Wutuluce 26 - Luganuzi Luswanu Kuli Wanhu Wose 2002

Lihema lyono lyelile lyo Muwaha Mulungu

¹ “Wunoze Lihema lyono lyelile, wulinozaje kwa mapaziya yikumi gono mahone ne bafuta swanu yono mbote, hamonga ne zimhuti ze liwala lye buluu, na ze liwala lyo lugandu, na ze liwala lidunghu. Mapaziya gago, wugahonaje wugawicile hamonga ne cihwani ce makelubi ko wunghula.

² Mapaziya gose geze gena wutali wa mita yikumi na nyejete, wugazi wayo weze wa mita nyejete nyejete. Kanyhi gose gawe na cipimo cimonga du.

³ Wugalunzaje mapaziya mahano hamonga, mwi'fungu lilongozi, ne mahano mayagwe nago ge lifungu lye kejete, wugalunze hamonga.

⁴ Hanyuma, wunoze vinanicizo vye liwala lye buluu, wuvinanicize mwi'pindo lye lipaziya lya kumhelo ye lifungu lye kejete.

⁵ Kanyhi wuwicilile vinanicizo makumi mahano mwi'paziya lilongozi lye lifungu lilongozi, na vinji kanyhi makumi mahano, navyo wuviwicile mwi'paziya lya ku mhelo mwi'fungu lye kejete, navyo vinanicizo vyose vyeze vidomile.

⁶ Hanyuma yayo kanyhi, wunoze vidobogo makumi mahano vya zahabu, wuvitumamile ku wulunza gagalya mafungu mejete ge mapaziya, no kulinoza Lihema liwe lyo limonga.

⁷ “Hanyuma kanyhi wunoze cigubiko ce Lihema ca mucanyha yalyo. Wunoze cigubiko cico kwa mapaziya yikumi na limonga go wukunzeje we zimhene.

⁸ Ne mapaziya gose limonga limonga, geze gena wutali wa mita yikumi ne 'datu, no wugazi wa mita nyejete nyejete. Ne mapaziya gose gago, geze na cipimo cimonga du.

⁹ Hanyuma, wugalunze mapaziya mahano hamonga, ne mayagwe nago go mutandatu hamonga. Ne lipaziya lilyo lyo mutandatu, wulipetyaje kali kejete ha mwande ye lihema.

¹⁰ Wunoze vinanicizo vinji kanyhi makumi mahano, wuviwicile mwi'pindo lye lipaziya lya kumhelo ye lifungu lilongozi, na vinji kanyhi makumi mahano, navyo wuviwicile mwi'pindo lye lipaziya lya kumhelo ye lifungu lye kejete.

¹¹ Wunoze kanyhi vidobogo vinji, makumi mahano vya shaba, navyo vivyo, wuvinjize mu vinanicizo vye makumi mahano, ho wuvitumamile ku wulunza gagalya mafungu mejete ge mapaziya, no kulinoza lipaziya lye Lihema liwe lyo limonga.

¹² Ne lipaziya lyono lyosulutila lyono lyosigala, wulitumbice ku lubavu lwa kumhilimo ye Lihema.

¹³ Na azilya nazo zi sentimita ze makumi mahano mahano, zono zowa zisigaye mu mbavu zose zo wutali we Lihema, azo wuzitumbice mu zimbavu ze Lihema ho ziligubice Lihema.

¹⁴ “Kanyhi, wunoze ne cigubiko cinji ce Lihema, ceze ca nguwo ya nduwilu, cono cina liwala lidunghu, na mucanyha yayo, ceze cina cigubiko ca nguwo yono yidejepe viswanu.

¹⁵ Wusese mabici go mubici wo mukambala go kuzenjela Lihema.

¹⁶ Ne mabici gose, geze gena wutali wa mita yine yine, no wugazi wago Sentimita makumi mutandatu na mutandatu.

¹⁷ Ne mabici gose, wugasesaje gawe gena manghwasa mejete mejete go wulunzizo. Mabici gose limonga limonga, geze gena manghwasa.

¹⁸ Nagwe koganoza nhavi gago mabici ge Lihema, wusese mabici makumi mejete ku so lubavu lwa kutakama,

¹⁹ hamonga ne matende gayo makumi mane ga fweza, mono kogasimya mabici gago makumi mejete. Mu mabici gose, libici limonga liwe na matende mejete, i manghwasa gayo mejete ho gasume kusimywa mumo.

²⁰ No lubavu lwe kejete lwe Lihema, nha cinji ku lubavu lwa kusumuka, ako nako kokuseseza mabici makumi mejete,

²¹ hamonga ne matende gayo makumi mane ga fweza nhavivilya, nago gowa matende mejete mejete mu mabici gose limonga limonga.

²² No lubavu lwa ku mhilimo ya kumwezi ye Lihema, ako koseseza mabici mutandatu du.

²³ Kanyhi wunoze hamonga ne mabici ganji mejete gono kogasimya mu zinhuzi zi nyejete kuko ku mhilimo ye Lihema.

²⁴ Ne mabici gago ga mu mhelo yayo, wugalunzaje hamonga ku wulawilila hasi sunga ko kucanyha ku nyamwidole nongozi. Ne mabici ga mu mhelo yayo nago, wuganoze nhavivyo.

²⁵ Na mu nzila yiyo, gowa mabici munana hamonga, hamonga ne matende gayo yikumi na mutandatu ga fweza. Matende mejete mejete, mwibici limonga limonga.

²⁶ “Kanyhi wusese ne mahapa yikumi na mahano go mubici wo mukambala, geze mahapa mahano so mabici go lubavu lumonga lwe Lihema,

²⁷ na mahapa mahano so lubavu lwe kejete lwe Lihema. Kanyhi mahapa ganji mahano so mabici gono gali ku mhilimo ye Lihema, nha cinji ku lubavu lwe mwezi.

²⁸ Langa mucici wa hagati ye Lihema, kowujeleka weze wulawiye mhelo zose ze Lihema, ku wulawilila ku mhelo ayino sunga ko ku mhelo nzagwe.

²⁹ Mabici gose wugahiliwe zahabu, kanyhi wuganozeze gose nyamwidole za zahabu, zono zokwibata mahapa. Ne mahapa nago, wugahiliwaje zahabu nhavivilya.

³⁰ Nagwe kolizenga Lihema lilyo mu cihwani cono nakulajila akulya kwi 'tunda.

³¹ “Kanyhi wunoze lipaziya lyono yihone na bafuta swanu, mbote, hamonga ne zimhuti ze liwala lye buluu, na ze liwala lyo lugandu, na ze liwala lidunghu. Ne lipaziya lilyo, lihonwe liwicilwe ne cihwani ce makelubi ko wunghula muno muno.

³² Nagwe wulitumbice lilyo lipaziya mu mabici mane go mukambala gono mahiliwe zahabu, gono gena ne zinyamwidole za zahabu, hamonga ne matende ga fweza.

³³ Lipaziya, lilyo wulitumbikaje mu vidobogo. Hanyuma yayo, wuwe kulisola Lisanduku lye Cilagane, lyono lina zimbawo zinyejete zono zandicigwe malajilizo, wulinjize mumo mugati, ku mhilimo ye lipaziya lilyo. Nalyo lipaziya lilyo, lyowa nhe 'bupa lyono lyohatemanula Hanhu Hono Helile ne hanhu hono helile Helile muno.

³⁴ Na baho Hanhu Hono Helile Helile muno, wujelece lililya ligoda lyo lusungu mucanyha ye Lisanduku lye Cilagane, lyono lina zimbawo zi nyejete ze malajilizo mugati yalyo.

³⁵ Ne meza yiyilya yo mubici wo mukambala, nayo wuyiwice hanhu hono helile, wuyiwice kono sumuka yayo, nawo wuwiko we zitala, wuwuwice ha katakama yayo, viwe vidomile ne meza yiyo. Ninga meza yiweze kono sumuka yayo.

³⁶ “Kanyhi, wunoze lipaziya linji likangazi, lyo kucitiza mulango we Lihema. Wulinozaje na mhuti ze liwala lye buluu, ne liwala lyo lugandu, ne liwala lidunghu, hamonga ne bafuta swanu, mbote, kanyhi lyeze yihonwe ko wunghula muno.

³⁷ Wunoze kanyhi mabici mahano go mubici wo mukambala, nago wugahiliwe zahabu. Mabici gose, gawe gena vidobogo vya zahabu, kanyhi gose, limonga limonga, gawe ne litende lya shaba.”