Wutuluce 9 - Luganuzi Luswanu Kuli Wanhu Wose 2002

Ligazo lye hano Wufwe we mitugo

¹ Muwaha Mulungu yakamulonjela Musa yakatya, “Alu, wubite kuli mutemi Falawo wukamulonjele wutye, ‘Muwaha Mulungu, u Mulungu we Wahebelaniya, yakutya nhavi, wuwakombole wanhu wangu, wabite wakahembe.

² Na hono wuleme kanyhi kuwakombola, ale,

³ nane nokuletela wulipicizwe wa nhamwa 'mbi muno muno, mu mitugo zako, na mu zindogowe zako, na mu zifwalasi zako, na mu zingamiya, na mu zing'ombe, na mu zingholo, sunga na mu zimhene.

⁴ Ninga nowika wisimajile muli mitugo ye Waisilayeli na muli mitugo ye Wamisili, hasina mutugo hamba wumonga we Waisilayeli wono wofwa.

⁵ Nane, nene no Muwaha Mulungu, nozifisiliza zizi mitondo mu yisi yose.’ ”

⁶ Ne mitondo yaco, Muwaha Mulungu yakawa kuzinoza nha vyono yali yalonjile, ne mitugo zose ze Wamisili zikafwa, ninga hasina mutugo hamba wumonga we Waisilayeli wono wafwa.

⁷ Nayo mutemi Falawo yakawuza ho yamanye zono ziweye, nayo yakalonjelwa nha vyono, hasina mutugo hamba monga we Waisilayeli wono wufwiye. Ninga hamba nhavivyo, Falawo yikacila kuwa yisina cihuliko, hamba si yawakombola wanhu wabite yaye.

Ligazo lyo mutandatu Mapu

⁸ Hanyuma kanyhi Muwaha Mulungu yakawalonjela Musa na Haluni yakawatya, “Musole mavu ga mwi'kozo lyo moto mu maganza genyu, hanyuma Musa yagagumile mucanyha, ha meso go mutemi Falawo.

⁹ Nago mavu gago gokwiyagala mumo mucanyha, gowa nhe 'nghundi lipelupelu muno mu yisi yose ya Misili. Nago gowa mapu hanhu hose, gono govimba muno no kuhehemuka. Nago gowa muli wanhu sunga na muli mitugo zose.”

¹⁰ Nawo Musa na Haluni wakasola mavu, wakema hali mutemi Falawo. Musa yakagagumila mucanyha, nago gakawa mapu gono gavimba muno muli wanhu, sunga na muli vilimu vyose.

¹¹ Ne waganga hamba si wasuma kanyhi yaye kwima hali Musa, hambi wose nha wali wavimbile mapu gose, nha vyono wali wavimbile Wamisili wose.

¹² Ninga hamba nhavivyo, Muwaha Mulungu yakamunoza mutemi Falawo yawe yasina cihuliko, nha vyono Muwaha Mulungu yali yalonga yakutya, vyono mutemi Falawo, si kowahulika Musa na Haluni.

Ligazo lyo mupunghati Mvula ye mabwe

¹³ Kanyhi Muwaha Mulungu yakamulonjela Musa yakatya, “Ale wilawaje mitondo hakali mitondo muno muno, wubite kuli mutemi Falawo wukamulonjele wutye, u Muwaha Mulungu, u Mulungu we Wahebelaniya, yakutya nhavi, ‘Wakombole wanhu wangu wabite wakahembe.

¹⁴ Kanyhi wumanye nhondo vyono muhinzo wuwuno, hamba si nowalipiciza wetumami wako wali wene du, langa nokulipiciza sunga na gwegwe go mweneco, nagwe ho wumanye nha vyono hasina hamba monga mono yinze yiyino yose, mono yehwanile nene no Muwaha Mulungu.

¹⁵ Na hono nali nitumamile vilungo vyangu vyose, nghutowe gwegwe, hamonga ne wanhu wako, mu nzila yo kukuletela nhamwa, mbeka wali wongomelele lukulu.

¹⁶ Ninga lu ho nghulajile vilungo vyangu, holeka nghuwicile sunga nalu wuli mumi, u lukumyo lwangu ho lusume kwijela mono'nze mose.

¹⁷ Ninga sunga nalu agwe wukali du wusina cihuliko, hamba si wukusaka no kuwakombola wanhu wangu wabite ng'o.

¹⁸ Alu nhondo mu muhinzo wu wuno, i mitondo, noleta mvula ya mabwe, mvula yono yikali si yinawa hamba kamonga mono yisi ya Misili ku wulawa wulawo sunga nalu.

¹⁹ Holeka, alu wulajilize mitugo zako, hamonga ne vinhu vyako vyono vili mwi'hala, vyose vigomolwe mono kaya. Hambi mvula ye mabwe, nha yowatonyela wanhu hamonga ne mitugo, na muli vyose vyono vyowa kunze mwi'hala, navyo vyose vyofwa.’ ”

²⁰ Nawo wanji wa muli wetumami wakwe, wakenjilwa na woga wuwaha muno ku soko ye zinghani zizi zono Muwaha Mulungu yalonjile. Holeka wakawatuma wetumami wawo wazigomole mitugo zawo wazinjize mu zikaya.

²¹ Ninga hamba nhavivyo, wanji hamba si wazicelelela yaye zizo zono Muwaha Mulungu yawasugula. Wakazileka mitugo zawo hamonga ne wetumami wawo kuko kwi'hala.

²² Muwaha Mulungu yakamulonjela Musa yakatya, “Ale wugolole muwoko wako kucanyha, ne mvula ye mabwe yotonya mu yisi yose ya Misili, nayo yowatonyela wanhu, ne mitugo, sunga na mu vilimwa vyose vya mu migunda.”

²³ Musa yakagolola nghome yakwe kucanyha, nayo Muwaha Mulungu yakaleta mabalalusi, hamonga ne mvula ye mabwe, ne mamuli gakawa kukoma ho hasi.

²⁴ U Muwaha Mulungu yakatonyeza mvula mbaha muno ya mabwe, hamonga ne mamuli gono gamulikaga ako na ako. Ne mvula yiyo yikawa mbaha muno mu yisi yose, kuciza nghango yono yikali hamba si natonya mu yisi ya Misili ku wulawa wulawo.

²⁵ Ne mvula yiyo ye mabwe, yikavihodanga vinhu vyose vyono vyali vili mwi'hala caka, na mu migunda mu yisi yose ya Misili, hamonga ne wanhu ne mitugo zose. Kanyhi yikavibenanjiza ne vilimwa vyose vya mu migunda, sunga ne mibici yose.

²⁶ Ninga ku Gosheni ku yisi yono wekalaga Waisilayeli, ako mvula yiyo ye mabwe, hamba si yatonya yaye kwali kukavu du.

²⁷ Mutemi Falawo yakatuma munhu yakawacema Musa na Haluni, yakawatya, “Aluno ane nakondya kwituma wubi, u Muwaha Mulungu yo we ling'ani yali wene, ninga ane ne wanhu wangu, wose cili wabi.

²⁸ Holeka mumulombe Muwaha Mulungu! Hambi mvula ye mabwe hamonga ne mabalalusi gayo, nha vyacila muno! Nane nghwihuwiza vyono, nomukombolenyi mubite, hamba si mojendelela kanyhi kwikala bahano.”

²⁹ Nayo Musa yakamutya Falawo, “Lono nghulawila kunze ye likaya du, nonyasula kucanyha miwoko yangu nimulombe Muwaha Mulungu. Nago mabalalusi gowuka lwa kamonga, sunga ne mvula ye mabwe howa hasina kanyhi, nagwe baho ho komanyila vyono yinze yose yo sawo yo Muwaha Mulungu.

³⁰ Ninga manyiye lukulu vyono gwegwe go mweneco, hamonga ne wetumami wako, wose nyenye mukali musina cogopo co Muwaha Mulungu muli nyenye.”

³¹ Citani hamonga ne shayili, vyose vikabenanjizwa ne mvula ye mabwe, hambi shayili nha yali yakondya kutuga maso. Ne citani naco cali cina maluwa.

³² Langa wuhemba wo si wabenanjizwa yaye ne mvula yiyi ye mabwe, hambi cipango cayo co kupila nha cali cikali.

³³ Hodu Musa yakawa kuwuka hali Falawo, yakalawila kunze ye kaya, yakenula miwoko yakwe kucanyha, yakamulomba Muwaha Mulungu. Hobaho mabalalusi, hamonga ne mvula ye mabwe vikawuka lwa kamonga.

³⁴ Nayo Falawo yali yeza kuwona vyono mabalalusi hamonga ne mvula vyakondya kuwuka, hodu yakaliwuyila lizeze lyakwe kanyhi. Yakacila kuhodanga no kuyikamufya nhumbula yakwe. Mwene hamonga ne wetumami wakwe wose, wakawa wasina cihuliko hamba hadodo, kotya ha mwamulizo.

³⁵ Nayo yikawa nha vyono Muwaha Mulungu yali yalonga kuli Musa, vyono mutemi Falawo si kosuma kuwakombola Waisilayeli wabite.