Wuwale 5 - Luganuzi Luswanu Kuli Wanhu Wose 2002

Kuli ze wanhu i wavufywe

¹ Muwaha Mulungu yakamulonjela Musa yakatya,

² “Wuwalonjele Waisilayeli vyono, munhu wo wose mono kowa yatuga wutamwa wo wukoma, munhu yuyo yimunojeye yawuce mu nghambi yeleje mu wayagwe. Hamba mono yakulavya wufila mu muwili wakwe, hamba mono yapamize muvimba.

³ I wanhu wose we liwala lilyo wono weyavufye, wunojeye wuwakome, wuwategule kunze ye nghambi, ho walece kuyihodanga nghambi, mono nikaye 'ne, hamonga ne wanhu wangu.”

⁴ Nawo Waisilayeli wakawa na cihuliko, wakawa kuwawusa wose mu nghambi nha vyono Muwaha Mulungu yamulajiliza Musa.

Vilavywa so wusutye

⁵ Muwaha Mulungu yakamulajiliza Musa,

⁶ “Yawalonjele Waisilayeli, vyono, Hono munhu wo wose yawe si mwihuwilwa kuli Muwaha Mulungu, ho yamusutizye muyagwe,

⁷ ale, u munhu yuyo yowa yimunojeye yanene wubi wakwe, kanyhi yalavye kuli munhu yuyo mono yamusutizye, wulavye wono wukwiliye hamonga no wonjeleze wa mekumi mejete kwe 'gana.

⁸ Na hono lunji munhu yuyo mono kasutizywa yawe yafwiza, na kuno yawe yasina ndugu we behi, mono kusuma kubocela cilavywa cico co wusutye, hodu cilavywa cico, cosuma kulavywa kuli Muwaha Mulungu, ciwe so wakohani. Ne cilavywa ci cino co wusutye, cikuwalilizwa hamonga ne nduwilu yono yitumamiywe so wilamule wo munhu yuyo musutyi.

⁹ Kanyhi sunga ne vilavywa vyose vyo winulwe, vyono Waisilayeli wakulavya kuli Muwaha Mulungu, vyowa sawo yo mukohani mono wakumulavizya.

¹⁰ No mukohani wowose kosuma kusola mweneco i vilavywa vyono wakumulavizya.”

Kuli ze walume, wono si wawetumbiye wagolece zawo

¹¹ Muwaha Mulungu yakamulajiliza Musa,

¹² “Yawalonjele wanhu Waisilayeli wityatye wuwu. Vyono, lunji munhu si yamwitumbiye mugolece wakwe, yawe yakumuwona nha si mwihuwilwa kuli mwene.

¹³ Kanyhi yawe kumwihweseza nha vyono lunji yakondya kwiyavufya so wugona no mulume yunji, ninga kanyhi akuno u mulume wakwe, yawe si yamanyiye lukulu. Holeka ku soko ye cevu co mugolece wakwe, cinojele mulume yuyo, yekale nazo du, ziwe za cinyele mu nhumbula yakwe. Hambi nha zisina wuhomelezi wo wose, no mugolece nayo nha si yebatwe mwitumo lilyo.

¹⁴ Na lunji, u mulume kawa yena mahwele no mugolece wakwe, ninga kumbe nayo mugolece wakwe vyo mwihuwilwa du.

¹⁵ Ale, mu nghani yono yinha yiyi, u mulume yuyo, yowa yimunojeye yamulete mugolece wakwe kuli mukohani. Kanyhi yaleteleze hamonga ne cilavywa cono cosakwa, ca wusaje wa shayili, kilo monga, wono si mujidile mafuta, hamba wuvumba. Hambi aco nha cilavywa cono cikulavywa ku wulawa ko mulume, mono yena wivu we maganigani mabi kuli mugolece wakwe. Naco cilavywa cico, cikulavywa, i mbeka ho yiwe calinze.

¹⁶ “Nayo mukohani yamusejeleze yuyo mucekulu, yeme ha mwande ye cikumbicilo.

¹⁷ Hanyuma mukohani yasole malenga gono gelile, yagatajile mu ciya ce lilongo, hanyuma kanyhi yasole manghundi, gono gali baho hasi, mugati ye Lihema lyono Lyelile, yagatajile mumo mu malenga, ne malenga gago nago, gokalipa.

¹⁸ Hanyuma mukohani yamudalangule zimvwili mucekulu yuyo. Mukohani yasole wusaje wu wulya we cilavywa, yamupele mucekulu yawudinghule mu mawoko gakwe. Nayo mukohani yebate ciya ce lilongo, cono cina malenga gagalya makali, gono gakusuma kumuletela munhu wulijitwe.

¹⁹ Hanyuma mukohani yamwilahize yuyo mucekulu ko wilahize awuno yatye, ‘Hono yiwe mbeka si witumile nghani yiyo yo wusenyha, i malenga gaga go kulijitila, si gosuma kukuletela wulijitwe.

²⁰ Ninga hono wuwe kwituma nghani yiyi yo wusenyha,

²¹ ale, Muwaha Mulungu yakunoze wuwe mulijitwe muli wanhu wako. Kanyhi Muwaha Mulungu yakunoze cipwi cako ciwombe, ne 'nda yako yitumbe.

²² Ne malenga gagano, genjile mu'nda yako, gayitumvye, ne cipwi cako ciwombe.’ Nayo mucekulu yuyo yavumize yatye, ‘Heya nghuvumila. Muwaha Mulungu yanhendele nhavivyo.’

²³ “Hanyuma mukohani yagandice malijito gaga mu citabu, yawe kugazuguza mandiko gago no kugasuluziza mu ciya ce lilongo mu malenga makali.

²⁴ Na lono mukohani yakali namung'wesa yuyo mucekulu, malenga gago makali, gono gomuletela wusungu wukali,

²⁵ mukohani yamule yawusole wusaje we cilavywa co wivu ku wulawa mu mawoko go mucekulu, yawusinjise hali Muwaha Mulungu, yawe kuwuleta ha cikumbicilo.

²⁶ Yawe kunega yiganza limonga lyo wusaje wuwo, wuwe nha citanjilo ce cilavywa, yawe kuwukongoga mu cikumbicilo. Nayo kolo yazikondya zizo, ho yawe kumung'wesa mucekulu yuyo malenga gago makali.

²⁷ Na hono yiwe mbeka mucekulu yuyo ketuma zo wusenyha, i malenga gago gomupela wusungu wukali muno muno mu 'nda yakwe, ne 'nda yakwe yotumba, ne cipwi cakwe cowomba, nayo kowa wulijite muli wanhu wakwe.

²⁸ Ninga hono yiwe mbeka si yazitumile zizo zo wusenyha, si kosuma kutuga mbali yo yose, kosuma du no kulela wana.

²⁹ “Ale, alino lyo lilajilizo lya kuli zinghani ze liwala lilyo, lono mulume yawe yali wivu, mwenda maganigani mabi kuli mugolece wakwe, no kumwihweseza vyono kagona no mulume yunji.

³⁰ U mucekulu yuyo yaletwe yeme ha cikumbicilo, nayo mukohani konoza wityatye wuwu wo wuhembi.

³¹ Ninga u mulume wakwe, kowa yasina nghani yaye. Langa u mucekulu hono yawe musutyi, kokwidinghulila wulipicizwe wakwe, mweneco.”