Wuwale 12 - Luganuzi Luswanu Kuli Wanhu Wose 2002

Milyamu yakulipicizwa

¹ Musa yali yatolile mucekulu we Cikushi. Ninga Milyamu na Haluni wene si wendezwa ne nghani yiyo.

² Holeka wakawa kulongana wakutya, “Alo Muwaha Mulungu kalongana na Musa du yali wene, hamba kulonga nase ng'o?” Nayo Muwaha Mulungu yakazihulika zono walonganaga.

³ (Ninga Musa yali yo munhu mupolo muno, kuciza wanhu wose wono wali mononze.)

⁴ Nayo Muwaha Mulungu yakalonga nawo nhinicizo, Musa, Haluni na Milyamu, yakawatya, “Ale, ane nghumusacenyi nyenye wose vyono muli wadatu, muze kwi Hema lyangu lyono Lyelile.” Nawo wakawa kubita.

⁵ Nayo Muwaha Mulungu yakaziza mwi'vunde lyono lipalinjile, yakema ha mulango we Lihema, yakacema yakutya, “Haluni! Milyamu!” Nawo vyono wejete wakalawila mwi Hema.

⁶ Muwaha Mulungu yakawatya, “Alu, muhulice ta zono nghumulonjelenyi! Hono ho wali wawizi muli'nye, ane yo nene mono nghwilajila kuli wene mu nzila yo wugubulilwe, kanyhi nghulonganila nawo mu zindoto.

⁷ Ninga lono nghulongana no mwitumami wangu Musa, nghulongana nayo mu nzila yono yisimajiye. Hambi nha nimuwicile mwene yawe yo mulanjilizi muli wanhu wose wa Isilayeli.

⁸ Holeka lono nghulongana nayo, nghulongana nayo ciwonelela, kanyhi calinze du, hamba si mu nzila yo wufumbe ng'o. Nayo yakondya kumbona sunga ne cihwani cangu! Alu nhawule si mwali kogopa kumulonganga mwitumami wangu Musa?”

⁹ Muwaha Mulungu yakawa kuwa kolelwa likuwo muno muno, yakawa kuwuka yakawaleka.

¹⁰ Ne livunde likawa kuwuka he Hema. No muwili wa Milyamu wukatuga lwa kamonga wutamwa wo wukoma. No muwili wakwe wose wukawa kuswelulila swee, nha mabwe ga mvula. Nayo Haluni yali yeza kumuwona Milyamu vyono yakondya kwibatwa no wukoma,

¹¹ yakawa kumulonjela Musa yakutya, “Go muwaha wangu, dedede, wulece kucileceleza citamiswe no wulipicizwe wuwu, so wubi wetu we cilelelele.

¹² Dedede, wulece kumuleka Milyamu, yawe nha cinhu cono cileligwe cifwiye, akuno yena nghuli yono yilijigwe lubavu lunji.”

¹³ Nayo Musa yakamulomba Muwaha Mulungu yakutya, “Gwe go Mulungu, nghukunena wumuponye Milyamu!”

¹⁴ Muwaha Mulungu yakapitula yakatya, “Hono sogwe yali yamufunyile mate mu wusu wakwe, yali yakozwe cevu vilo mupunghati. Holeka mulekaje Milyamu yekale kunze ye nghambi vilo mupunghati. Na kolo vyapuluta vilo vivyo vyo mupunghati, ale ho kosuma kugomolwa kanyhi mono nghambi.”

¹⁵ Hobaho Milyamu yakawa kudindilwa kunze ye nghambi, nayo yakawa kuko kunze vilo mupunghati. Nawo wanhu, hamba si watuluka yaye, sunga Milyamu yakagomolwa mu nghambi.

¹⁶ Hanyuma ho wakawa kutuluka ku wulawa baho ha Hazeloti, wakabita sunga ko ku nyika ya Palani, wakayisimya nghambi yawo baho.