisilayeli yawatye nhavi, “Lono muyenyu monga muli nyenye, hamba muli wana wenyu, yaweza mwavufywe so wupamiza muvimba, na lunji mu cipango cico, yali mu muhinzo kutali, ninga akuno ho yena no wuhile wo kuyinoza Pasaka.

¹¹ Ale, howuli wukombolwe wo kuyinoza Pasaka, kolo wakondya kupuluta mwezi monga, ku wuhalize we lizuwa lilyo. Ninga wuyinoze cinyamihe ca mwizuwa lye likumi na yine, lya mu mwezi we kejete. Wuyinozaje hamonga no mukate wono wusina cisase, hamba mboga zono zisina cisungu.

¹² Wulece kuyisigaza ndigwa yisigale so mitondo, hamba wulece kubena lifupa lyo lyose lyo mutugo. Langa wunoze Pasaka mu wulunji du wo wulajilize wayo vyono winha.

¹³ Ninga langa, munhu wo wose mono si yeyavufye, kanyhi hamba si yali mu muhinzo kutali, nayo ho yalece mweneco ne nyono kuyinoza Pasaka. U munhu yuyo, si kowalilizwa hamonga ne wanhu wangu yaye. Hambi nha si yandavizye cilavywa cangu mu cipango cayo. Holeka munhu yuyo kokwidinghulila wulipicizwe wo wubi wakwe mweneco.

¹⁴ “Na hono mujenzi mono mwikalane, nayo yawe yena wuhile wo kuyinoza Pasaka, yimunojeye yayinozeze mu wutyatya wulajilize wayo, hamonga no wityatye wayo wose vyono winha. Hambi u wulajilize wuwo, nha wuli so wanhu wose, kuli wanyawusi sunga na kuli wajenzi.”

Livunde lyo Moto

¹⁵ Na mwizuwa lyono lyakomelwa Lihema lyono Lyelile, likaza livunde likaligubika. Na mu cilo, livunde lyejelaga nha moto sunga wusiku wukela.

¹⁶ Na vyo lyejelaga nhondo zose livunde, lyagubikaga Lihema ku misi, na ku cilo lyejelaga nha moto.

¹⁷ Na mu cipango co cose cono livunde lilyo lyanyasulwaga hacanyha ye Lihema, nawo Waisilayeli wayimwagulaga nghambi. Na hanhu hono livunde lyemaga, baho nawo ho wayisimyaga nghambi yawo.

¹⁸ Ne wanhu wayimwagulaga nghambi mu wutyatya lilajilizo lyo Muwaha Mulungu du. Na mu wulajilize wakwe, wakayisimya nghambi. Na mu nghango yono livunde lyajendelelaga kwikala hacanyha ye Lihema, nawo vyo wajendelelaga kuwa na cihuliko du kuli Muwaha Mulungu, hamba si wawuka hanhu baho yaye.

¹⁹ Na mu mapango ganji livunde lyekalaga hacanyha ye Lihema sunga vilo vipuluta vinji. Nawo wajendelelaga kuwa mu nghambi yiyo, hamba kuwuka ng'o, nha vyono Muwaha Mulungu yawalajilizaga.

²⁰ Mu mapango ganji livunde lyekalaga hacanyha ye Lihema vilo vicefu du, nawo wajendelela kuwa mu nghambi so lilajilizo lyo Muwaha Mulungu. Kanyhi wasumaga kutuluka no kuwuka baho, so lilajilizo lyo Muwaha Mulungu du.

²¹ Hanji na hanji, livunde lyekalaga baho ku wulawa cinyamihe sunga hakali mitondo du. Ninga yali yiwanojeye nawo watuluce lulo baho du, lono livunde likunyasulwa. Na mu madaha go gose du lono livunde lyanyasulwaga, nawo wakawa wanojeye watuluce.

²² Hamba hono yisole vilo vyejete, hamba lunji mwezi monga, hamba lunji mwaka monga. Yikawa du nha vyono livunde lyojendelela kwikala hacanyha ye Lihema, nawo si watulukaga yaye, na lono livunde lyanyasulwaga, nawo watulukaga.

²³ Wayisimyaga nghambi yawo, no kuyimwagula mu nzila yo wibata malajilizo gono Muwaha Mulungu yawalajiliziza muli Musa.