Wuwale 20 - Luganuzi Luswanu Kuli Wanhu Wose 2002

Kuli zono zejela ku Kadeshi

¹ Na mu mwezi mulongozi, i mhuga yose ye Waisilayeli, wakafika mu nyika ya Zini, wakayisimya nghambi yawo mu Kadeshi. Na lono wali wali baho, Milyamu yakawa kufwa, yakazikwa baho.

² Ne hanhu baho hono wayisimya nghambi yawo, hakawa hasina malenga, hakawa na nyhilu mbaha muno. Hobaho, wanhu wakekongholela hamonga wamupilime Musa na Haluni.

³ Wakawa kwanza kung'ung'ulika wakutya, “Nye! Yali yiwe yili ciba le, cifwile ha mwande ye Lihema lyo Muwaha Mulungu, ne Waisilayeli wayetu.

⁴ Alu nhawulenyi nye muwa kucileta hanhu baha mono nyika yiyi? Anye kumbe mucileta bahano ho cifwe sese hamonga ne mitugo zetu.

⁵ Alo nhawulenyi mukaciwusa ku yisi ya Misili, nalu mwacileta mu yisi yiyi mbi nhavi, yono yisina hamba wucindya cinji co cose? Hasina hamba wuhemba bwete, hasina mikuyu, hasina zabibu, hamba makomamanga du bwete. Hamba malenga du go kung'wa, hasina!”

⁶ Nayo Musa hamonga na Haluni, wakawuka hali wanhu wakabita wose vyono wejete, wakema ha mulango we Lihema. Wakenamya wusu wawo sunga wukapamiza ho hasi. Nalo lukumyo lo Muwaha Mulungu lukawalawila.

⁷ Muwaha Mulungu yakamulonjela Musa yakatya,

⁸ “Ale wusole nghome yako yono yili ha mwande ye Lisanduku lye Cilagane. Hanyuma agwe hamonga na Haluni, muwakongholele hamonga wose we mhuga ye Waisilayeli. Nanye mulilonjelaje litalawe lilyo ha mwande yawo, nalyo litalawe lilyo lyolavya malenga. Na mu nzila yiyo, mosuma kulavya malenga, mu wulawa mumo mwi'talawe, nawo wanhu wotuga malenga, wong'wa weneco hamonga ne mitugo zawo zose.”

⁹ Musa yakawa kuyisola yiyo nghome, nha vyono Muwaha Mulungu yamulajiliza.

¹⁰ Musa na Haluni, wakawa kuwakongholela mhuga yose hamonga ha mwande ye litalawe. Nayo Musa yakawa kuwalonjela wanhu yakatya, “Ale ta muhulicize, anye mono musina cihuliko! Wulenyi, cimuletelenyi malenga galawe mwitalawe lili?”

¹¹ Hanyuma Musa yakawa kuyinula nghome, yakalitowa litalawe kali kejete. Malenga gakalawila menji muno muno nha muvwilo. Ne wanhu wose wakang'wa wakaca, hamonga sunga ne mitugo zawo zose.

¹² Ninga Muwaha Mulungu yakawahosa Musa na Haluni, yakawatya, “Alu vyono si munyihuwiye 'ne, na kanyhi vyono si musacile no kuvilajila vilungo vyangu viwaha vyono vyelile, hali wanhu wawa Waisilayeli, hodu, nanye si mowalongoza wanhu wawa, sunga muwafise ku yisi yono nawehuwiza vyono nowapela.”

¹³ Na zizi zejela lono wali wali ha muvwilo wa Meliba, i hanhu hono i wanhu wa Isilayeli wamung'ung'ulicila Muwaha Mulungu, na kanyhi ho hanhu hono Muwaha Mulungu yawalajilila vyono mwene yo Yelile.

U mutemi wa Edomu yakuwemila Waisilayeli walece kupuluta

¹⁴ Ale, Musa yakatuma wanhu kuli mutemi wa Edomu ku wulawa baho ha Kadeshi. Yakutya, “Wanhu wawa, wakulawa kuli sese co wanduguzo we nghungugo ya Isilayeli. Nitumbiye vyono nagwe wakondya kumanya ze magayo getu, na vyono cikugazika,

¹⁵ na vyono walezi wetu wabita kuko ku Misili, i hanhu hono cekala myaka minji muno muno. Na vyono Wamisili wawagaza muno walezi wetu, sunga na sese wose.

¹⁶ Nase cikamulilila Muwaha Mulungu yacipele wutazi. Nayo mbeka yakacihulika cililo cetu, yakaciletela Malayika mono yakaciwusa ku yisi yiyo ya Misili. Ninga aluno, cili mono yisi ya Kadeshi, kaya yono yili mu mupaka we yisi yako.

¹⁷ Holeka cikukulomba wucikombole hamonga ne mitugo zetu cikolele mu yisi yako. Nase hamba sicosuma kuyileka balabala no kukola caka mu mawimbi gako, hamba mu migunda yako ye zabibu, hamba si cong'wa ne malenga ga mu masima gako yaye. Langa 'se cotyatya balabala du sunga lono cowa cawuka mu yisi yako.”

¹⁸ Ninga Waedomu wakapitula wakatya, “Ase langa calema! Hamba si comukombolenyi yaye ho mukolele mono yisi yetu! Na hono mwijelele mutye mukole, cokuza cimuhomenyi.”

¹⁹ Nawo Waisilayeli wakapitula wakatya, “Nye wayetu, ase cowa cityatizye balabala du, na hono sese, hamba mitugo zetu, zing'we malenga genyu, ase cohaliza. Ninga cono cikulomba, cipulute du.”

²⁰ Nawo Waedomu wakapitula wakatya, “Ase calema le!” Hodu ho baho Waedomu wakawa kubita hamonga ne wasilikale wenji muno, wakawahome Waisilayeli.

²¹ Alu vyono Waedomu walema kuwakombola Waisilayeli wakolele mu yisi yawo, hodu nawo Waisilayeli wakawa kuwuya ne nyuma, wakakolela nzila yinji.

U wufwe wa Haluni

²² Ne mhuga yose ya Isilayeli, wakawuka ku Kadeshi, wakafika kwi'tunda lya Holi,

²³ ha mupaka wa Edomu. Na lono wali wali baho, u Muwaha Mulungu yakawalonjela Musa na Haluni yakatya,

²⁴ “Ayu Haluni si kosuma kwinjila mu yisi yono nawehuwiziza Isilayeli vyono nowapela, langa mwene kofwila mu nzila du. Hambi nyenye vyono muli wejete, nha mwabedegala lilajilizo lyangu akulya ku muvwilo wa Meliba.

²⁵ Holeka lu, Musa, wumusolaje Haluni hamonga na Eleyezali u mwanagwe, wuwategule kucanyha ye litunda lya Holi.

²⁶ Nagwe kolo weza kufika kuko, wumuvulaje Haluni myenda yakwe yose ye cikohani, wumuvwice Eleyezali. Nayo Haluni hodu kofwila baho.”

²⁷ Nayo, Musa yakanoza nha vyono Muwaha Mulungu yamulajiliza. Nawo wose wakawa kubita kwi'tunda lya Holi kucanyha, akuno ne wanhu wose wakawa wawalanjiliye du.

²⁸ Musa yakawa kumuvula Haluni i myenda yose ye cikohani, yakawa kumuvwika Eleyezali. Nayo Haluni hodu hobaho yakawa kufwa kuko kucanyha ye litunda. Nawo Musa hamonga na Eleyezali wakawa kutima hasi ye litunda.

²⁹ Ne mhuga yose ya Isilayeli, wakamanya vyono Haluni yakondya kufwa. Holeka wose wakamulilila vilo makumi madatu.