Wuwale 8 - Luganuzi Luswanu Kuli Wanhu Wose 2002

Wuwikwe we zitala

¹ Muwaha Mulungu yakamulonjela Musa yakatya,

² “Mulonjelaje Haluni, vyono, mu cipango cono kowa yeza kuziwicila zitala mupunghati mu wuwiko wayo, yakumbucile yaziwicile mu nzila yono zowa kumulika lubavu lwa kumwande.”

³ Nayo Haluni yakawa na cihuliko, yakawa kuziwika zitala zikalanga ku mwande yo wuwiko wayo.

⁴ Nawo wuwiko we tala, wose wali mutyane na zahabu nengu, mu cihwani cono Muwaha Mulungu yamulajiliza Musa.

U wezwe no wusiwanulwe we Walawi

⁵ Muwaha Mulungu yakamulonjela Musa yakatya,

⁶ “Ale wawagulaje i Walawi muli Waisilayeli, kanyhi, wuweze.

⁷ Nagwe wuwezeze mu nzila ayi: Wuwamizize malenga go wilamule, wuwalonjele wecete mu miwili yawo mose, wakanze ne myenda yawo. Nawo wowa wezwa.

⁸ Hanyuma walete nzeku yono yikali ndodo ndodo, hamonga ne cilavywa cono cikusakwa co wusaje wono wunamuce, weze wusaje wono wuhanjile ne mafuta. Nagwe wulete nzeku yinji kanyhi so cilavywa co wubi.

⁹ Hanyuma wuwakonghole hamonga i mhuga yose ye Waisilayeli. Ho wuwawagule Walawi, wuwawice weme ku mwande ye Lihema lyono Lyelile.

¹⁰ Hanyuma i Waisilayeli, wayijelece miwoko yawo mu mitwe ye Walawi.

¹¹ Nayo Haluni ho yawe kuwalavya Walawi wawe cilavywa hali Muwaha Mulungu, cisinjiswe mu wulawa mu Waisilayeli, ho wanyitumamile.

¹² Hanyuma kanyhi Waisilayeli ho wayijelece miwoko yawo mu mitwe ya zizo zi nzeku zi nyejete. Nzeku monga ho yiwe so cilavywa co wubi. Nayo ye kejete yiwe so cilavywa cinyanywe kuli Muwaha Mulungu, wuwanozeze Walawi wilamule.

¹³ “Wawalavye Walawi wawe cilavywa cisinjiswe kuli'ne. Wuwawice Haluni hamonga ne wanagwe, wawe wo walanjilizi wawo.

¹⁴ Nagwe wuwawagulilaje Walawi muli Waisilayeli mu nzila yiyi, ho wawe wanhu wangu.

¹⁵ Nagwe kolo wakondya kuweza Walawi, no kuwalavya cilavywa cisinjiswe kuli 'ne, nhondo ho wowa weza wakwiliye, mu wituma mulimo wangu, wa mwi Hema lyono Lyelile.

¹⁶ Nane nghondya kuwanoza wahalile hanhu ha wana walongozi kulelwa we Waisilayeli. Holeka awa weza wangu du nene no mweneco.

¹⁷ Hambi lono nawawulajila iwana wose walongozi kulelwa we Wamisili, nha ho nawasiwanulila wawe wo wana wangu wo wudagwe, nha cinji walongozi kulelwa wa mu zimhuga zose ze Waisilayeli, sunga na mu zinyana zinongozi kulelwa ze mitugo.

¹⁸ Ninga aluno, nghuwasola wawano Walawi, ho wahalile i hanhu ha wana wose we Waisilayeli i walongozi kulelwa.

¹⁹ Nane nghuwawika wawa Walawi mu miwoko ya Haluni hamonga ne wanagwe, wawe nha cipegwa cono cilawile kuli Waisilayeli, ho wetume mulimo wa mwi Hema lyono Lyelile ku soko ye wanhu wa Isilayeli, no kuwanozeza wilamule. Ho wawadime Waisilayeli, ku wulawa mu matamwa ge cimali, gono gosuma kuwaziza Waisilayeli, hono wejelele wasejelele behi ne Hanhu hono helile.”

²⁰ Hobaho, Musa na Haluni, hamonga ne wanhu Waisilayeli, wakawa kuwasiwanula Walawi, nha vyono Muwaha Mulungu yamulajiliza Musa.

²¹ Nawo Walawi wakawa kwiyeza weneco mu wubi wawo, wakawa kuyikanza ne myenda yawo. Nayo Haluni yakawa kuwalavya wawe cilavywa cisinjiswe hali Muwaha Mulungu. Hanyuma yakawa kuwanozeza wilamule so wezwe wawo.

²² Nawo wanhu wakanoza zose, nha vyono Muwaha Mulungu yamulajiliza Musa kuli za wawo Walawi. Na mu nzila yiyo, Walawi wakawa wakondya kukwilanizwa so wituma mulimo mwi Hema lyono Lyelile, mu wulanjilizi wa Haluni hamonga ne wanagwe.

²³ Muwaha Mulungu yakamulonjela Musa yakatya,

²⁴ “Mu Walawi wose, u munhu mono kowa yakondya kuficila myaka makumi mejete na mihano, yuyo yo kosuma kwinjila mu wilecele wo wituma mulimo wa mwi Hema lyangu lyono Lyelile.

²⁵ Nayo munhu yuyo, yimunojeye yalece kujendelela no mulimo wuwo kolo yaficila lizika lya myaka makumi mahano.

²⁶ Ninga hamba nhavivyo kosuma kujendelela kuwatazataza wayagwe Walawi, mu milimo yawo ya mwi Hema lyono Lyelile. Ninga si yinojeye mwene yalongoze wuhembi wowose mweneco yali wene du. Nagwe nhavivi, vyo kosuma kuyilanjilila milimo ye Walawi.”