Wuwale 29 - Luganuzi Luswanu Kuli Wanhu Wose 2002

I vilavywa vye sikukuu yo mwaka mupya

¹ Na mwi'zuwa lilongozi lya mu mwezi wo mupunghati, mweze kwihanguliza wose so wuhembi. Ninga mulece kwituma mulimo wunji mwi'zuwa lilyo. Na mwizuwa lilyo munojeye mutowe ndulele.

² Kanyhi mulavye ne cilavywa cinyanywe kuli Muwaha Mulungu, ne mhunjile yayo, yikumwendeza Muwaha Mulungu. Mulavye nzeku monga, nduwilu monga, hamonga na nyana za ngholo, nume, mupunghati za mwaka monga, nhelevu zono zisina cilema co cose.

³ Kanyhi mulavye cilavywa cono cikwilaniciye, cilavywa co wusaje wono muhanzahanze ne mafuta. Weze wusaje wa kilo yidatu so nzeku yiyo monga, na kilo nyejete so nduwilu,

⁴ na kilo monga monga so nyana ze zingholo, vyono nyejete.

⁵ Kanyhi mulavye mvulati monga yiwe so cilavywa co wubi. Na mu nzila yiyino, mo komunozezenyi wilamule.

⁶ Mweze kulavya vilavywa vivi hamonga na cilavywa cinyanywe ce nhondo zose, mwi'zuwa lilongozi lyo mwezi, hamonga ne cilavywa cayo co wusaje, hamonga ne cilavywa ce divayi. Ne vilavywa vivino vye ndigwa, vikumwendeza Muwaha Mulungu so mhunjile yayo.

I vilavywa vya mwi'zuwa lyo Wilamule

⁷ Kanyhi, mweze kwihanguliza hamonga, mwizuwa lye likumi lyo mwezi wo mupunghati, so wuhembi. Na mwizuwa lilyo, mulece kulya cinji hamba kwituma mulimo wunji.

⁸ Mumulavizye Muwaha Mulungu cilavywa cinyanywe, hambi mhunjile yayo nha yikumwendeza Muwaha Mulungu. Mweze kumulavizya nzeku monga, nduwilu monga, hamonga ne nyana nume mupunghati za ngholo za mwaka monga, nhelevu zono zisina cilema co cose.

⁹ Mumulavizye cilavywa cono cikwilaniciye ce cilavywa co wusaje wono muhanzahanze ne mafuta, wuwe kilo yidatu so nzeku, na kilo nyejete so nduwilu,

¹⁰ na kilo monga monga so zingholo zose monga monga.

¹¹ Kanyhi mulavye mvulati monga yiwe so cilavywa co wubi, hamonga ne cilavywa co wubi co wilamule, ne cilavywa cinyanywe ce nhondo zose, hamonga ne cilavywa cayo co wusaje ne cilavywa ce divayi.

I vilavywa vye sikukuu ye vibanda

¹² Mweze kwihanguliza hamopnga so wuhembi, mwi'zuwa lye likumi ne'hano lyo mwezi wo mupunghati. Munoze sikukuu yiyi, vilo mupunghati, mu cogopo co Muwaha Mulungu. Na mwi'zuwa lilyo, mulecele lukulu kwituma mulimo wunji.

¹³ Na mwi'zuwa lili lilongozi, munojeye mumulavizye Muwaha Mulungu cilavywa ce ndigwa. Hambi mhunjile yayo nha yikumwendeza muno Muwaha Mulungu, mumulavizye nzeku yikumi ne 'datu, nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose.

¹⁴ Mumulavizye cilavywa cono cikwilaniciye co wusaje wono muhanzahanze ne mafuta, wuwe wusaje wa kilo yidatu yidatu so nzeku zose, kilo nyejete nyejete so nduwilu zose,

¹⁵ na kilo monga monga so ngholo zose, hamonga ne visakwa vye vilavywa vye divayi.

¹⁶ Kanyhi mulavye mvulati monga, yiwe so cilavywa co wubi. Muvilavye vivino, hamonga ne cilavywa cinyanywe ce nhondo zose, ne cilavywa cayo co wusaje ne divayi.

¹⁷ Na mwi'zuwa lye kejete, mulavye nzeku yikumi na nyejete, na nduwilu nyejete, hamonga na nyana za ngholo nume yikumi na yine za mwaka monga, zose nhelevu, zisina cilema co cose.

¹⁸ Mulavye vilavywa vivyo, cilavywa co wusaje ne divayi, so nzeku, na so zinduwilu ne zinyana ze zingholo, hamonga ne vilavywa vyose vyono vikusakwa nha mwi'zuwa lilongozi.

¹⁹ Na mvulati monga ciwe cilavywa co wubi, kuhanga ne cilavywa cinyanywe ce nhondo zose, ne cilavywa co wusaje ne divayi.

²⁰ Na mwi'zuwa lye kadatu, mulavye nzeku yikumi na monga na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose.

²¹ Mulavye vilavywa vivyo hamonga ne divayi so zinzeku, na zo zinduwilu na so zinyana ze zingholo, nha vyono linha liwalo lyazo.

²² Na mvulati monga ciwe cilavywa co wubi, hamonga ne vilavywa vyose vyono vikusakwa, nha mwi'zuwa lilyo lilongozi.

²³ Na mwi'zuwa lye kane, mulavye nzeku yikumi limonga, na nduwilu nyejete, hamonga na nyana za ngholo nume, yikumi na yine za mwaka monga zose nhelevu, zisina cilema co cose.

²⁴ Mulavye vilavywa viyo,

²⁵ hamonga ne vilavywa vinji vyono vikusakwa mwi'zuwa lilyo.

²⁶ Na mwizuwa lye 'hano, mulavye nzeku yicenda, na nduwilu nyejete, hamonga na nyana za ngholo nume, yikumi na yine, za mwaka monga, zose nhelevu, zisina cilema co cose.

²⁷ Mulavye vilavywa vivyo,

²⁸ hamonga ne vilavywa vinji vyono vikusakwa mwizuwa lilyo.

²⁹ Na mwizuwa lyo mutandatu, mulavye nzeku munana, na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema cocose.

³⁰ Mulavye vilavywa vivyo,

³¹ hamonga ne vilavywa vyono vikusakwa mwizuwa lilyo.

³² Na mwizuwa lyo mupunghati, mulavye nzeku mupunghati, na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose.

³³ Mulavye vilavywa vivyo,

³⁴ hamonga ne vilavywa vyono vikusakwa mwizuwa lilyo.

³⁵ Na mwi'zuwa lyo munana, mwikongholele wose hamonga so wuhembi. Na mwi'zuwa lilyo mulecele lukulu kwituma mulimo wunji.

³⁶ Mulavye cilavywa cinyanywe kuli Muwaha Mulungu, yiwe nha cilavywa ce ndigwa kuli Muwaha Mulungu, ne mhunjile yayo yikumwendeza muno. Mumulavizye nzeku monga, na nduwilu monga, hamonga na nyana za ngholo nume, zili mupunghati, nhelevu zisina cilema co cose.

³⁷ Mulavye vilavywa vivyo,

³⁸ hamonga ne vilavywa vinji vyono vikusakwa mwi'zuwa lilyo.

³⁹ Na wuwu wo wityatye wa kuli vilavywa vinyanywe, ne vilavywa vyo wusaje, ne vilavywa vye divayi, hamonga ne vilavywa vyo mulamu, vyono mowa kumunozeza Muwaha Mulungu, mu zisikukuu ze mazuwa gayo mahagulwe. No wityatye wuwu, wowa sunga na kuli vilavywa vyenyu vyono mukulavya, so wufisilize wo wilahize wenyu, hamba mu vilavywa vye lihewa.

⁴⁰ Nayo Musa, yakawa kuwaloloseza wanhu Waisilayeli zose zono Muwaha Mulungu yamulajiliza.