Wutuluce 27 - Luganuzi Luswanu Kuli Wanhu Wose 2002

Cikumbicilo

¹ “Wunoze cikumbicilo ko mubici wo mukambala, naco cikumbicilo cico, ceze ciling'aniye mbavu zose wutali no wugazi wayo. Wutali wayo wuwe mita nyejete na lobo, no wugazi wayo nawo mita nyejete na lobo. No wima wayo wuwe mita monga na lobo.

² Hanyuma, wuciwicile ne viwoko vyo kucidinghulila, wuviwicile mu zinhuzi zose vyono yine ze cikumbicilo, navyo vyeze vityanilizwe hamonga ne cikumbicilo ceneco. Kanyhi wucihiliwe shaba cikumbicilo cico.

³ Wunoze ne viya vyayo vyose, viya vyo kuzolela mavu, koleyo, mabeseni, ne vicinyilo, ne visahani vyo kupalila moto. Ne vivya vivino vyose, wuvinozaje kwa shaba.

⁴ Kanyhi, wunoze lwavu lwa shaba, lono lowa lwina nyamwidole yine za shaba, mu zinhuzi zayo zose vyono yine.

⁵ No lwavu lulo, wulusopece mugati mu cikumbicilo, luwe ha ciligati ciligati co wima we cikumbicilo.

⁶ Wusese hamonga ne mahapa go kucipicila cikumbicilo, wugasese mu mubici wo mukambala, nago wugahiliwe shaba.

⁷ Hanyuma mahapa gako, wugakoze mu zi nyamwidole mu zimbavu zose ze cikumbicilo lono mukucidinghula.

⁸ Wunoze cikumbicilo ca mabici, ceze cikombe mugati cinye matuli, nhe cihwani cono nakulajila akulya kwi'tunda.”

Luwa ye Lihema lyono Lyelile

⁹ “Kanyhi, wunoze vyandaluwa kwa bafuta swanu, mbote, so Lihema. Ku lubavu lwa kutakama, vyandaluwa vyayo, vyeze vyo wutali wa mita makumi mane na yine.”

¹⁰ Ne vyandaluwa vivyo, vyeze vibatilizwe ne masumbili makumi mejete ga shaba, gono gena matende ga shaba, nhavivilya. Langa zindobogo ze masumbili gago, hamonga ne vinanicizo vyayo, viweze vya fweza.

¹¹ Ku lubavu lwa kusumuka, nako wunoze nha vyono wunozize ku lubavu lwa kutakama.

¹² No lubavu lwa kumwezi we luwa yiyo, lweze ne lipaziya lyo wutali wa mita makumi mejete na nyejete, ne masumbili gayo yikumi, hamonga ne matende gayo yikumi.

¹³ Nako ku lubavu lwa kucilima kono kowuli mulango we Lihema, luwa yayo, yiwe no wugazi wa mita makumi mejete na nyejete.

¹⁴ Nalyo lipaziya lyayo liwe no wugazi wa mita mutandatu na nusu, hamonga ne masumbili madatu, ne matende gayo madatu.

¹⁵ No lubavu luyagwe lo mulango, nako nhavivyo, kuwe ne lipaziya lyo wugazi wa mita mutandatu na nusu, hamonga ne masumbili madatu, ne matende gayo madatu.

¹⁶ Naho ha mulango we luwa, wuwice lipaziya lyono likangaye, lyono lina wutali wa mita yicenda, lyono yihonwe na mhuti ze liwala lye buluu, ne liwala lyo lugandu, ne liwala lidunghu, hamonga ne bafuta swanu, mbote. Kanyhi, lyeze yihonwe ko wunghula muno. Nalyo lipaziya lilyo, libatizwaje mu masumbili mane gono gena ne matende gayo mane.

¹⁷ Ne masumbili gose gono gapilime luwa yose, wugawopelezaje na sito za fweza, ne zindobogo zayo zose ziwe za fweza, langa matende gayo gawe ga shaba.

¹⁸ No wutali we luwa yiyo, wuwe mita makumi mane na yine kose kose, wugazi wayo wuwe mita makumi mejete na nyejete, no wima wayo wuwe mita nyejete na lobo. Candaluwa cayo, wucinoze kwa bafuta swanu, langa matende gayo hamonga ne zimambo zayo, ne zimambo ze luwa, avyo viwe vya shaba.

¹⁹ Vyombologoto vyose vyono kokwitumamila mwi'hema, ne zimambo ku so Lihema hamonga ne luwa yayo, vyose viwe vya shaba du.

Wulanjilizi we zi Tala

²⁰ “Hanyuma, wuwalonjele Waisilayeli wakuletele mafuta malengu so kwasiza tala, ho tala yiwe kwaka nhondo zose du.

²¹ Nayo Haluni hamonga ne wanagwe, wayiwice tala yiyo mugati ye Lihema lilyo lyono lyelile, kunze ye lipaziya lyono licitize Lisanduku lye Cilagane. Ne tala yiyo, yeze kwikala yacile ha mwande yangu vilo vyose cilo na misi. Ne lilajilizo lili, linojeye Waisilayeli walikamise mu zindelo zawo zose cibitilila.”