Wuwale 11 - Luganuzi Luswanu Kuli Wanhu Wose 2002

I hanhu hono hakucemwa Tabela

¹ Nawo wanhu, wakawa kwanza kumung'ung'ulicila Muwaha Mulungu, ku soko ye magayo gawo. Nayo Muwaha Mulungu yali yeza kuwahulika, hobaho yakakolwa ne likuwo muno muno, yakawa kuwagumilila moto wanhu. Nawo moto wukawanyanya wayawo wanji, wukayiticimiza ne nghambi yawo lubavu lunji.

² Nawo wanhu wakawa kumulilila Musa wakusaka wutazi. Nayo Musa yakamulomba Muwaha Mulungu, nawo moto hobaho wukawa kuzima.

³ Holeka i hanhu baho, hakacemwa Tabela, hambi baho nha ho hanhu hono moto wo Muwaha Mulungu, wawanyanyila wayawo wanji.

Musa yakuwahagula walongola makumi mupunghati

⁴ Na mu muhinzo wuwo, mwali mowali ne wajenzi wono vyajendana hamonga ne Waisilayeli. Nawo wakawa wena nyhilu yo kulya nyama, sunga na weneco Waisilayeli, nawo wakawa kwanza kung'ung'ulika wakutya, “Nye, alu nyama, hamba ciyiwone hayi!

⁵ Lono cekalaga ku Misili, calizaga somba mu nghango nha vyono casakaga, kanyhi zali za bwete du. Cikumbuciye sunga ne matanga, ne matijiti, ne zimboga ze mahamha, ne vitungulu, sunga ne vitungulu sawumu, vyono calizaga.

⁶ Ninga aluno casocela. Hambi nha ceza cisina cinji cono colya, langa hono si Mana yiyo du nhondo zose!”

⁷ (Nayo yiyo Mana yali yihwanile mbeyu ndodo ndodo, ne liwala lyayo lyali linha liwala lye zinhafuta.

⁸ Nayo yalagalaga ku cilo hamonga ne buhe.

⁹ Na kolo wela, i wanhu wawa kupilimapilima ako na ako wakuyizola. Hanyuma wawa kuyisaga mu zi nzala, hamba lunji kuyibunda mu matuli wuwa wusaje, hanyuma wawa kuyiteleka no kuyinoza capati. Nayo u munzinzi wayo, wukawa wihwanile no munzinzi wo mukate mutelecele mafuta.)

¹⁰ Nayo Musa yakawahulika wanhu vyono wang'ung'ulikaga, lono wali welundice munhu na mhuga yakwe mu milango ye mahema gawo. Musa yakagazika muno, vyono Muwaha Mulungu yali yawakolelwa likuwo muno muno.

¹¹ Hobaho Musa yakawa kumulonjela Muwaha Mulungu yakatya, “Gwe go Muwaha Mulungu, alo nhawule kunhendela vibi nhavivi? Hamba nhawule lu wasula? Hamba nhawule wukamhela wulanjilizi wa muli wanhu wawa?

¹² Alu ane, nha si nawawumba nene, hamba kuwanoza kose du ho walelwe! Alu nhawule wumheye nitume mulimo wuwu nha nili mukoci wa wana, ho niwadinghule nha wagalika mu mawoko gangu mu nzila yose, sunga niwafise ko ku yisi yono wawehuwiziza walezi wawo?

¹³ Alo, hayi hene hono ane noyituga nyama yono yowakwila wanhu wose wawa? Alu 'mbi, nha vyo wakali wakung'ung'ulika du wakulomba nyama.

¹⁴ Nane, hamba si nghusuma nili wene, kuwa mulanjilizi we wanhu wawa, hambi nha mulimo muwaha muno muno kuli'ne!

¹⁵ Na hono wuwe wukali kunhendela nhavivi, nghukulomba wumbonelaje lusungu, kanyhi ciba mbulagaje du kamonga. Hambi ane nha si nosuma kujendelela kuwukangalila wukali wako.”

¹⁶ Nayo Muwaha Mulungu yakamulonjela Musa yakatya, “Ale, nghongholelaje wanhu makumi mupunghati wa muli walongola we Waisilayeli, i wanhu wono wena lilumbo yiswanu, kanyhi wono wamanyice vyono mbeka wena wuwe wo wulongoza wanhu, wundetele ha mulango we Lihema lyangu lyono Lyelile. Hanyuma wuwatye weme baho hamonga nagwe.

¹⁷ Nane notima, cilongane nagwe baho. Nane nosola muhe wunji wono wuli muli'gwe wono nakupela, ho niwagawile nawo. Nawo ho wosuma kukutaziliza mu wituma mulimo wo wulanjilizi we wanhu wawa, nagwe holeka si kowudinghula mulimo wuwo kanyhi wuli wene yaye.

¹⁸ Alu, walonjele wanhu wutye, ‘Ale mwiyezaje, mwiwikanize, vyono i mitondo, motuga nyama mulye. Hambi Muwaha Mulungu nha kakondya kuwuhulika wung'ung'ulice wenyu, hamonga no wulonje wenyu wo kutya vyono mwina wuhile wo kulya nyama, na kanyhi vyono, mwamotaga lono mwali ku Misili. Aluno Muwaha Mulungu komupelenyi nyama, nanye moyilya.

¹⁹ Ninga si moyilya, mwi'zuwa limonga du hamba vilo vyejete, hamba vilo vihano, hamba vilo yikumi, hamba vilo makumi mejete du, a, a, ng'o.

²⁰ Langa mojendelela kulya nyama sunga mwezi mututu. Sunga nyama yilawile mu zi mhula zenyu, sunga muwe kudeka no kudeka. Nazo zizi zomwijelelenyi, vyono anye, mwamulema Muwaha Mulungu wenyu mono yali bahano hamonga nanye, kanyhi mukung'ung'ulika no kutya, vyono, yali yiwe yili ciba hono mwali mwikale ku Misili.’ ”

²¹ Musa yakamulonjela Muwaha Mulungu yakatya, “Alu ahano, nina wanhu elufu magana mutandatu cititila, wono nghuwalongoza, nagwe ho wukutya vyono kowapela nyama yono yowakwila walye mwezi monga?

²² Wukwihwesa yali yiwe yili ciba wawulajilwe ng'ombe hamba ngholo, ho ziwakwile? Hamba somba zose za mwi'lenga zowakwila?”

²³ Nayo Muwaha Mulungu yakamupitula Musa yakamutya, “Wukwihwesa vilungo vyangu ane, vina cimizi? Nagwe kowona lulu baha du vyono, zono nonjile zokwijela hamba ng'o!”

²⁴ Musa yakawa kubita kuwalonjela zose zono Muwaha Mulungu yazilonjile. Yakawakonghola walongola makumi mupunghati, yakawatandalika wose wapilime Lihema.

²⁵ Nayo Muwaha Mulungu yakawa kuziza mwi'vunde, yakawa kulongana na Musa. Muwaha Mulungu yakasola muhe wunji muli Musa, wono yali yamupelile Musa. Yakawa kuwagawila wa walya walongola we makumi mupunghati. Kukawa, muhe wali weza kuwatimila, hobaho wakawa kwanza kuwila nhe wawizi, ninga si wasola yidaha mututu yaye.

²⁶ Nawo wanhu wejete wa muli walongola wawalya we makumi mupunghati, Elidadi no muyagwe Medadi, wene si walawila mu nghambi ho wabite kwi 'Hema. Ninga hamba nhavivyo, muhe yawatimila nawo, nawo nhavivyo wakawa kwanza kuwila.

²⁷ U muzelelo yunji yakawa kubita musunho kuli Musa, yakawa kumumanyiza zizo za Elidadi hamonga na Medadi vyono wakuwila mu nghambi.

²⁸ Nayo Yoshuwa u mwana wa Nuni, mono ku wulawa wudodo wakwe yali yo mutazi wa Musa, yakamulonjela Musa yakatya, “Muwaha wangu Musa, wuwalemezaje ye!”

²⁹ Nayo Musa yakapitula yakatya, “Mwene Yoshuwa, alu wukumbonela wivu, hamba nhawule? Ane nyendile muno Muwaha Mulungu yawapele muhe wakwe wanhu wakwe wose, yawanoze wose wawe wawizi!”

³⁰ Hobaho Musa, hamonga ne walongola wawalya makumi mupunghati, wakawa kuwuya ku nghambi.

Muwaha Mulungu yakuleta Nghwale

³¹ Muwaha Mulungu yakaleta musunho mbeho mbaha, ne mbeho yiyo yikaleta nghwale ku wulawa kwi 'lenga, nazo zikawa ziguluciye hasika sika muno muno, kotya nha mita monga du ku wulawa hasi. Zikawa kumema mu nghambi mbavu zose, zibitile du muhinzo we'zuwa limonga winji wazo, ku wulawa ha nghambi.

³² Holeka mwi'zuwa lilyo, wanhu wajendelela kwibata nghwale du sunga likaswa, cilo cose sunga wukela, sunga ne mitondo yaco. Hamba hasina munhu monga mono yebata nyhefu hasi ya kilo elufu monga. Wakawa kuzitandalika mwi'zuwa mu nghambi yose ho zinyale.

³³ Na lono wali wakali watuga nyama nyinji zo kulya, Muwaha Mulungu yakawakolelwa muno yikuwo, yakawahuga muno no wutamwa we lihuhuji.

³⁴ Ne litagwa lye hanhu baho, hakacemwa Kibuloti-hatava (wo wutya, “Vitenjelo vye Wasulumizi.”) wazikwa i wanhu wo wusulumizi wa nyama.

³⁵ Wali weza kuwuka baho, wakabita ku Hazeloti wakayisimya nghambi kuko.