Wuwale 15 - Luganuzi Luswanu Kuli Wanhu Wose 2002

Wulajilize wa kuli ze makumbiko

¹ Muwaha Mulungu, yakamulajiliza Musa,

² yawalonjele wanhu Waisilayeli, malajilizo gono wanojeye wagakamise, mu yisi yono yakuwapela.

³ Yiwanojeye wamulavizye Muwaha Mulungu nghongolo, hamba ngholo, hamba mhene, yiwe so cilavywa cinyanywe, hamba so cilavywa co wufisilize wo wilahize, hamba so cilavywa ce lihewa, hamba so cilavywa cono wazoweye kulavya mu zi sikukuu zenyu ze nhondo zose, ne mhunjile ye vilavywa vye ndigwa, yikumwendeza Muwaha Mulungu.

⁴ No munhu wowose, mono kowa kumulavizya Muwaha Mulungu cilavywa cinyanywe ce ngholo, hamba ce mhene, yowa yimunojeye yalavye hamonga no wusaje wa kilo monga wono wuhanzahanze ne mafuta lita monga,

⁵ ciwe cilavywa co wusaje munamu, hamonga na divayi lita monga.

⁶ Na hono yiwe nduwilu yo yikulavywa, ale yinojeye yilavywe hamonga no wusaje wa kilo nyejete wono wuhanzahanze ne mafuta lita monga na nusu, nawo wulavywe ciwe cilavywa co wusaje,

⁷ hamonga na divayi lita monga na nusu. Ne mhunjile ye vilavywa vyono vinha vivino, yikumwendeza Muwaha Mulungu.

⁸ Na hono yiwe nghongolo yo yikulavywa kuli Muwaha Mulungu nha cilavywa cinyanywe, hamba nha cilavywa co wufisilize wo wilahize, hamba lunji so cilavywa co mulamu,

⁹ ale, yowa yinojeye wulavywe hamonga no wusaje wa kilo yidatu wono wuhanzahanze ne mafuta ga lita nyejete,

¹⁰ hamonga na divayi lita nyejete. Ne mhunjile ye likumbiko lyono linha lili, likumwendeza Muwaha Mulungu.

¹¹ Nayo vyo yowa yinha mu wulavye we nghongolo yoyose, hamba we nduwilu yoyose, hamba we ngholo yoyose, hamba we mhene yoyose.

¹² Na hono hawe hoyili mitugo minji yono yikulavywa lwa kamonga, ale, mitugo zose, monga monga, zinozezwe nha vyono winha wityatye wuwo.

¹³ No Mwiisilayeli wo wose munya wusi, yimunojeye yanoze nhavivi lono yakulavya cilavywa ce ndigwa. Ne mhunjile yayo yikumwendeza Muwaha Mulungu.

¹⁴ Na mwi'pango lyo lyose, mujenzi mono mwikalane, hono yawe mwikazi we 'daha yidodo du, hamba muhamizi, yalavye cilavywa ce ndigwa, ye mhunjile yono yikumwendeza Muwaha Mulungu, u munhu yuyo yanojeye yatyatye wulajilize vyono winha.

¹⁵ No wulajilize wuwu, wunojeye wukamiswe na nyenye, hamonga ne wajenzi wono mwikalane nawo, sunga mu vilo vyose vyono vikuza. Hambi wose anye na wene, nha co cimonga du hali Mulungu.

¹⁶ Hambi malajilizo gose hamonga no wityatye wayo, nha vili ku soko yenyu na kuli wene.

¹⁷ Muwaha Mulungu yakamulonjela Musa,

¹⁸ “Yawalonjele Waisilayeli, u wulajilize awuno, wawukamise mu yisi yono yakuwapela.

¹⁹ Na lono mweza kulya zindigwa za mu yisi, mweze kuwika zinji ha mhelo, ziwe cilavywa cinulwe hali Muwaha Mulungu.

²⁰ Na lono mweza kuteleka mikate mu wulawa mu wuhemba wupya, ale, mumanye vyono, u mukate mulongozi kutelekwa, wuwo wunojeye wulavywe ciwe cilavywa cinulwe hali Muwaha Mulungu. Nanye molavya mu nzila yiyilya du, nha vyono mulavyaga cilavywa cinulwe co wuhemba mu wulawa mu vyuga vyenyu.

²¹ Ne cilavywa cicino cinulwe co mukate, cinojeye cilavywe kuli Muwaha Mulungu mu vilo vyose vyono vikuza.

²² “Na lunji, so wu wula kumanya, yunji kekala si yebate wulajilize wu wuno, wono Muwaha Mulungu yamulajilize Musa.

²³ Na kanyhi lunji mu vilo vyono vikuza, mhuga yilece kusuma kuzituma zose, zono Muwaha Mulungu yawalajiliziza muli Musa.

²⁴ Na hono mhuga yisutye so wu wula kumanya, ale, wosuma kulavya nghongolo yiwe cilavywa cinyanywe, ne mhunjile yayo, yikumwendeza Muwaha Mulungu, hamonga ne cilavywa co wusaje ne divayi. Hamonga na zizo, wowa wanojeye walavye mvulati, yiwe so cilavywa co wubi.

²⁵ Nayo mukohani, yanoze wilamule so mhuga yose. Nawo wonenelwa, hambi lisutya lyawo, nha wasutizya mu wu wula kumanya, na kanyhi luno, wakondya kulavya ne cilavywa co wubi yiwe co cilavywa ce ndigwa kuli Muwaha Mulungu.

²⁶ Nayo mhuga yose ye Waisilayeli wonenelwa, hamonga ne wajenzi wono vikalane nawo. Hambi nha wose, wali, wali nghologo monga mu wusutye.

²⁷ “Na hono munhu wowose yasutye wula kumanya, ale munhu yuyo yalavye mhene nhogota ya mwaka monga so cilavywa co wubi.

²⁸ Nayo mukohani yamunozeze wilamule hali Muwaha Mulungu, u munhu yuyu mu wubi wakwe, nayo munhu yuyo konenelwa.

²⁹ No wityatye wuwu, wowa so wanhu wose wono wakwinjila mu masutya wula kumanya, hono yawe munyawusi Mwiisilayeli, hamba yawe mujenzi muhamizi.

³⁰ “Ninga munhu wowose mono yakwituma wubi ne nyono yakwe, hono yawe munyawusi, hamba yawe mujenzi, ayo yakuwa musutyi so wubedegala u Muwaha Mulungu. Holeka munhu yuyo yawulagwe.

³¹ Hambi nha kabedegala kuli zono Muwaha Mulungu yalonjile, kanyhi, kabena ne nyono, limonga lya muli malajilizo go Mulungu. Holeka munhu yuyo yimunojeye yafwe.”

Muli zo munhu mono koyibena Sabato

³² Mwi'zuwa linji, lono Waisilayeli wali wakali wali mu nyika, u munhu yunji yakejela yakutenya ngwagu mwi'zuwa lye Sabato.

³³ U munhu yuyo yakawa kusolwa, yakategulwa kuli Musa na Haluni na hali mhuga yose ye Waisilayeli.

³⁴ Nawo wakawa kumudindila mu jela, hambi nha yali yikali si namanyika calinze yono wosuma kumutendela so lisutya lilyo.

³⁵ Muwaha Mulungu yakamulonjela Musa yakatya, “U munhu yuyo, yanojeye yawulagwe, yategulwe kunze ye nghambi, ne mhuga yose wamutowangaje ne mabwe sunga yafwe.”

³⁶ Hobaho mhuga yose yikawa kumusola, yikawa kumutegula kunze ye nghambi, yikawa kumutowanga ne mabwe sunga yakafwa, nha vyono Muwaha Mulungu yali yalajilize.

Wulajilize wa kuli ze masune

³⁷ Muwaha Mulungu yakamulajiliza Musa yakatya,

³⁸ “Yawalonjele wanhu wa Isilayeli yatye, ‘Ale, muhoneleze masune mu mamhembo ge myenda yenyu, kanyhi na mu masune ge macindo gose, muwicile mulejehe we liwala lye buluu. Nanye munojeye muwe kunoza nhavivi mu vilo vyose vyono vikuza.

³⁹ Nago masune gago, gowa co cikumbucizo cenyu, nanye kolo mukugawona, mogakumbucila malajilizo gangu gose, nanye kolo mwakumbucila, si mosuma kanyhi kundeka, no kutyatya zi nzila zenyu nyo weneco, hamonga ne masulumizi genyu.

⁴⁰ Nago kanyhi masune gago, gowa kumukumbucizenyi, mujendelele kugebata malajilizo gangu gose. Nanye mowa muli wanhu wangu nene du.

⁴¹ Ane yo nene no Muwaha u Mulungu wenyu, mono namuwusenyi mu yisi ya Misili niwe Mulungu wenyu. Ane yo nene Muwaha Mulungu.’ ”