Wutuluce 4 - Luganuzi Luswanu Kuli Wanhu Wose 2002

¹ Nayo Musa yakamupitula Mulungu yakumutya, “Alu ma, yisolaga lunji Waisilayeli walece kunyihuwila, hamba kuhuliciza kuli zono nghuzilonga. Alu 'ne ho nonoza wule, hono watye vyono agwe go Muwaha Mulungu si wilajiye kuli'ne?”

² Muwaha Mulungu nayo yakamuwuza Musa yakatya, “Alu mwene mu muwoko wako wibate cici?” Nayo Musa yakatya, “Nibate nghome.”

³ Muwaha Mulungu yakatya, “Ale wuyigumilaje nghome yiyo hasi.” Musa yali yeza kuyigumila nghome yiyo hasi, nghome yikahunduka nzoka, nayo Musa yakawa kumangha yakuyitiza.

⁴ Mulungu yakawa kumutya Musa, “Musa, winamaje wuyibate nzoka ku mucila wayo, wuyinule kucanyha.” Musa yakenama, yakayibata nzoka mu mucila wayo, nayo yikapituka yikawa nghome kanyhi.

⁵ Hodu Muwaha Mulungu yakawa kutya, “Ale, wubite kuli Waisilayeli wukanoze nhavivyo, ho wehuwile vyono u Muwaha Mulungu we walezi wawo, u Mulungu wa Abulahamu no Mulungu wa Isaka no Mulungu wa Yakobo, mbeka kakulawila.”

⁶ Mulungu yakamulonjela Musa kanyhi yakatya, “Ale lu, winjize muwoko wako mugati ye kanzo yako wuwujelece ha mhambaga yako.” Musa yakamuhulika Mulungu, yakawa kunoza nhavivyo. Nayo yali yeza kuwulavyaniza muwoko wakwe, kumbe muwoko wose wukawa watuga wutamwa wo wukoma, wukawa weza muzelu swee nha cokaa.

⁷ Mulungu yakamutya kanyhi, “Ale, wuwinjizaje kanyhi le muwoko wako mugati ye kanzo yako, wuwujelece ha mhambaga yako.” Nayo Musa yakanoza nhavivyo, ninga muhinzo wuwuno yali yeza kuwulavyaniza muwoko wakwe, kumbe wukawa weza muswanu du telele, winha muwili wakwe wose.

⁸ Mulungu yakatya, “Ale, hono walece kukwihuwila hamba kukuhulika so lipoto lilongozi, ninga lipoto alino lyowanoza wakuhulice kamonga.

⁹ Ninga yiwezaga lunji so mapoto gagano gose vyono mejete, walece hamba kukwihuwila, na hono walemele lukulu kuzihulika zono wukuwalonjela, ale, wuneje malenga madodo ga mwi'kolongo lya Nile, wugamwaje hasi. Nago malenga gago, gohunduka kamonga baho hasi gawe sakami.”

¹⁰ Ninga Musa yakatya, “Ng'o Muwaha Mulungu, nghukunena wulece kunhuma nene, hambi waco'ne nha si nili mulonji, hamba nghali si nawa mulonji ku wulawa lono wamulila kulongana nane. Hambi ane nha nili muzito ku wulonje, nongaga nili mhola mhola, sunga no lulimi lwangu nalo luzito.”

¹¹ Muwaha Mulungu yakamutya Musa, “Gwe Musa, mwene mono kamupelaga munhu mulomo, nani? Hamba nani mono kamunozaga munhu kawa yali ciziwi, hamba kawa yali cibwibwi? Hamba nani mono kamupelaga munhu wuwone, hamba mono kamunozaga kawa yali cibofu? Alu wumanye vyono yo nene no Muwaha Mulungu mono nizinozaga zizo zose.

¹² Ale, holeka alu, wubite! Ane nokutaza mu wulonje wako, kanyhi yo nene mono nokupela zinghani zono kozilonga.”

¹³ Ninga hamba nhavivyo, mwene Musa yakapitula yakatya, “Gwe Muwaha Mulungu ng'o ye, dedede, nghukunena wutume munhu yunji.”

¹⁴ Na ku soko ya zizo nhondo, Mulungu yakamukolelwa Musa likuwo, yakawa kutya, “Alu mwene ma u muwahawo Haluni u Mulawi? Ane manyile vyono mwene mulonji, mono kosuma kulonga. Lanje nalu mbeka ayo yakuza yakuwone, nayo kosangalala muno kolo yakukuwona.

¹⁵ Holeka kosuma kulongana nayo no kumulonjela zose zono yanojeye yazilonje. Nane nowa nili hamonga nanye mu wulonje wenyu wose vyono muli wejete, nane nomwijizenyi zose zono mokwituma wose vyono muli wejete.

¹⁶ Nayo Haluni yo kowa mulonji wako, nayo yo kowa kulongana ne wanhu, kowa wo mulomo wako. Nagwe kowa nho Mulungu, mono kowa kumulonjela Haluni zono nayo kowa kuzilonga.

¹⁷ Holeka wusoleleze ne nghome yiyino, hambi nha yo yokupela wusume wo kunoza mapoto.”

Musa yakuwuya kanyhi ku Misili

¹⁸ Nayo Musa yakawa kubita kuli mukwewe Yetelo, yakawa kumulonjela yakutya, “Nghukunena wunghombole mbuye ku Misili ku wandugu zangu, mbite nghawalanje hono wakali womi hamba ng'o.” Nayo Yetelo mukwewe hamba si yamulemeza, langa yakamukombola no kumwilaga yabite.

¹⁹ Nayo Musa lono yali yakali mu Midiyani, baho Muwaha Mulungu yakamulawila yakamutya, “Ale Musa, wuwuye ku Misili, hambi wawalya wose wono wahilaga kukuwulaga nha wakondya kufwa.”

²⁰ Musa yakawa kuwasola mugolece wakwe, hamonga ne wanagwe, yakawapaciza mu ndogowe, yakawa kutuluka hamonga nawo, sunga ko ku Misili, yakayisola ne nghome yiyilya yono Mulungu yamulajiliza yayisole.

²¹ Muwaha Mulungu yakamulonjela Musa kanyhi yakatya, “Gwe Musa alu vyono weza kuwuya ku Misili, wugalajilaje hali mutemi mapoto gose gono nghupeleye vilungo vyo kwitumila, ninga wulanjilile, wulece kuleka hamba lipoto limonga yaye. Ninga hamba nhavivyo, ane nomunoza yawe yasina cihuliko. Nayo hamba si kosuma kuwakombola wanhu ho wawuce mu yisi ya Misili.

²² Baho nagwe wumulonjele Falawo wutye, ‘Ane no Muwaha Mulungu, yo nene mono nghutya nhavi, Isilayeli yo mwanangu we cilume u mwanangu mulongozi kulelwa.

²³ Nane nghukulonjela vyono, wumukombole mwanangu yabite, ho yasume kuhemba 'ne, ninga nagwe wukulema. Ale hono yili nhavivyo, alu nane nomuwulaga u mwanago mulongozi kulelwa.’ ”

²⁴ Na lono Musa yali yapanjile mu nghambi, mu nzila, lono yabitaga ku Misili, u Muwaha Mulungu yakamwagana Musa baho ha nghambi, yakasaka kumuwulaga.

²⁵ Nayo Zipola u mugolece wakwe, yakasola libwe yikali, yakamwalamya u mwanagwe we cilume, yakayisola yiyo nzunga yono yayitema, yakamupamiza Musa mu magulu gakwe ne nzunga yiyo.

²⁶ Na ku soko ye litumo lilyo lye calamo co mwanagwe, Zipola yakamutya Musa, “Agwe wuli mulume wangu so sakami yo walame.” Holeka nayo Muwaha Mulungu si yasaka kanyhi kumuwulaga Musa.

²⁷ Hanyuma Muwaha Mulungu yakamulonjela Haluni yakumutya, “Ale, wubite wuketang'anile na Musa ku nyika.” Nayo Haluni yakawa kubita, wakawa kwitang'anila na Musa he 'tunda lyono lyelile, nayo Haluni wali weza kwiwona na Musa, yakamunonela muno.

²⁸ Nayo Musa yakawa kumuloloseza Haluni zose zono Muwaha Mulungu yamulonjela, lono yamulonjelela vyono yawuye ku Misili, yakamuloloseza sunga na ze mapoto gono Muwaha Mulungu yamulajiliza yaganoze kuko ku Misili.

²⁹ Hodu Musa na Haluni wakawa kubita ku Misili, wakawa kuwakongholela hamonga i walongola wose we Waisilayeli.

³⁰ Nayo Haluni yakawaloloseza zose zono Muwaha Mulungu yamulonjela Musa. Nayo Musa yakawa kuganoza mapoto gose ha meso ge wanhu wose.

³¹ Nawo wanhu wakehuwila. Nawo wali weza kuhulika vyono Muwaha Mulungu kawaziza, kawona na vyono wakugazwa muno, hodu, wakenamya mitwe yawo hasi, wakahemba.