Wuwale 31 - Luganuzi Luswanu Kuli Wanhu Wose 2002

U wulugu wono welile kuli Wamidiyani

¹ Muwaha Mulungu yakamulonjela Musa yakatya,

² “Walipicizaje Wamidiyani ku soko ya zono wawatendeye wanhu Waisilayeli. Na kolo wakondya kuzituma zizi, nagwe nhondo ho wuwe kufwa.”

³ Nayo Musa yakawa kuwalonjela wanhu yakatya, “Ale, mwiwikanizaje so wulugu, ho musume kuwahoma Wamidiyani, muwalipicize ku soko ye zinghani zono wamutendela Muwaha Mulungu.

⁴ Holeka nghumulombenyi muwikanize wanhu walume, mu wulawa mu milango yenyu yose, wono wobita ku wulugu. Na mu mulango monga, walawe wanhu elufu monga.”

⁵ Hobaho wakawa kuwahagula wanhu walume elufu monga monga mu wulawa mu milango yawo yose, wakawa kuwawikaniza ho wabite ku wulugu.

⁶ Nayo Musa yakawa kuwasola, yakawa kuwategula ku wihomi, hasi yo wulanjilizi wa Finehasi u mwana wa Eleyezali u mukohani, mono yali yo mulanjilizi we viya vyose vyono vyelile, hamonga ne zindulele zono wetumamilaga so kuwasugula nha vyono zinha.

⁷ Hodu, wakawa kuwahoma Wamidiyani, nha vyono Muwaha Mulungu yamulajiliza Musa, nawo wakawawulaga wanhu wose we cilume,

⁸ hamonga ne watemi wahano we Wamidiyani, Evi, Lekemu, Zuli, Huli, hamonga na Leba. Wakamuwulaga nhavivilya na Balamu u mwana wa Beyoli.

⁹ Wanhu Waisilayeli, wakawasola mateka i wacekulu wose we Cimidiyani, hamonga ne wana wawo wose. Wakazisola ne zing'ombe, hamonga ne matewa gawo gose, wakazisola ne zisawo zawo zose.

¹⁰ Hanyuma wakawa kugapembela moto ne makaya gawo hamonga ne zinghambi zawo.

¹¹ Hodu wakawa kuvikunza vinhu vyose vyono wali waviteka, hamonga ne wafungwa, ne mitugo zose.

¹² Wakawa kuvileta vinhu vyose kuli Musa, na Eleyezali, na kuli mhuga yose ye Waisilayeli, lono wali wali mu nghambi zawo mu yisi yo wuhihi ya Mowabu, ku nhumbi ye likolongo lya Yoludani ku wulawa Yeliko.

Wasilikale wo wulugu wakuwuya

¹³ Nayo Musa na Eleyezali hamonga ne walongola we mhuga yose ye wanhu, wakawa kubita kunze ye nghambi kuwahinjiliza wasilikale wo wulugu.

¹⁴ Nayo Musa yakawa kuwakolelwa yikuwo muno muno i wawaha walongola we vipuga vipuga vye wasilikale, wono wawuya ku wulawa ku wulugu.

¹⁵ Yakawawuza yakatya, “Alu nye, nhawule muwaleka i wacekulu womi?

¹⁶ Ninga mukumbucile vyono wo wawa wacekulu wono wagatyatya mafundo ga Balamu, sunga wakawa kuwakwega wanhu wamubedegale Muwaha Mulungu. Na yiyi yikawa yo soko yono yikaleka lihuhuji likawaziza i wanhu wo Mulungu.

¹⁷ Holeka luno, muwawulagaje i wacekulu wose hamonga ne wazelelo wose wono wakondya kuzimanya zinghani ze ligona.

¹⁸ Ninga langa, mwisigazize nyo weneco i wahinza wose wono wakali namanya walume.

¹⁹ Ninga kanyhi hamba nhavivyo, anye wose, mono kowa yawulaje munhu wo wose, hamba lunji kapamiza muvimba, yowa yimunojeye yekale kunze ye nghambi vilo mupunghati. Na mwizuwa lye kadatu, na mwizuwa lyo mupunghati, mwiyeze nyo weneco hamonga ne wacekulu wono muwatecile.

²⁰ Kanyhi mowa munojeye muyeze ne myenda yenyu yose, sunga ne myenda yono mihonwe ko wukunzeje we zinguwo ze zimhene, sunga ne vinhu vyose vyono vinozwe kwe mabici.”

²¹ Nayo Eleyezali u mukohani, yakawalonjela wanhu walume wono walawa ku wulugu yakawatya, “Awu wo wulajilize wono Muwaha Mulungu yamulajiliza Musa.

²² Cinhu co cose cono si cosuma kutakamila mu moto, nha vyono yinha zahabu, fweza, shaba, cuma, hambe 'bati,

²³ hamba lisasi, vivyo vinojeye vikozwe mu moto ho viwe vyezwa. Ninga i vinji vyose vinojeye vyezwe kwe malenga, holeka viwe vyezwa.

²⁴ Na mwi'zuwa lyo mupunghati, mokanza myenda yenyu, nanye mowa mwezwa, hanyuma nhondo ho mosuma kukombolwa mwinjile mu nghambi.”

Wugawane we mateka

²⁵ Muwaha Mulungu yakamulonjela Musa yakatya,

²⁶ “Agwe na Eleyezali u mukohani, hamonga ne walongola wose we mhuga, muviwale vinhu vyose vyono muvitecile ku wulugu, hamonga ne wafungwa, ne mitugo zose.

²⁷ Muvigawe mafungu mejete, lifungu limonga liwe lye wasilikale, ne lifungu liyagwe, liwe lye mhuga yose ye wanhu.

²⁸ Ninga mwifungu lyono lyowa lyo lye wasilikale, musole kodi ku so Muwaha Mulungu. Mweze kusola cinhu cimonga cimonga mu makumi mahano mahano, ku wulawa mu wafungwa, mitugo, ndogowe, ngholo, sunga ne zimhene.

²⁹ Ne vinhu vivyo vyose, mumupele Eleyezali u mukohani, viwe vilavywa kuli Muwaha Mulungu.

³⁰ Na mwi'fungu lyono muwapelile mhuga yose ye wanhu, namo mumo, musole cinhu cimonga cimonga mu makumi mahano mahano, ku wulawa mu wafungwa, mitugo, ndogowe, ngholo, sunga ne zimhene. Ne vinhu vivi vyose, muwapele Walawi wono wena mulimo wo kulilanjilila Lihema lyo Muwaha Mulungu.”

³¹ Nayo Musa na Eleyezali u mukohani, waketuma nha vyono Muwaha Mulungu yalajiliza.

³² Na alino lyo liwalo lye vinhu vyono wasilikale waviteka, hamonga ne vinhu vyono wasolaga weneco. Ngholo hamonga ne zimhene, magana mutandatu na makumi mupunghati na yihano elufu.

³³ Ng'ombe, makumi mupunghati na nyejete elufu.

³⁴ Ndogowe, makumi mutandatu na monga elufu.

³⁵ Ne wacekulu, wono wali wakali namanya walume, wali wali makumi madatu na nyejete elufu.

³⁶ Ne nusu yono wasola wasilikale, yali yificile mhene magana madatu na makumi madatu na mupunghati elufu, na ngholo magana mahano.

³⁷ Nazo ze magana mutandatu na makumi mupunghati na yihano, zo zasolwa zikawa zo kodi yo Muwaha Mulungu.

³⁸ Ng'ombe, makumi madatu na mutandatu elufu. Ze makumi mupunghati na nyejete zikawa yo kodi yo Muwaha Mulungu.

³⁹ Nazo zindogowe, zali zili makumi madatu, elufu, na magana mahano. Na muli zizo, zikasolwa makumi mutandatu na monga, zikawa yo kodi yo Muwaha Mulungu.

⁴⁰ Nawo wacekulu wono wali wakali namanya walume, wono wagawilwa i wasilikale, wali waficile wacekulu yikumi na mutandatu elufu. Na muli wawo, wakasolwa wacekulu makumi madatu na wejete, wakawa yo kodi yo Muwaha Mulungu.

⁴¹ Nayo Musa, yakamupela Eleyezali u mukohani vinhu vivyo vyose vye kodi, i cilavywa cinulwa kuli Muwaha Mulungu, nha vyono Muwaha Mulungu yamulajiliza Musa.

⁴² Ne ligawo lye mhuga ye wanhu wose, lyali viling'aniye u winji wayo, ne ligawo lyono wagawilwa wasilikale,

⁴³ nazo zali nhavi: Ngholo hamonga ne zimhene zali zili magana madatu na makumi madatu na mupunghati elufu, na magana mahano.

⁴⁴ Nazo ng'ombe, zali zili makumi madatu na mutandatu elufu.

⁴⁵ Ndogowe, nazo zali zili makumi madatu elufu na magana mahano.

⁴⁶ I wacekulu wono wali wakali namanya walume, nawo wali waficile yikumi na mutandatu elufu.

⁴⁷ Na mwi'fungu lili nalyo, Musa yakasola cinhu cimonga cimonga mu wulawa mu vinhu makumi mahano mahano, mu wulawa mu wanhu, na mu mitugo. Musa yakawa kuwapela Walawi wono wali wo wetuma mulimo wo wulanjilizi we Lihema lyo Muwaha Mulungu, nha vyono Muwaha Mulungu yali yamulajilize Musa.

⁴⁸ Hanyuma nawo wono wali walongola we vipuga vipuga vye wasilikale, wakamubitila Musa

⁴⁹ wakamulonjela wakutya, “Gwe muwaha, ase cakondya kunoza liwalo lye wasilikale wose wono wali wali hasi yo wulanjilizi wetu, nase ciwona vyono, hasina hamba monga mono yajiliye.

⁵⁰ Holeka nase luno, cikukuletela i vinhu vyono nase cavisola yumonga yumonga muli sese. Navyo vyovino: Wihambo wa zahabu, wudodi, bangili, nyamwidole ze vitanjilo, viheleni, hamonga ne mikufu. Nase cikumulavizya Muwaha Mulungu, cinoze wilamule nayo so wumi wetu. Ho yajendelele kucidima mu mikalile yetu.”

⁵¹ Musa hamonga na Eleyezali u mukohani, wakawa kuyibocela zahabu, hamonga ne vinhu vyose vyo wihambo.

⁵² Ne vilavywa vyose hamonga vyono wawo wawaha walongola wavileta, vyali vina wuzito wa behi ya kilo magana mejete.

⁵³ Ninga awalya wono wali wo si wawaha walongola, awo wakekala navyo du i vinhu vyono wali waviteka.

⁵⁴ Hodu nayo Musa na Eleyezali u mukohani, wakawa kuyisola zahabu yose wakawa kuyitegula mwi Hema. Muwaha Mulungu ho yawadime i Waisilayeli.