Wuwale 23 - Luganuzi Luswanu Kuli Wanhu Wose 2002

¹ Nayo Balamu yakamulonjela Balaki yakatya, “Nghukulomba, wunzenjele bahano vikumbicilo mupunghati, hanyuma wundetele nghongolo mupunghati na nduwilu mupunghati.”

² Nayo Balaki yaketuma nha vyono yalonjelwa na Balamu. Nawo wose vyono wejete, Balamu na Balaki, wakalavya nghongolo monga monga, ne zinduwilu monga monga mu vikumbicilo vyose.

³ Hanyuma, Balamu yakamulonjela Balaki yakatya, “Balaki 'gwe, ale wime baho ha cilavywa cako cinyanywe, lono nane nghali kubita nghamanye, hono Muwaha Mulungu konyiziza hamba ng'o.” Ninga nane nokulonjela du zose zono mwene kononjela. Hobaho yakawa kubita kucanyha ye litunda yali wene.

⁴ Nayo Mulungu vikawa kwitang'anila nayo kuko. Balamu yakamulonjela Mulungu yakatya, “Ane nazenga nakondya vikumbicilo vili mupunghati, kanyhi nakondya no kulavya nghongolo monga monga, hamonga na nduwilu monga monga mu vikumbicilo vyose.”

⁵ Muwaha Mulungu yakamulonjela Balamu zose zono yanojeye yakazilonje. Yakawa kumukombola yabite kuli Balaki yakamulonjele zono yamulonjeye yalonje.

⁶ Nayo Balamu yakawa kuwuya kuli Balaki, yakamwagana Balaki yakali vyo yemile bahalya du ha cilavywa cakwe cinyanywe, yali hamonga ne walongola we Wamowabi.

⁷ Hobaho Balamu yakawa kwanza kuzilonga zo wuwile wakwe yakutya, “Balaki u mutemi we Wamowabi kanyhema, ku wulawilila ku Siliya, mu matunda ga kucilima, Kanyitya, ‘Wuze wundijitile Waisilayeli.’

⁸ Alu nosuma kuwalijita wule, wono Mulungu yakondya kuwaluguta. Hamba kulonga zo wongomezwe lono Mulungu si yateye nhavivyo?

⁹ Nane nghusuma kuwawona ku wulawilila mu vizuli vye mabwe. Nghuwalanga ku wulawa mu matunda mucanyha Lyo likungugo lyono likalaga ciwene. Ninga wamanyile vyono wene walugutwe kuciza we makungugo ganji gose.

¹⁰ Ne zindelo za Isilayeli, wenji kotya manghundi. Wenji muno muno, hamba si wakusumika na ku wuwale. Wundece nivimalile vilo vyangu nha yumonga wa muli wanhu wo Mulungu. Wundece nifwe ko mulamu nhe wanhu we ling'ani.”

¹¹ Nayo Balaki yakamulonjela Balamu yakatya, “Alu Balamu, ho kunhendela nhawule kanyhi? Ane nha nghuleta agwe bahano ho wundijitile i walugu wangu. Ninga agwe kuwalugutiza.”

¹² Nayo Balamu yakamupitula yakatya, “Ane nghulonga du zono Muwaha Mulungu yakunonjela nonje.”

Wuwile we kejete wa Balamu

¹³ Hanyuma kanyhi, Balaki yakamulonjela Balamu yakatya, “Ale Balamu, wuze le, cibitane hamonga hanhu hanji kanyhi, i hanhu hono kosuma kuwawona Waisilayeli wanji. Nagwe ho wundijitile wene ku wulawilila hanhu baho.”

¹⁴ Hobaho yakawa kumusola, wakawa kubitana sunga kwi'hala lya Zofimu kucanyha ye litunda lya Pisiga. Na kuko nako yakazenga kanyhi vikumbicilo mupunghati, yakalavya kanyhi vilavywa vya nghongolo monga monga, na nduwilu monga monga, mu vikumbicilo vyose.

¹⁵ Balamu yakamulonjela kanyhi Balaki yakatya, “Ale wime baho ha cilavywa cako cinyanywe, lono nane nghali kubita nghewone no Mulungu.”

¹⁶ Muwaha Mulungu nayo vikawa kwiwona na Balamu. Muwaha Mulungu yakawa kumulonjela Balamu, zono Balamu kolonga. Hanyuma yakawa kumukombola yawuye kuli Balaki yakamulonjele zono yamutumile yalonje.

¹⁷ Nayo Balamu yakawa kuwuya kuli Balaki, yakamwagana Balaki yakali vyo yemile bahalya du ha cilavywa cakwe cinyanywe, yali hamonga ne walongola we Wamowabi. Nayo Balaki yakawa kuwuza vyono Muwaha Mulungu yateye.

¹⁸ Balamu yakawa kwanza kuzilonga zo wuwile wakwe yakutya, “Gwe Balaki, wuze go mwana wa Zipola, Wuhulicize kuli zono nozilonga.

¹⁹ Mulungu si yehwanile wanhu wono walambaga. Hamba si yehwanile wuwe wo wuhile wo munhu wono wupitukaga, Ninga mwene ketumaga zose zono yehuwize, Mwene kalongaga ko mulomo, nazo ziwa kwijela.

²⁰ Ane nonjelwa vyono, nize niwalugutize. Na lono Mulungu yakondya kulugutiza, ane si nosuma kugomoleza.

²¹ Nizimanyile zinghani ze Waisilayeli za ku mwande. Vyono si wokwinjila mu wukalale hamba mu magayo, Hambi u Muwaha Mulungu nha yali hamonga nawo. Nawo wakumwanza vyono mwene yo Mutemi wawo.

²² Mulungu yo yawawusa ku yisi ya Misili. Nayo yakuwalewanila, kotya likambaku lya mu mbago.

²³ Hasina mhiji zo wuhawi, hamba waganga, Wono wosuma kwitumamilwa ne nghungugo ya Isilayeli Sunga ne wanhu wowa kuziganula zinghani ze Waisilayeli, wakutya, ‘Lanjenyi ta, zono Mulungu yetumile!’

²⁴ Ne likungugo lya Isilayeli lihwanile simba yono yili vilungo muno muno. Yono si yicehaga, langa sunga yidemulanje no kulya, sunga ying'we ne sakami ya vyono liwulaje.”

²⁵ Nayo Balaki yakamulonjela Balamu yakatya, “Alu agwe walema kundijitila i wanhu wa Isilayeli, holeka, wulece hamba kuwalugutiza yaye!”

²⁶ Balamu nayo yakapitula yakamutya, “Ninga ane si nghulonjela nitya, vyono nosuma kwituma zono Muwaha Mulungu yakunonjela du?”

Wuwile we kadatu wa Balamu

²⁷ Nayo Balaki yakatya, “Alu nhondo wunhyatyaje kanyhi, nane nokutegula kanyhi hanhu hanji. I hanhu hono lunji Mulungu kokwenda kukukombola ho wundijitile wanhu wawo ku wulawilila hanhu baho.”

²⁸ Hobaho yakawa kumusola Balamu, wakawa kubitana sunga ko kucanyha ye litunda lya Peyoli, akuno wakawa kulilanga li nyika hasi yawo.

²⁹ Nayo Balamu yakamulonjela Balaki yakatya, “Ale wunzenjelaje kanyhi bahano vikumbicilo mupunghati, wundetele na nghongolo mupunghati, hamonga na nduwilu mupunghati.”

³⁰ Nayo Balaki yakazituma zose nha vyono yali yalajilizwe, yakawa kulavya nghongolo mupunghati, hamonga na nduwilu mupunghati, nghongolo monga monga, na nduwilu monga monga, mu vikumbicilo vyose.