Wuwale 34 - Luganuzi Luswanu Kuli Wanhu Wose 2002

I mipaka ye yisi

¹ Muwaha Mulungu yakamulonjela Musa

² wulajilize awuno so Waisilayeli yakatya, “Kolo mweza kwinjila mu yisi yono nghumupelenyi, yisi ya Kanani, ale, mipaka ye yisi yenyu yowa nhavi:

³ Ku lubavu lwa kutakama, mupaka wowa mugazi wulawiliye mu nyika ya Zini, mu mupaka wa Edomu. Nawo wokwanziza ku lubavu lwe ndumilizo ya kutakama, ye lilenga lyo mwino kucilima yayo.

⁴ Hanyuma wojendelela sunga ko ku lubavu lwa kutakama ku wubita ku Akelabimu Pasi, nawo wojendelela wukole mu Zini ku lubavu lwa kutakama ye Kadeshi Balineya. Hanyuma kanyhi, mupaka wojendelela sunga ko ku lubavu lwe mwezi ye sumuka ku Hazali Adali, nawo wobita sunga ko ku Azimoni,

⁵ hanyuma ho wokunga wulanje kwi'lolo, ku mupaka wa Misili, nawo wodumiliziza mwi'lenga lya Meditelaneya.

⁶ “Holeka mupaka wo lubavu lwa kumwezi, wowa lilenga lya Meditelaneya.

⁷ Nawo mupaka wo lubavu lwa kusumuka, awo wowa wugolocile du ku wulawa lilenga lya Meditelaneya sunga ko kwi'tunda lya Holi.

⁸ Na ku wulawa baho, wojendelela sunga ko ku Hamati Pasi. Kanyhi wojendelela sunga ko ku Zedadi,

⁹ sunga ku Zifoloni, nawo wodumiliziza ku Hazali Enani.

¹⁰ “Nawo mupaka wa ku lubavu lwa kucilima, wowa wugolocile du, ku wulawa Hazali Enani sunga ko ku Shefamu.

¹¹ Hanyuma wojendelela sunga ko kutakama ku Halibeli, kucilima ye Ayini, sunga mu matunda, ku mhwani ya kucilima ye lilamba lya Galilaya.

¹² Hanyuma kanyhi wojendelela sunga kutakama kwi'kolongo lya Yoludani sunga kwi'lenga lyo mwino. “Nayo mipaka yiyi, yowa mipaka mine ye yisi yenyu.”

¹³ Nayo Musa yakawa kuwaloloseza zizi Waisilayeli yakutya, “Ayi yo yisi yono mosuma kugawana mu nzila yo kutowa kula, yisi yono Muwaha Mulungu yakondya kuyilavya ho yiwe so we milango yenyu yicenda na nusu.

¹⁴ Hambi i we milango ya Lubeni na ya Gadi, hamonga ne nusu ya wo mulango wa Manase, wono wali ku lubavu lwa kucilima, awo wose nha wakondya kulituga ligawo lyawo, nawo wakagawilwa mu nghango yo winji wa mu zimhuga zawo,

¹⁵ ku lubavu lwa kucilima ye likolongo lya Yoludani, vidome na Yeliko.”

I walongola wono wapegwa mulimo wo kuyigawa yisi

¹⁶ Muwaha Mulungu yakamulonjela Musa yakatya,

¹⁷ “Eleyezali mukohani, hamonga na Yoshuwa u mwana wa Nuni, wawo wo wetumaje mulimo wuwo wo kuwagawila wanhu yisi.

¹⁸ Kanyhi wuhagule wanhu wanji monga monga mu wulawa mu milango yose nha vyono yinha, ho wawataze mu mulimo wuwu wo wugawa yisi.”

¹⁹ Nawo wanhu wono Muwaha Mulungu yawahagula so mulimo wuwo, wowano: Wo mulango wa Yuda, Kalebi mwana wa Yefune.

²⁰ Wo mulango wa Simiyoni, Shelumiyeli u mwana wa Amihudi.

²¹ Wo mulango wa Benyamini, Elidadi u mwana wa Cisiloni.

²² Wo mulango wa Dani, Buki u mwana wa Yogili.

²³ Wo mulango wa Manase, Haniyeli, umwana wa Efodi.

²⁴ Wo mulango wa Efulayimu, Kemuyeli u mwana wa Shifatani.

²⁵ Wo mulango wa Zabuloni, Zelizafani u mwana Palinaki.

²⁶ Wo mulango wa Isakali, Pelitiyeli u mwana wa Azani.

²⁷ Wo mulango wa Asheli, Abihudi u mwana wa Shelomi.

²⁸ Wo mulango wa Nafutali, Pedaheli u mwana wa Amihudi.

²⁹ Wawa wo wanhu wono Muwaha Mulungu yawahagula, wetume mulimo wo kugawa yisi kuli wanhu wa Isilayeli, mu yisi ya Kanani.