Wuwale 13 - Luganuzi Luswanu Kuli Wanhu Wose 2002

Watandizi

¹ Muwaha Mulungu yakamulonjela Musa yakatya,

² “Ale wuhagule walongola monga monga, mu wulawa mu milango yose yikumi na myejete ye Waisilayeli. Wuwatume wabite nha watandizi, wakayilanje yisi ya Kanani vyono yinha, yisi yono nghuwapela i Waisilayeli.”

³ Nayo Musa yakawa ne cihuliko, yakawatuma ku wulawa ku nyika ya Palani i walongola awa nha vyono wetyatizye ahano.

⁴ Wo mulango wa Lubeni, yakabita Shamuwa u mwana wa Zakuli:

⁵ Wo mulango wa Simiyoni, yakabita Shafati u mwana wa Holi.

⁶ Wo mulango wa Yuda, yakabita Kalebi u mwana wa Yefune.

⁷ Wo mulango wa Isakali, yakabita Igali u mwana wa Yusufu.

⁸ Wo mulango wa Efulayimu, yakabita Hosheya u mwana wa Nuni.

⁹ Wo mulango wa Benyamini, yakabita Paliti u mwana wa Lafu.

¹⁰ Wo mulango wa Zabuloni, yakabita Gadiyeli u mwana wa Sodi.

¹¹ Wo mulango wa Yusufu, (nha cinji wono wakulawa mu mulango wa Manase,) yakabita Gadi, u mwana wa Susi.

¹² Wo mulango wa Dani, yakabita Amiyeli u mwana wa Gemali.

¹³ Wo mulango wa Asheli, yakabita Setuli u mwana wa Mikayeli.

¹⁴ Wo mulango wa Nafutali, yakabita Nahibi u mwana wa Vofisi.

¹⁵ Wo mulango wa Gadi, yakabita Gewuyeli u mwana wa Maci.

¹⁶ Wawo wo wanhu wono Musa yawatuma, wabite wakayilanje yisi ya Kanani vyono yinha. Yakawa kumukawaniza litagwa Hosheya u mwana wa Nuni, yawe Yoshuwa.

¹⁷ Nayo Musa lono yawatumaga, yakawalonjela yakatya, “Kolo mweza kutuluka, mwinjililaje ku lubavu lwa kusumuka ye yisi, muwe kujendelela sunga mufice ku lubavu lwe takama ye yisi, mukole sunga na mu matunda.

¹⁸ Muyilanje yisi yiyo yose ya Kanani, muyiwone vyono yinha, kanyhi mumanye ne liwalo lye wanhu wayo wono wekaye mumo, na hono wali vilungo, hamba watimbile.

¹⁹ Kanyhi muyilangaje yisi hono swanu hamba ng'o. Na hono wanhu wayo wekaye mu zikaya zono zizenjigwe mwi'hala, hamba nzenje mugati ye magomawakali.

²⁰ Kanyhi muwulanje no muhangha wayo, hono wina moso hamba ng'o, na hono mogali mabici hamba yihala du. Kanyhi kolo mweza kuwuya akuno, mukumbucile muleteleze ne mikalo yono wayilimaga kuko.” (Naco cali co cipango co wupilo we zi zabibu.)

²¹ Hobaho wanhu wawo wakawa kutuluka, wakakolela ku lubavu lwe sumuka, wakayilanga yisi ku wulawilila mu nyika ya Zini, sunga ko ku takama ku Lehobu, behi na Hamati-pasi kono sumuka.

²² Ninga kanyhi, wakamula kubita ku lubavu lwe takama lwe yisi, wakakolela ku Hebuloni, mu yisi ya we mhuga ya Ahimoni na Sheshayi, na Talamayi, we ndelwa ye mbeyu ye manhu gono gali gali vilungo, gono gacemwaga Waanaki, wo wekalaga kuko. (Nayo Hebuloni, yo yalongola kuzengwa. Yali yeza kupuluta myaka mupunghati, ho yikazengwa nayo Zowani yono yili mu Misili.)

²³ Hodu, wakawa kuza sunga ko kwi'lolo lya Eshikoli, nawo wali weza kufika mwi'lolo lilyo, wakatema linhambi lina yivunda limonga lya zabibu. Nalyo likawa yizito muno muno, sunga yikawa cinojele lisomekwe mwi 'bici, kanyhi lidinghulwe na wanhu wejete wetembase. Wakaleta ne makomamanga ne zinghuyu.

²⁴ Hanhu baho hakacemwa Lilolo lya Eshikoli, vyono i Waisilayeli, baho ho watema linhambi lye zabibu.

²⁵ Nawo wali weza kukondya kuyilanga yisi mu vilo makumi mane, hodu, wakawa kuwuya

²⁶ kuli Musa na Haluni, hamonga ne mhuga yose ye Waisilayeli kuko ku Kadeshi, mu nyika ya Palani. Wakalonga zose zono waziwona, wakalajila sunga ne mikalo yono waleteleze.

²⁷ Wakamulonjela Musa wakutya, “Ciyipilima yisi yose, ciyiwona vyono yinha, ayino hano ne mikalo yono yikulimwa mu yisi yiyo.

²⁸ Langa i wanhu wono wekaye mu yisi yiyo, wo wanhu wono wali vilungo muno muno. Ne makaya gawo mawaha muno muno, kanyhi gose mazenje mugati ye magomawakali. Kanyhi ciwona ne zindelo ze manhu gono gali vilungo kuko, gono gacemwaga Waanaki.

²⁹ Nawo Waamaleki wekaye ku lubavu lwe takama ye yisi. Nawo Wahiti ne Wayebusi hamonga ne Waamoli, wekaye mu yisi ye matunda. Nawo Wakanani, wekaye mu mwalambalo we lilenga lya Meditelaneya, na ku lubavu lwe likolongo lya Yoludani.”

³⁰ Nayo Kalebi yakawa kuwanyamaza wanhu wono wamung'ung'ulicilaga Musa, yakatya, “Alenyi 'nye, cikayisole yisi, hambi 'se nha cina vilungo vyo kuyisolela.”

³¹ Ninga wanhu wono wabitana hamonga na Kalebi wakatya, “Nye, ase cisina vilungo vyo kuwasumila wanhu wa walya, hambi wene nha wali vilungo wacicizize 'se.”

³² Holeka wakatandaza nghani za wulambi muli Waisilayeli, kuli ze yisi yiyo yono wabita kuyilanga. Kanyhi wakacila konjeleza wakutya, “Ne yisi yiyo hamba si yikusuma no kulela zindigwa zono ziwakwiliye wanhu wose wono wekaye mumo. Kanyhi wanhu wose wono ciwawene, wose watali muno muno.

³³ Ciwawona kanyhi kuko sunga ne Wanefili, we zindelo ze Waanaki. Nase ciwa kwiwona cili wadodo du kotya mhanzi, hambi nha vyo cali kwijela ha mwande yawo.”