Wuwale 10 - Luganuzi Luswanu Kuli Wanhu Wose 2002

Ndulele za fweza

¹ Muwaha Mulungu yakamulonjela Musa yakatya,

² “Ale, wunoze ndulele nyejete za fweza yono nhyane. Nagwe wuzitumamile so wucemela wanhu wekongholele hamonga, na so wumwagula nghambi no kutuluka.

³ Na kolo zindulele zose vyono nyejete, zikujendelela kulilila hamonga yidaha mututu, mhuga yose ye wanhu, wekongholele hali 'gwe, ha mulango we Lihema lyangu lyono Lyelile.

⁴ Ninga langa, hono yilile ndulele monga du yidaha mututu, yiyo yowa so lucemo lwe walongola we milango, wekongholelele hamonga ha mwande yako.

⁵ Na hono ndulele zose zililile hamonga cidaha cidodo du, ale, we milango ya wono wekaye ku lubavu lwe cilima, watuluce.

⁶ Na kolo ndulele zikulila kanyhi lwe kejete, cidaha cidodo, ale, we milango ya wono wekaye ku lubavu lwe takama, nawo watuluce. Holeka wumanye vyono, ndulele zose zilile cidaha cidodo, so wumwagula nghambi no kutuluka.

⁷ Ninga lono wukuwacema mhuga yose hamonga, zindulele zilile sunga yidaha mututu.

⁸ Nazo zindulele, zeze kutowa ne wana wa Haluni i wakohani. “Kanyhi no wulajilize wuwu, wunojeye wukamiswe mu zindelo zenyu, sunga na mu vilo vyose vyono vikuza.

⁹ Mukumbucile vyono, hono wulugu wuwe wenjila mu yisi yenyu, nanye muwe kwihoma ne walugu wenyu wawo wono wakumwiwonelenyi, ale, mutowe zindulele ciwe co citanjilo ca vyono wulugu wenjila. Nane, no Muwaha Mulungu wenyu, nomuletelenyi wutazi, kanyhi nomuponyenyi mu wulawa mu miwoko ye walugu wenyu.

¹⁰ Na mu zi nyemo ze zi sikukuu zenyu, nha vyono mu myamulizo ye myezi, sunga na mu vilo vye zi sikukuu zinji zose ze ci dini. Mweze kutowa zindulele zizino, lono mweza kulavya vilavywa vyenyu vinyanywe, hamonga ne vilavywa vyenyu vyo mulamu. Nane nomupelenyi wutazi mwi'pango lilyo. Ane no Muwaha, u Mulungu wenyu.”

Waisilayeli wakuyimwagula nghambi

¹¹ Na mwizuwa lye makumi mejete lyo mwezi we kejete wa mu mwaka we kejete, ku wulawa mwi'zuwa lyono i wanhu wa Isilayeli wawucila mu yisi ya Misili, livunde lya hacanyha ye Lihema lyono Lyelile, likawa kunyasulwa.

¹² Nawo i wanhu Waisilayeli, wakawa kutuluka muhinzo wawo ku wulawa mu nyika ya Sinayi. Nalyo livunde likajendelela sunga likafika mu nyika ya Palani, likawa kwima baho.

¹³ Nawo wakawa kutulucila mu wulajilize wo Muwaha Mulungu wono yawalajiliziza muli Musa.

¹⁴ Na mu mapango gose lono watulukaga, watulukaga wetyatizye du mu wityatye wawo nha vyono wawezaga nhondo zose. Nawo wono wali wali hasi ye bendela ye cipuga, cono calongozwaga na wo mulango wa Yuda, wo wakawa walongozi ha wutuluce. Wakawa kwityatya vipuga vipuga hasi yo wulanjilizi wa Nahashoni u mwana wa Aminadabu.

¹⁵ Nayo Netaneli u mwana wa Zuwali, yakawa yo mulanjilizi wa wo mulango wa Isakali.

¹⁶ Nayo Eliyabi u mwana wa Heloni, yakawa yo mulanjilizi wa wo mulango wa Zabuloni.

¹⁷ Lihema likamwagulwa, ne wana we Wagelishoni ne Wamelali, wono wali wo wadinghuzi, wakawa kutuluka.

¹⁸ Hanyuma nawo wono wali wali hasi ye bendela ye mhuga ya wo mulango wa Lubeni, wakawa kutuluka wali vipuga vipuga, wali wali hamonga na Elizuli u mwana wa Shedewuli, yakawa yo mulanjilizi wawo.

¹⁹ Nayo Shelumiyeli, u mwana wa Zulishadayi, yakawa yo mulanjilizi wa wo mulango wa Simiyoni.

²⁰ Nayo Eliyasafu u mwana wa Dewuyeli yakawa yo mulanjilizi wa wo mulango wa Gadi.

²¹ Hanyuma ho Walawi i wana we cilume we Wakohati, nawo ho watuluce, akuno wadinghuye hamonga ne vinhu vyono vyelile. Na mwipango lyono woficila ku nghambi yono wakubita, wokwagana Lihema nalyo lyowa lyakondya kukomwa.

²² Hanyuma kanhyi, nawo wono wali hasi ye bendela ye cipuga cono cikulongozwa na wo mulango wa Efulayimu, nawo watuluce wali mu vipuga vipuga, wawe wali mu wulanjilizi wa Elishama u mwana wa Amihudi.

²³ Nayo Gamaliyeli u mwana wa Pedazuli, yakawa yo mulanjilizi wa wo mulango wa Manase.

²⁴ Nayo Abidani u mwana wa Gidiyoni, yakawa yo mulanjilizi wa wo mulango wa Benyamini.

²⁵ Na ha ndumilizo yayo, wono wali wali hasi ye bendela ye we mhuga yono yalongozwaga na wo mulango wa Dani, wono wali nha wo wetumami wono wawalanjililaga no kuwadima i wayawo wose, nawo ho wakawa kutuluka wali vipuga vipuga, wakawa hamonga na Ahiyezeli u mwana wa Amishadayi, yakawa yo mulanjilizi wawo.

²⁶ Nayo Pagiyeli u mwana wa Ocilani, yakawa yo mulanjilizi wa wo mulango wa Asheli.

²⁷ Na Ahila u mwana wa Enani, yakawa yo mulanjilizi wa wo mulango wa Nafutali.

²⁸ Na wuwu wukawa wo wityatye wo wutuluce wawo mhuga na mhuga, lono Waisilayeli wayimwagulaga nghambi, na lono watulukaga.

²⁹ Nayo Musa yakamulonjela mulamuwe Hobabu, u mwana wa Yetelo Mumidiyani, yakamutya, “Gwe mbuyane, alu ceza cili behi no wutuluce, wo kubita ku yisi yono Muwaha Mulungu yacilonjela vyono kocipela. Hambi nha yehuwiza vyono kowamotya muno Waisilayeli. Holeka wuze cibitane nagwe, nase cohanga nagwe wumoteswe wetu.”

³⁰ Nayo Hobabu yakapitula yakatya, “Ng'o mbuyane, ane langa, nowuya du ku yisi yangu.”

³¹ Nayo Musa yakatya, “Gwe mbuyane, dedede, cilece kwileka ye. Hambi agwe nha wuhamanyile ne hanhu hono coyisimya nghambi yetu mu nyika, holeka agwe yo kowa mutonji wetu.

³² Hono cibitane nagwe, mbeka cosuma kumota hamonga nagwe, u wulugutwe wono u Muwaha Mulungu kocimotya.”

Wutuluce we wanhu

³³ Nawo wanhu wali weza kuwuka he 'tunda lyono lyelile lya Sinayi, wajenda vilo vidatu. Nalyo Lisanduku lye Cilagane lyo Muwaha Mulungu, nhondo zose lyawalongolelaga ku mwande, ho liwatonje i hanhu hono woyisimya nghambi yawo.

³⁴ Nawo lyono wawukaga mu nghambi ayi no kubita kanyhi mu nghambi yinji, livunde lyo Muwaha Mulungu lyekalaga lili hacanyha yawo mu misi yose.

³⁵ Na mwipango lono Lisanduku lye Cilagane lyatulukaga, Musa yalongaga yakutya, “Ale, winuce go Muwaha Mulungu, wuweyagaze walugu wako, nawo wono wakusulile, wose wakutize 'gwe!”

³⁶ Na lono likwima, yalongaga yakutya, “Ale, Muwaha Mulungu wuwawuyilaje i maelufu na maelufu ge wanhu we zimhuga ze Waisilayeli.”