Wuwale 6 - Luganuzi Luswanu Kuli Wanhu Wose 2002

Wulajilize wa kuli zo Wunazili

¹ Muwaha Mulungu yakamulonjela Musa,

² “Yawalonjele wanhu Waisilayeli wulajilize wuwu. Hono munhu wo wose mulume hamba mucekulu, yelahize yawe Munazili, yelavye mweneco kuli Muwaha Mulungu,

³ hodu munhu yuyo yalecele lukulu kung'wa wujimbi hamba divayi. Yalecele lukulu kung'wa cing'wegwa cono cinozigwe mu wulawa mu zabibu, hamba kulya zabibu zono zinyazigwe, hamba zono si zinyazigwe.

⁴ Na mu vilo vyakwe vyose vyono kojendelela kuwa Munazili, yalecele lukulu kulya cinhu cocose cono cikulawa mu zabibu, hamba zimhece zayo, hamba mabada gayo.

⁵ “Na mu vilo vyakwe vyose vyono kowa yakali mu wilahize wo kuwa Munazili, yalece kunyonyola zimvwili zakwe, hamba kuziceta yaye. Hambi mwene, nha muwopwe no wilahize mu mapango gose, lono yakali yesiwanuliye kuli Muwaha Mulungu. Holeka yajendelele kuzileka zimvwili zakwe ziwiluce, hamonga ne zindevu zakwe.

⁶ Hambi zimvwili zakwe, nha co citanjilo co wisiwanulile wakwe, kuli Muwaha Mulungu.

⁷ Holeka munhu we liwala lilyo, si yimunojeye yeyavufye so wusejelela hono howuli muvimba, hamba wuwe muvimba wo sogwe mulezi, hamba wo nyina, hamba wo lumbulye, hamba wo muwahawe, hamba wo mwanakwawe.

⁸ Hambi i vilo vyose vyono yakali Munazili nha musiwanulilwe kuli Muwaha Mulungu.

⁹ “Ne zimvwili zo Munazili zono siwanulwe, hono zavufywe no munhu yunji mono yafwiye musunho behi nayo, nayo ho yeyitipize mutwe wakwe wo wisiwanule wakwe so wufwe wo musunho wo munhu yuyo, ale, yowa yimunojeye yalindile sunga vilo mupunghati vipulute, hanyuma yazinyonyole zimvwili zakwe, yacete ne zindevu zakwe. Nayo ho kowa yezwa yakondya.

¹⁰ Na mwi'zuwa lyo munana, yalete nghunda, hamba nziwa nyejete kuli mukohani, ha mulango we Lihema lyono Lyelile.

¹¹ Nayo mukohani yayilavye nziwa hamba nghunda, monga yiwe cilavywa co wubi, ne nzagwe yiwe cilavywa cinyanywe, yamunozeze wilamule so wubi wakwe wo kwibata muvimba. Na mwi'zuwa lilyo du, u munhu yuyo yazisiwanule kanyhi zimvwili zakwe,

¹² kanyhi yesiwanulile mweneco kuli Muwaha Mulungu, yawe Munazili mu vilo vyakwe vyose. Ninga i vilo vyakwe vya kunyuma, vyono yali Munazili, si vyowalwa kanyhi, vyono zimvwili zakwe zono zali siwanulwe, nha zali zakondya kuhodanjika. Kanyhi yimunojeye yalete nyana ye ngholo ya mwaka monga yiwe so cilavywa co wusutye.

¹³ “Nayo Munazili kolo yakondya kumala vilo vyakwe vyo wisiwanule wakwe, ale, yanoze wuhembi. Yimunojeye yabite ha mulango we Lihema lyono Lyelile,

¹⁴ yamulavizye Muwaha Mulungu mitugo midatu, nhelevu, zono zisina cilema co cose. Yalete nyana nume monga, ya ngholo ya mwaka monga, yiwe so cilavywa cinyanywe, na nyana nyhekulu monga ya ngholo ya mwaka monga, yiwe so cilavywa co wubi. Hamonga na nduwilu monga ya mwaka monga, yiwe so cilavywa co mulamu.

¹⁵ Kanyhi yalavye nhoto monga ya mikate yono yisina cisase, ne maandazi gono gatiwigwe hamonga ne mafuta, na capati zono njidile mafuta, ne vilavywa vyono vikusakwa vyo wusaje hamonga ne divayi.

¹⁶ “Nayo mukohani yavilavye vivi vyose kuli Muwaha Mulungu, yalavye ne cilavywa co wubi, hamonga ne cilavywa cinyanywe.

¹⁷ Mukohani yamulavizye Muwaha Mulungu likumbiko lya nduwilu, yiwe cilavywa co mulamu. Nayo yayilavye hamonga ne nhoto ye mikate yono yisina cisase. Kanyhi yalavye hamonga ne cilavywa co wusaje ne divayi.

¹⁸ Nayo Munazili, lono yali baho ha mulango we Lihema, yazinyonyole zimvwili zakwe zose, yazigumile mucanyha yo moto wono wuli mwi'vungu mono cikunyanyilwa cilavywa co mulamu.

¹⁹ “Na kolo ciwoko ce nduwilu catelekwa cakondya kupya, mukohani yacisole no mukate monga mu nhoto, wono wusina cisase, na capati monga, yawe kumwibatiza yuyo Munazili mu mawoko gakwe.

²⁰ Hanyuma mukohani yawe kuvisinjisa hali Muwaha Mulungu, ciwe cilavywa cisinjiswe hali Muwaha Mulungu. Navyo vikuwa vilavywa vyono visiwanuliywe mukohani, hamonga ne nyama ye ng'hwa nyumvywe, hamonga ne cima cimonga ce nduwilu cinulwe, cono mu wulajilize, yo ling'ani yapegwe mukohani. Nazo kolo zakondya zizo, hodu Munazili kosuma kung'wa divayi.

²¹ Nago gaga go malajilizo ga kuli Wanazili. Na hono munhu Munazili yehuwize kulavya cilavywa, kuciza vyono wukusakwa wihuwize wakwe yalavye, ale, yowa yimunojeye yawufisilize du wihuwizo wakwe nha vyono yehuwize.”

Wulugutize wono wunojeye Wakohani wawalugutize wanhu

²² Muwaha Mulungu yakamulajiliza Musa yakatya,

²³ “Wumulonjele Haluni hamonga ne wanagwe wutye, lono wakuwalugutiza, wanhu Waisilayeli, wanojeye wetumamile zinghani azino wawe kutya,

²⁴ ‘Muwaha Mulungu yakulugutize, no kukukamisa

²⁵ Muwaha Mulungu yakubulilile no wuzelu wo wusu wakwe, kanyhi yawe muswanu kuli'gwe.

²⁶ Muwaha Mulungu yakuwonele lusungu yakupele mulamu.’ ”

²⁷ Nayo Muwaha Mulungu yakatya, “Hono waliwice litagwa lyangu kuli Waisilayeli. Ale nane nowalugutiza.”