Wutuluce 8 - Luganuzi Luswanu Kuli Wanhu Wose 2002

Ligazo lye kejete Madelu

¹ U Muwaha Mulungu yakamulonjela Musa yakamutya, “Alu, wubite kuli mutemi Falawo wukamulonjele wumutye, Muwaha Mulungu yakutya nhavi, ‘Wuwakombole wanhu wangu wabite wakahembe nene.

² Na hono wutye du wuleme kuwakombola, ale, noyilipiciza yisi yako, nogagumila madelu mu yisi yako yose.

³ Ne likolongo lye Nile lyomema madelu gose, nago gomatuka genjile mu kaya yako, na mu nyumba yako yono kugonaga, na mu citanda cako, na mu zinyumba ze wetumami wako, sunga na mu wanhu wako wose, na ha mafigwa hako, na mu viya vyako vyose vyo kutiwila wusaje.

⁴ Kanyhi gokutambala sunga na mu muwili wako gwegwe, ne wanhu wako, sunga ne wetumami wako wose.’ ”

⁵ Muwaha Mulungu yakamulonjela Musa yakatya, “Wumulonjele Haluni yasole nghome yakwe, yayinule mucanyha ye makolongo na mu vikolongo na mu malamba, gaze madelu gameme mu yisi yose ya Misili.”

⁶ Haluni yakayinula yiyo nghome mucanyha ye malenga gose ge Misili, ne madelu gakalawila menji muno, gakamema mu yisi yose.

⁷ Ninga nawo waganga wakanoza nhavivyo no wuganga wawo, nawo wakagalavya madelu menji, nago gakamema mu yisi yose.

⁸ Mutemi Falawo yakawacema Musa na Haluni, yakawatya, “Ale, mumulombe Muwaha Mulungu yagawuse gaga mabula, nane nowakombola wanhu wenyu, wabite wakamulavizye Muwaha Mulungu makumbiko.”

⁹ Musa yakamupitula Falawo yakamutya, “Ane nosangalala muno nghulombele. Agwe wunonjele du lidaha lyono kosaka ane nghulombele gwegwe, ne wetumami wako, hamonga ne wanhu wako. Ne madelu gose gowuka mu yisi yako, hasina hamba linji lyono lyosigala, langa mwi'kolongo lya Nile du mo gosigala.”

¹⁰ Nayo mutemi Falawo yakamupitula yakatya, “Ale, nhondo wunombelaje mitondo.” Nayo Musa yakatya, “Ale viswanu, nokwituma nha vyono wulombile. Nagwe nhondo, baho ho komanyila vyono, hasina mulungu yunji wo wose mono yehwanile no Muwaha Mulungu, u Mulungu wetu.

¹¹ Nagwe hamonga ne wetumami wako, hamonga ne wanhu wako wose, madelu gomuwucilenyi, hasina linji lyono lyosigala, langa mwi'kolongo lya Nile du mo gosigala.”

¹² Nawo Musa na Haluni wakawa kuwuka hali mutemi Falawo. Nayo Musa yakalomba kuli Muwaha Mulungu, ho yagawuse madelu gono yali yamugumilila Falawo.

¹³ Nayo Muwaha Mulungu yakanoza nha vyono Musa yalomba, ne madelu gono gali gali mu zikaya, na gono gali gali mwi'hala na mu migunda, gakafwa gose.

¹⁴ Nawo Wamisili wakagafwaguliza, wakagalundika malundo malundo mawaha muno, sunga ne yisi yose yikawa yina munungho mubi ku soko ye madelu.

¹⁵ Nayo mutemi Falawo, yali yeza kuwona vyono mabula gose gakondya kufwa, hodu yakawa kanyhi yasina cihuliko, nha vyono Muwaha Mulungu yalonga du yakutya, “Falawo hamba si kowahulika Musa na Haluni.”

Ligazo lye kadatu Mhani

¹⁶ Muwaha Mulungu yakamulonjela Musa yakatya, “Wumulonjele Haluni yagatowe manghundi ge yisi ne nghome yakwe, nago manghundi ga mu yisi yose ya Misili, gohunduka mhani.”

¹⁷ Haluni yakagatowa manghundi ne nghome yakwe, nago manghundi gose ge yisi yose ya Misili, gakahunduka mhani, gakenjila muli wanhu sunga na mu zi nimu mose.

¹⁸ Nawo waganga wakajela kunoza wuganga wawo ho mhani zijele, ninga wakalemegwa. Nazo zi mhani zikatagalila hanhu hose, na mu wanhu na mu zi nimu.

¹⁹ Nawo waganga nhondo wakamutya Falawo, “Gwe mutemi Falawo, azi zinozwa no Mulungu du!” Ninga Falawo yakacila kuwa yasina cihuliko, nha vyono Muwaha Mulungu yalonga du yakutya, “Falawo hamba si kowahulika Musa na Haluni.”

Ligazo lye kane Mahazi

²⁰ Muwaha Mulungu yakamulonjela Musa yakatya, “Ale, wilawaje mitondo hakali mitondo muno muno, wuketang'anile no mutemi Falawo lono yakubita kwi' kolongo. Nagwe wumulonjele wutye, Muwaha Mulungu yakutya nhavi, ‘Wuwakombole wanhu wangu wabite wakahembe.

²¹ Nane nghukusugula nghutya, hono wuleme du, ale, nokuletela gwegwe mahazi, mu wetumami wako, na mu wanhu wako sunga na mu zikaya zako. Nazo zikaya zose ze Wamisili, zomema mahazi gose, sunga ne yisi yose yomema mahazi gose.

²² Ninga ku yisi ya Gosheni kono wekaye wanhu wangu, ako langa mahazi si gokwinjila yaye. Nane nozinoza zizi, agwe ho wumanye vyono yo nene no Muwaha Mulungu, mono nghuzituma zizi mono yisi yiyi.

²³ Nane nowika wisimajile kuli wanhu wangu na kuli wanhu wako. Ne lipoto lilino lyokwitumwa mitondo.’ ”

²⁴ Hodu, Muwaha Mulungu yakawa kugaleta mawumbi mawaha muno ga mahazi, gakenjila mu wikalo wo mutemi Falawo, hamonga na mu zinyumba ze wetumami wakwe. Yisi yose ya Misili yikahodanjika ku soko ye mawumbi ge mahazi.

²⁵ Hanyuma nhondo, mutemi Falawo yakawacema Musa na Haluni yakawalonjela yakatya, “Ale mubite mukamulavizye makumbiko Muwaha Mulungu, u Mulungu wenyu, ninga yiweze bahano du mono yisi yiyino, mulece kubita kunji.”

²⁶ Nayo Musa yakamupitula Falawo yakatya, “Si yowa viswanu hamba hadodo hono citume nhavivyo. Hambi Wamisili nha si wokwendezwa yaye ne makumbiko getu, ge zimitugo zono comulavizya Muwaha Mulungu wetu. Na hono cizitumamile zimitugo zizi ciwakalaze Wamisili, so makumbiko gono cokumbicila hanhu hono wosuma kuciwona vyono cikunoza, mbeka wocitowanga ne mabwe sunga waciwulaje.

²⁷ Holeka langa, yicinojeye cibite ku nyika muhinzo wa vilo vidatu, kuko ko cikamulavizye makumbiko u Muwaha Mulungu, u Mulungu wetu, nha vyono mwene yacilajiliza.”

²⁸ Nayo mutemi Falawo yakatya, “Ale, viswanu, nomukombolenyi mubite mukamulavizye makumbiko u Muwaha Mulungu wenyu kuko ku nyika, ninga mulece kubita kutali muno muno. Ale munombelaje na nene.”

²⁹ Musa yakapitula yakatya, “Ale viswanu, nane nonoza mbela mbela, nimulombe Muwaha Mulungu, i mitondo mahazi gawuce mu wikalo wako, hamonga na mu wetumami wako, sunga na muli wanhu wako. Ninga wulanjilile, wulece kucikonga, kanyhi wuwalemeze wanhu walece kubita kumulavizya makumbiko Muwaha Mulungu.”

³⁰ Musa yakawuka hali mutemi Falawo, yakamulomba Muwaha Mulungu.

³¹ Nayo Muwaha Mulungu yakanoza nha vyono Musa yalomba. Mahazi gakawuka gose mu kaya yo mutemi Falawo, na kuli wetumami wakwe, sunga na kuli wanhu wakwe, si lyasigala hamba yihazi limonga yaye.

³² Ninga hamba no muhinzo wuwu, mutemi Falawo yakawa yasina cihuliko, hamba si yawakombola wanhu wabite yaye.