Wutuluce 5 - Luganuzi Luswanu Kuli Wanhu Wose 2002

Musa na Haluni wakumubitila mutemi wa Misili

¹ Baho, Musa na Haluni wakawa kumubitila mutemi we Misili, wakamutya, “U Muwaha Mulungu, u Mulungu we Waisilayeli yakutya nhavi, ‘Wuwakombole wanhu wangu wabite, ho wasume kunozeza lizuwa lye nyemo mu nyika so cogopo ca kuli'ne.’ ”

² Nayo mutemi yakawawuza yakatya, “Alo yuyo Muwaha Mulungu yo nani nayo? Hamba nosuma nhawule kumuhulika ho niwakombole Waisilayeli wabite? Ane si nghumumanya yaye yuyo Muwaha Mulungu, hamba si nosuma kuwalecela lukulu Waisilayeli wabite.”

³ Nawo Musa na Haluni wakapitula wakatya, “U Mulungu we Wahebelaniya kelajila kuli'se. Holeka wucikombole vilo vidatu, cibite ku nyika cikamulavizye makumbiko u Muwaha Mulungu, u Mulungu wetu. Vyono hono cilece kwituma nhavivi, mwene kociwulaga ase wose so matamwa hamba ko wulugu.”

⁴ Nayo mutemi yakawatya Musa na Haluni, “Alu mwene nye, alo co cicici, mukuwanoza wanhu walece kwituma milimo yawo? Walecenyi wawo wetumami wajendelele ne milimo yawo!

⁵ Alu, ta mulanje, vyono anye mweza muli wenji muno kuciza sunga ne Wamisili, alu kanyhi mukusaka mulece kwituma milimo!”

⁶ Na mwizuwa lilyo, mutemi Falawo yakawalajiliza wemilizi we Cimisili, hamonga ne wanyamhala we Ciisilayeli, yakawatya,

⁷ “Mulecele lukulu kuwapela kanyhi wanhu, mahanze go kuhanzahanza ne lilongo lyo kufyatula matofali, nha vyono mwali muzoweye kuwapela. Langa muwalekaje wabite wakelondolele weneco.

⁸ Ninga anye, musace wanoze liwalo lililya du lilongozi lye matofali, lilece kucepuka hamba litofali limonga bwete. Hambi nha wasina milimo yo kwituma, na yo soko yono yikuleka wakusaka niwakombole wabite wakamulavizye makumbiko Mulungu wawo!

⁹ Holeka muwetumyaje kwa vilungo muno, wawe mu mulimo mu mapango gose, ho walece kutuga kanyhi cilejeho co kuhuliciziza zinghani zo wulambi.”

¹⁰ Nawo i wemilizi, hamonga ne wanyamhala we Ciisilayeli, wakabita, wakawalonjela Waisilayeli wakatya, “Mutemi katya vyono, si kosuma kanyhi kumupelenyi mahanze go kunozeza matofali.

¹¹ Langa katya, vyono munojeye nyenye nyo weneco, mukelondolele gago mahanze ho hose hono mosuma kugatuga. Ninga hamba nhavivyo, mojendelela kunoza matofali ge liwalo lililya du.”

¹² Holeka wanhu wose wakawa kwiyagala ako na ako mu yisi yose ya Misili, mu wulondola gago mahanze.

¹³ Nawo i wemilizi wakeyoha kuwaswaswaniza, ho wasume kunoza nhondo zose liwalo lililya du lye matofali, nha vyono wanozaga lono wali wakali wakupegwa mahanze.

¹⁴ Nawo iwemilizi we Cimisili, wakawatowanga i wanyamhala we Ciisilayeli wono wawawika ho wawe walanjilizi we milimo, wakuwatya, “Alo nhawulenyi lu, si mukunoza liwalo lililya lye matofali lyono mwali kunoza halulongozi?”

¹⁵ Wanyamhala we Cisilayeli wakamubitila mutemi Falawo wakamung'ung'ulicila wakutya, “Alu mutemi, nhawule wukucitendela nhavivi?

¹⁶ Ase si cikupegwa yaye, mahanze go kunozeza matofali ninga hamba nhavivyo cikali kulonjelwa vyono cinoze matofali! Kunji kanyhi cikutowa. Ninga akuno kunji i wanhu wako weneco wo wali mu masutya.”

¹⁷ Nayo mutemi Falawo yakawapitula yakatya, “Lanjenyi ta, muli wadoba nye, hamba si mukusaka kwituma milimo yaye, na yiyi yo soko yono yikuleka mukusaka nimukombolenyi mukamulavizye makumbiko Muwaha Mulungu wenyu.

¹⁸ Alu hodu mubite mbela muketume milimo! Kanyhi hamba si mopelelwa lukulu mahanze go kunozeza matofali, ninga mukali munojeye munoze liwalo lililya lilongozi du lye matofali.”

¹⁹ Nawo wanyamhala wali weza kulonjelwa vyono, yiwanojeye wanoze matofali nhondo zose, ge liwalo lililya du, nhe liwalo lyono wanozaga ha lulongozi, hodu wakamanya nha vyono alu langa, weza wali mu wugaye wuwaha.

²⁰ Nawo wanyamhala lono wawukaga ha mwande yo mutemi Falawo, wakawagana Musa na Haluni wawalindiye.

²¹ Wakawalonjela Musa na Haluni, wakawatya, “U Muwaha Mulungu kaziwona zose zono mwitumile, holeka nayo komulipicizenyi, vyono mumunozize mutemi hamonga ne walongola wakwe wacisule 'se. Hambi nha mwawapela soko yo kuciwulajila 'se.”

Musa yakumung'ung'ulicila Mulungu

²² Musa yakawuya kuli Muwaha Mulungu, yakatya, “Gwe go Muwaha Mulungu, alu nhawule wukuwaletela magazo wanhu wako? Hamba socici wukanhuma ho nize kukuno?

²³ Na ku wulawa nali neza kubita kuli mutemi Falawo, no kumuloloseza zono wanhuma, hodu nayo yakawa kwanza kuwatendela vibi. Nagwe hamba si wanoza cinji ho wuwakomboze!”