Wuwale 30 - Luganuzi Luswanu Kuli Wanhu Wose 2002

Wulajilize wa kuli zo wilahize

¹ Nayo Musa, yakawaloloseza walongola we milango ye Waisilayeli, wityatye wono wanojeye wawutyatye, kuli zo wilahize, yakawatya,

² “Hono munhu yelahize vyono komulavizya Muwaha Mulungu cinhu cinji, hamba hono yelahize wilahize wo kwiyimila cinhu cinji, yanojeye yelanjilile yalece kubena wihuwize wakwe. Langa yowa yimunojeye yawufisilize du, nha vyono yali yakondya kwihuwiza, vyono kokwituma nghani yiyo.

³ “Na hono mwana we cicekulu, mono yakali yali mukaya mo sogwe, hono yelahize vyono komulavizya cinji Muwaha Mulungu, hamba yehuwize kwiyimila cinhu cinji.

⁴ Ale yowa yimunojeye yetume nha vyono yelahize, hamba vyono yehuwize, langa hono sogwe yalete cimizi kolo yazihulika zizo.

⁵ Na hono sogwe kolo yakuhulika, yamwimile ho yalece kuwufisiliza wilahize wakwe, ale hodu yalece. Muwaha Mulungu komunenela, hambi sogwe nha yo yamwimiye yalece kuwibata wilahize wakwe.

⁶ Na hono mucekulu mutolwe yelahize mweneco du, hamba hono yelahize wula kumanya, hamba hono yehuwize kwiyimila cinhu cinji.

⁷ “Ale u mucekulu yuyo, yowa yimunojeye yazifisilize zose zono yelahize, hamba zono yehuwize, langa mulume wakwe hono yalete cimizi kolo yazihulika.

⁸ Na mulume wakwe hono yamwimile ho yalece kufisiliza wilahize wakwe kolo yazihulika, ale hodu yalece. Nayo Muwaha Mulungu komunenela.

⁹ Nayo mucekulu mufwile, hamba mono yalecigwe, ayo yimunojeye yafisilize du wilahize wakwe wose, wono kokwilahiza, sunga no wihuwize wo kwiyimila cinhu cinji.

¹⁰ “Na hono mucekulu mutolwa yelahize, hamba yehuwize kwiyimila cinhu cinji

¹¹ nayo yowa yimunojeye yafisilize du wilahize wakwe, hamba wihuwize wakwe, langa hono mulume wakwe yalete cimizi kolo yazihulika.

¹² Na hono mulume wakwe kolo yazihulika zizo, ho yamulemeze, hodu yazilekaje. Nayo Muwaha Mulungu komunenela, hambi nha mulume wakwe mono yamwimiye, ho yalece kuwufisiliza wihuwize wakwe.

¹³ Hambi u mulume wakwe, nha yena ling'ani yo kuwukangaza hamba kuwubena wilahize wo wose, hamba wihuwize wo wose wono yawunozize.

¹⁴ Ninga hono mulume wakwe yanyamale twii mwi'zuwa lilyo lyono yazihuliciye zo wilahize wo mugolece wakwe, nayo hamba si yalonjile cinji, hodu mucekulu kosuma kuzifisiliza zose zono yali yelahize, hamba zono yali yehuwize. Hambi mulume wakwe nha si yalavizye cimizi co cose, mwi'zuwa lyono yazihuliciye zizo.

¹⁵ Ninga hanyuma hono mulume kanyhi yabene mweneco wilahize wo mugolece wakwe, ale mulume yuyo kowudinghula mweneco wubi wo mugolece wakwe, hambi nha kalemwa kuwufisiliza wilahize.

¹⁶ Nawo wuwu, wo wulajilize wono Muwaha Mulungu yamulajiliza Musa, na kuli zo wilahize, wono wukunozwa no mucekulu mono si mutolwe mono yali mu nyumba yo sogwe, hamba kuli mucekulu mutolwa.”