Wuwale 17 - Luganuzi Luswanu Kuli Wanhu Wose 2002

Nghome ya Haluni

¹ Muwaha Mulungu yakamulonjela Musa yakatya,

² “Walonjele wanhu Waisilayeli, wakupele nghome yikumi na nyejete, zeze nghome monga monga ku wulawa mu walongola we milango yose vyono yikumi na myejete. Nagwe wandice munhu ne litagwa lyakwe mu nghome yakwe.

³ Ninga mu nghome yono yowa so Walawi, wandice litagwa lya Haluni. Nazo zowa nghome monga monga nha vyono linha liwalo lye walongola we milango yawo.

⁴ Wuzisole wuzilete mwi 'Hema lyangu lyono Lyelile, wuziwice ha mwande ye Lisanduku lye Cilagane, hono nghwitang'anilila nagwe.

⁵ Ne nghome yo munhu mono nimuhaguye nene, yotula. Na mu nzila yiyi, mo nowudumizya wung'ung'ulice wono si wukuduma, wono wakukung'ung'ulicila wawa Waisilayeli.”

⁶ Nayo Musa yakawalonjela Waisilayeli. Nawo walongola wawo, wose wakamuletela Musa nghome monga monga, munhu na mulango wakwe, wakaleta nghome yikumi na nyejete zose hamonga. Ne nghome ya Haluni nayo, wakayihanziliza hamonga na zizo.

⁷ Nayo Musa yakawa kuziwika mwi 'Hema, ha mwande ye Lisanduku lye Cilagane.

⁸ Ne mitondo yaco. Lono Musa yali yali mwi Hema, yakawona vyono nghome ya Haluni, yono yali so mhuga ye Walawi, yakondya kutula, yibonhoye, kanyhi yilelile malozi!

⁹ Nayo Musa yakawa kuzisola nghome zose vyono zinha, yakawa kuwalajila Waisilayeli. Nawo Waisilayeli wakaziwona zono ziweye. Nawo walongola wakawa kuzisola zinghome munhu na nghome yakwe.

¹⁰ Muwaha Mulungu yakamulonjela Musa yakatya, “Ale, wuyigomolezaje nghome ya Haluni ha mwande ye Lisanduku lye Cilagane. Nayo wuyilece yiwe kwikala baho du, yiwe yo suguzi kuli Waisilayeli wono wali cibede, hambi nha wofwa du, hono wawe wakali wajendeleye ne mang'ung'uliko gawo.”

¹¹ Nayo Musa yakanoza du, nha vyono Muwaha Mulungu yamulajiliza.

¹² Nawo wanhu Waisilayeli, wakamulonjela Musa wakatya, “Alu, awu nhondo, weza wo mudumo wetu!

¹³ Hambi hono yeza vyono, munhu wo wose mono kosejelela behi ne Lihema kofwa, alu kumbe ase wose cofwa du!”