Wuwale 21 - Luganuzi Luswanu Kuli Wanhu Wose 2002

Waisilayeli wakuwasumiza Wakanani

¹ Nayo Mutemi we Wakanani, mono yacemwaga Aladi, mono yali wo lubavu lwe takama lwe yisi ya Kanani, yali yeza kuhulika du vyono Waisilayeli wakuza, wakoleye nzila ye Atalimu, hobaho yakawa kuwabitila yakawa kuwahoma, sunga yakasola wayawo wanji mateka.

² Nawo Waisilayeli wakelahiza hali Muwaha Mulungu wakatya, “Gwe go Muwaha Mulungu, hono wucitaze ciwasume wanhu wawa, nase cowongomezeza lukulu hamonga ne makaya gawo.”

³ Nayo Muwaha Mulungu yakawahulika wulombe wawo, yakawataza, nawo wakawasuma mbeka i Wakanani. Waisilayeli wakawongomezeza lukulu Wakanani hamonga ne makaya gawo gose. Wakahacema hanhu baho Holema.

I nzoka ya shaba

⁴ Nawo Waisilayeli, wakawa kutuluka ku wulawa he 'tunda lya Holi, wakatyatya balabala yono yibitile ku Agaba, ho wayipilime yisi ye Waedomu. Ninga mumo mu nzila, wanhu wakatimba muno muno so mujendo,

⁵ hobaho wakawa kumung'ung'ulicila Mulungu hamonga na Musa, wakutya, “Alu nhawule wukaciwusa mu yisi ya Misili ho cifwile mumu mu nyika yiyi, i hanhu hono hasina ndigwa, hamba malenga bwete go kung'wa. Nase si cosuma hamba hadodo kukangalila kujendelela kulya ndigwa yiyi mhelu mhelu!”

⁶ Nayo Muwaha Mulungu yakawa kuwagumilila Waisilayeli mazoka. Na wenji wa muli wene wakalumwa ne mazoka gago wakafwa.

⁷ Hobaho i wanhu wakawa kumuziza Musa wakamutya, “Gwe Musa, ase cisutya vyono cimung'ung'ulicila Muwaha Mulungu, hamonga sunga na gwegwe. Alu cikukulomba, wumulombe Muwaha Mulungu yagawuse mazoka gaga.” Nayo Musa yakawa kuwalombela wanhu kuli Muwaha Mulungu.

⁸ Nayo Muwaha Mulungu yakawa kumulonjela Musa yanoze nzoka ya shaba, yayitumbice mwi'bici, no munhu wo wose mono lizoka lyomuluma, hono yagalamile yayilanje nzoka yiyo, munhu yuyo kopona.

⁹ Hobaho Musa yakawa kuyinoza nzoka ye shaba, yakayitumbika mwi'bici. No munhu wo wose mono yalumwa ne zinzoka zi zilya, nayo yakagalamila no kuyilanga nzoka ye shaba, hobaho munhu yuyo yakapona.

Ku wulawa kwi'tunda lya Holi, sunga mwi'lolo lya Mowabu

¹⁰ Nawo Waisilayeli wakajendelela no muhinzo wawo wakafika ku Aboti.

¹¹ Wali weza kuwuka hanhu baho, wakayisimya nghambi yawo ha Abalimu mu nyika ye cilima ye yisi ye Wamowabi.

¹² Hanyuma kanyhi wakayisimya nghambi yawo mwi'lolo lya Zeledi.

¹³ Wali weza kulawa baho, wakajendelela kanyhi sunga wakafika kusumuka ye likolongo lya Alinoni, mu nyika yono yitandaye yificile sunga ko ku yisi ye Waamoli, wakayisimya nghambi yawo baho. (Nayo yiyo Alinoni, wali wo mupaka we yisi ye Wamowabi ne yisi ye Waamoli.)

¹⁴ Na yiyi yo soko yono yikuleka i citabu co Muwaha Mulungu co wulolose wo wulugu, cikulonga cikutya, “Likaya lye Wahebu mu yisi ya Sufa, hamonga ne malolo, likolongo lya Alinoni,

¹⁵ hamonga no mwalambalo we malolo, wono wutandaye sunga ko kwi'kaya lya Ali, sunga ko ku mupaka wa Mowabu.”

¹⁶ Na ku wulawilila baho, wakajendelela no muhinzo wawo sunga wakafika ha Beyeli i hanhu hono hakucemwa Cisima, i hanhu hono Muwaha Mulungu yalonganila na Musa yakatya, “Ale wakongholelaje wanhu wose hamonga, nane nowapela malenga wang'we.”

¹⁷ Na mwipango lilyo i Waisilayeli wakemba lwimbo alu wakutya, “Ale go cisima wuvwile malenga. Nase cocilamusiza mu wimbe.

¹⁸ Go cisima cono wahimbwa ne wana wo mutemi, Hamonga ne walongola we wanhu, Cono cahimbwa ne nghome yo wutemi Hamonga ne zinghome zawo.” Nawo wakawa kutuluka ku wulawa mumo mu nyika, wakawa kubita sunga ko ku Matana.

¹⁹ Kanyhi wali weza kulawa baho, wakabita sunga ko ku Nahaliyeli. Na ku wulawa Nahaliyeli, wakabita sunga ko ku Bamoti,

²⁰ na ku wulawa Bamoti, wakabita sunga ko kwi'lolo lya mu yisi ye Wamowabi, hasika ye cizuli ce litunda lya Pisiga, wakawa wakulilanga linyika hasi yayo.

Waisilayeli wakumusuma u mutemi Sihoni no mutemi Ogu

²¹ Hanyuma i wanhu wa Isilayeli, wakatuma wanhu wabite kuli Waamoli ko mutemi Sihoni wakamulonjele watye,

²² “Cikukulomba wucikombole sese hamonga ne mitugo zetu, cikolele mu yisi yako. Nase hamba si cosuma kuyileka balabala, no kukola caka mu mawimbi gako, hamba mu migunda yako ye zabibu, si cong'wa ne malenga ga mu masima gako yaye. Langa ase cotyatya balabala du, sunga lono cowa cawuka mu yisi yako.”

²³ Ninga mutemi Sihoni hamba si yawakombola i wanhu wa Isilayeli ho wakolele mu yisi yakwe. Langa mwene yakawakonghola hamonga wasilikale wakwe wo wulugu, yakawa kubita kuli Yahazi ku nyika, yakawa kuwahoma Waisilayeli.

²⁴ Ninga hamba nhavivyo, Waisilayeli wakawawulaga wanhu wenji wa muli walugu wawo mumo mu wulugu. Wakayisola ne yisi yawo ku wulawilila kwi'kolongo lya Alinoni ku lubavu lwe sumuka, sunga ko ku Yaboki, nha cinji sunga ko kuli Waamoli, vyono mupaka we Waamoli wali wina wulindilizi we vilungo viwaha.

²⁵ Holeka i Waisilayeli wakazisuma zisi zose ze Waamoli no kuzisola, hamonga ne Heshiboni, sunga ne makaya gose gono gali gapilime. Wakawa kwikala mu zisi zizo.

²⁶ Nalyo likaya lya Heshiboni, lyali lyo likaya liwaha, lyo mutemi Sihoni mutemi we Waamoli, mono vikehoma no mutemi mulongozi we Wamowabi, nayo yakamusuma yakayiteka sunga ne yisi yakwe yose, ku wulawilila kwi'kolongo lya Alinoni.

²⁷ Na yiyi yo yaleka i mbazi yikulonga yikutya, “Ale, wuze ku Heshiboni, kwi'kaya lyo mutemi Sihoni! Cokwenda ciliwone likuzengwa kanyhi no kusimywa.

²⁸ Hambi wasilikale wa Sihoni wo wulugu, nha wenjila lwa kamonga nha moto mwi'kaya lya Heshiboni. Wakalyongomeza likaya lya Ali ya Mowabu. Hamonga ne wawaha we vigongo vya Alinoni.

²⁹ Woyi he anye mo wanhu wa Mowabu. Anye mono muhembaga mulungu Cemoshi, alu mongomezwa! Mulungu wenyu yawambuza wanhu waweza watizizi. Ne wacekulu nawo wasolwa mateka no mutemi we Waamoni.

³⁰ Ninga aluno i wana wawo nawo wongomezwa ku wulawa mu nzila yose, wulawa Heshiboni sunga ko ku Diboni. Na ku wulawa Nashimu sunga ko ku Nofa behi na Medeba.”

³¹ Holeka i wanhu wa Isilayeli, wakekala mu yisi ye Waamoli.

³² Nayo Musa yakawatuma wanhu wanji, wakalanje nzila swanu yono yowataza ho walihome likaya lya Yezeli. Waisilayeli wakaliteka likaya lilyo, hamonga ne vikaya vyose vyono vyali vilipilime, wakawawinga ne Waamoli wose wono wekalaga mumo.

³³ Hanyuma Waisilayeli wakawuya ne nyuma, wakayityatya balabala yono yibitile ku Bashani. Nayo mutemi Ogu wa Bashani, yakabita hamonga ne wasilikale wakwe wo wulugu, ho vikehome nawo ha Edileyi.

³⁴ Nayo Muwaha Mulungu yakamulonjela Musa yakatya, “Wulecele lukulu kumogopa Ogu, ane nokupela wusume kuli mwene, na kuli wanhu wakwe wose, na kuli yisi yakwe nhavivyo. Ho wumunoze nha vyono wamunoza Sihoni, u mutemi we Waamoli, mono yali yatemile mu Heshiboni.”

³⁵ Nawo Waisilayeli wakamuwulaga Ogu hamonga ne wanagwe we cilume, sunga ne wanhu wose du, si yasigala yunji hamba yumonga. Hanyuma wakayiteka ne yisi yakwe yose.