Wutuluce 7 - Luganuzi Luswanu Kuli Wanhu Wose 2002

¹ Muwaha Mulungu yakamutya Musa, “Ane nokunoza wuwe nha wuli Mulungu hali Falawo, nayo Haluni u muwahawo, kowa muwizi wako kuli Falawo.

² Nagwe wumulolosezaje Haluni zose zono nghukulajiliza, nayo yamulonjele mutemi Falawo yawalece Waisilayeli wawuce mumo mu yisi yakwe.

³ Ninga hamba nhavivyo, ane nomunoza Falawo yawe yasina cihuliko, nayo hamba si kohulika 'ne yaye, hamba noze vitanjilo ne mezino menji mu yisi ya Misili.

⁴ Nane noyiletela Misili wusungu wukali muno muno wo wulipicizwe, niwawuse ne nghungugo ye wanhu wangu Waisilayeli mu yisi yiyo.

⁵ Nane kolo nawenulila muwoko wangu, no kuwawusa Waisilayeli mumo mu yisi yawo, nawo Wamisili ho womanya vyono ane yo nene Muwaha Mulungu.”

⁶ Nawo Musa na Haluni wakanoza nha vyono Muwaha Mulungu yawalajiliza.

⁷ Nayo Musa yali yaficila myaka makumi munana, nayo Haluni myaka makumi munana na midatu, baho lono walonganila no mutemi Falawo.

Nghome ya Haluni

⁸ Muwaha Mulungu yakawalonjela Musa na Haluni yakatya,

⁹ “Hono mutemi Falawo yasace kuwona mapoto ho yamwihuwilenyi, ale, wumutyaje Haluni yayigumile nghome yakwe ha mwande yo mutemi, nayo yohunduka nzoka.”

¹⁰ Musa na Haluni wakawa kubita ko mutemi Falawo, waketuma nha vyono Muwaha Mulungu yawalajiliza. Haluni yakayigumila nghome yakwe, ha mwande yo Mutemi Falawo hamonga ne wetumami wakwe, nayo nghome yikahunduka nzoka.

¹¹ Nayo mutemi yakawa kuwacema wanhu we mahala, ne wahawi, hamonga ne waganga. Nawo ko wuganga wawo, wakanoza nhavivyo.

¹² Wakazigumila hasi zinghome zawo, nazo zikahunduka nzoka. Ninga nghome ya Haluni yikazimela zose.

¹³ Hamba nhavivyo, Falawo vyo yakacila kuwa yasina cihuliko, yikawa nha vyono Muwaha Mulungu yalonga yakatya, mutemi Falawo si kowahulika Musa na Haluni.

MAGAZO YIKUMI Ligazo lilongozi Sakami

¹⁴ Muwaha Mulungu yakamulonjela Musa yakatya, “Gwe Musa, ayu mutemi Falawo mukamu muno ku wuhulice, kanyhi vyo yakali du yakulema kuwakombola wanhu wabite.

¹⁵ Holeka alu, wubite witang'anile nayo hakali mitondo, lono yakubita kwi'kolongo lye Nile. Ninga weze wina ne nghome yiyilya yono yahunduka nzoka. Nagwe wumulindilile ha nyenje ye likolongo.

¹⁶ Hanyuma wumulonjele wutye, ‘U Muwaha Mulungu, u Mulungu we Wahebelaniya, kanhuma nize nghulonjele, wuwakombole wanhu wakwe wabite ho wamuhembe kuko ku nyika. Ninga agwe sunga nalu wukali si wukuhulika ng'o.

¹⁷ Holeka alu wulanje, ane nogatowa malenga ga mwi'kolongo lya Nile ne nghome yono yili mu muwoko wangu, ne malenga gohunduka sakami.

¹⁸ Ne zisomba zono zili mwikolongo zose zofwa. Nalyo likolongo lyonungha vibi, sunga ne Wamisili si wosuma kung'wa hamba ne malenga galyo. Na muli zizi nagwe mo komanyila vyono ane nili Muwaha Mulungu.’ ”

¹⁹ Muwaha Mulungu yakamulonjela Musa yakatya, “Ale, wumulonjelaje Haluni yasole nghome yakwe, yagolole muwoko wakwe, yayinule nghome mucanyha ye makolongo gose, na mu vikolongo, sunga na mu vilamba, na mu malamba, mu yisi yose ya Misili. Nago malenga gono gali mumo, gose gohunduka sakami. Nayo sakami yowa mu yisi yose ye Misili, na mu viya vye mabici, sunga na mu viya vye mabwe.”

²⁰ Musa na Haluni wakanoza nha vyono Muwaha Mulungu yawalajiliza. Haluni yakenula nghome yakwe ha meso go mutemi Falawo, na ha meso ge wetumami wakwe, yakagatowa malenga ga mwi'kolongo, nago malenga gose gono gali gali mwi'kolongo gakahunduka sakami.

²¹ Ne zisomba zono zali zili mwi'kolongo, zose zikafwa. Ne likolongo likanungha vibi, ne Wamisili hamba si wasuma kanyhi kung'wa ne malenga galyo. Nayo sakami yikawa hanhu hose mu yisi yose ya Misili.

²² I waganga wa mu Misili nawo, wakanoza nha vivyo no wuganga wawo. Na ku soko yiyo, nhondo mutemi Falawo ho yakacila muno muno kuwa mukamu ku wuhulice. Yikawa nhavivilya du vyono Muwaha Mulungu yali yalonga. U mutemi yakalemela lukulu kuwahulika Musa na Haluni.

²³ Mwene Falawo yakawa kubita ku kaya yakwe yo wutemi, hamba kutinuswa yaye ne nghani yiyo.

²⁴ Nawo Wamisili wakawa kuhimba ha nyenje ye likolongo lya Nile, ho wetujile malenga go kung'wa, hambi nha si wasuma kung'wa malenga ga mwi'kolongo.

²⁵ Vikapuluta vilo mupunghati, ku wulawa mwi'zuwa lyono Muwaha Mulungu yagatowela malenga ga mwi'kolongo.