Walawi 9 - Luganuzi Luswanu Kuli Wanhu Wose 2002

Haluni yakulavya makumbiko

¹ Vyali vyeza kupuluta vilo mupunghati, vyo wusiwanulwe wawo, mwizuwa lyo munana, Musa yakawa kuwacema Haluni ne wanagwe, hamonga ne wanyamhala wa Isilayeli.

² Yakawa kumulonjela Haluni yakatya, “Ale, wulete nzeku hamonga ne nduwilu nhelevu vyono visina cilema co cose, wuvilavye kuli Muwaha Mulungu. Wulavye nzeku so cilavywa co wubi, nayo nduwilu yiwe so cilavywa cinyanywe.

³ Hanyuma wuwalonjele nawo wanhu wa Isilayeli, walete mvulati so cilavywa co wubi, kanyhi walavye ne nyehe ya mwaka monga, ne nyana ye ngholo ya mwaka monga, zono nhelevu zisina cilema co cose, viwe so cilavywa cinyanywe.

⁴ Walavye kanyhi nzeku ne nduwilu, so cilavywa co mulamu. Kanyhi yiwanojeye walavye likumbiko lilyo kuli Mulungu hamonga ne cilavywa co wusaje wono muhanzahanzwe ne mafuta. Yiwanojeye wazitume zizi, vyono Muwaha Mulungu kokwilajila kuli wene izuwali.”

⁵ Nawo wakawa kuvileta vinhu vyose ha mulango we Lihema, nha vyono Musa yalajiliza. Ne wanhu wose wakehanguliza hamonga ho wamuhembe Muwaha Mulungu.

⁶ Nayo Musa yakawalonjela yakatya, “Muwaha Mulungu kamulajilizenyi mwitume zizi zose, holeka ne nhojo yakwe yomulawilenyi.”

⁷ Hanyuma yakamulonjela Haluni yakamutya, “Ale, wubite ha cikumbicilo, wukalavye cilavywa co wubi, hamonga ne cilavywa cinyanywe, so wubi wako winozeze wilamule, hamonga no wubi we wanhu. Wulavye cilavywa cico wuwanozeze wanhu wilamule, nha vyono Muwaha Mulungu yalajilize.”

⁸ Nayo Haluni yakawa kubita ha cikumbicilo yakawa kuyiwulaga nzeku yono yali so cilavywa co wubi wakwe mweneco.

⁹ Nawo wanagwe, wakawa kumupeleza sakami, nayo yakawa kuzabika cidole cakwe mu sakami, yakawa kuyimiza mu mahembe, mu zinhuzi zose ze cikumbicilo. Na yono yali yisigaye, yakayita hasi ye cikumbicilo.

¹⁰ Hanyuma yakawa kusola mhama, ne zifigo, ne nhandamala ya mwi'toga, yakawa kuvikongoga mucanyha ye cikumbicilo, nha vyono Muwaha Mulungu yamulajiliza Musa.

¹¹ Ninga nyama yose ne nyhingo yayo, avyo yakavikongojela kunze ye nghambi.

¹² Hanyuma yakawa kuwuwulaga mutugo wono wali so cilavywa cinyanywe. Nawo i wanagwe, wakawa kumupeleza sakami. Nayo yakawa kuyimiza mu mbavu zose vyono yine ze cikumbicilo.

¹³ Hanyuma wakawa kumupeleza mutwe wo mutugo, hamonga ne zinyama zinji, nayo yakawa kuvikongojela vyose mu cikumbicilo.

¹⁴ Yakawa kuwusola wutumbu ne vima vyayo yakavikwema, yakawa kuvikongojela mucanyha ye cikumbicilo hamonga ne cilavywa cinyanywe cono cali cisigaye.

¹⁵ Nhondo ho yakawa kusola vilavywa vye wanhu, yakawa kuvilavya. Nha cinji, yakavisola mhene yono yali so wubi we wanhu yakayiwulaga, yakayilavya mu nzila yono yetumamila mu wulavya cilavywa so wubi wakwe mweneco.

¹⁶ Yakawa kusola no mutugo we cilavywa cinyanywe, nawo yakawulavya nha vyono wali winha wulajilize.

¹⁷ Yakaleta ne cilavywa co wusaje, yakawumemya mwi 'ganza, yakawukongoga mu cikumbicilo. Na yiyi yali nyonjeza ye cilavywa cinyanywe ce nhondo zose.

¹⁸ Hanyuma yakawa kuyiwulaga nzeku, hamonga ne nduwilu, so cilavywa co mulamu kuli wanhu. Nawo wanagwe, wakawa kumupeleza sakami, nayo yakawa kuyimiza mu zimbavu zose vyono yine ze cikumbicilo.

¹⁹ Hanyuma yakawa kuyisola mhama yose ye nzeku, yakayiwika mugati mu ng'hwa yayo, mhama ye nduwilu, nayo yakayiwika mugati mu ng'hwa yayo.

²⁰ Yakawa kuvisejeleza ha cikumbicilo. Yakasola mhama zayo yakazikongoga mu cikumbicilo.

²¹ Ninga zi ng'hwa hamonga ne cima co mugulu wo kulume, Haluni, yakavinula, vikawa cilavywa cinulwe hali Muwaha Mulungu, navyo vikawa vye wakohani, nha vyono yalajilizwa Musa.

²² Nayo Haluni yali yeza kuwukondya mulimo wuwo wo kulavya cilavywa co wubi, ne cilavywa cinyanywe, ne vilavywa vyo mulamu, yakawa kuwagololela wanhu miwoko yakwe yakawa kuwalugutiza, hodu yakawa kutima mu wulawa mu cikumbicilo.

²³ Musa na Haluni wakenjila mwi 'Hema. Na lono walawilaga kunze ye Lihema, wakawalugutiza wanhu, ne nhojo yo Muwaha Mulungu yikawalawila wanhu wose.

²⁴ Nayo Muwaha Mulungu yakagumila moto nhinicizo, wukacitakamiza cilavywa cinyanywe hamonga ne mhama yose ya mu cikumbicilo. Nawo wanhu wali weza kuziwona zizo, wakazozeza wose hamonga, wakafugama, wakenamya wusu wawo sunga ho hasi.