Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Walawi 7 - Luganuzi Luswanu Kuli Wanhu Wose 2002


Cilavywa co wusutye

1 “Awu nawo wo wulajilize kuli cilavywa co wusutye, cono celile muno.

2 Mutugo wono wukulavywa ku so cilavywa cicino, yinojeye wuwulajilwe ku lubavu lwe sumuka ye cikumbicilo, i hanhu hono ziwulajilwaga mitugo ze cilavywa cinyanywe. Ne sakami yayo yimizizwe mu zimbavu zose vyono yine ze cikumbicilo.

3 Mhama yayo yose, yinojeye yiwuswe yilavywe mu cikumbicilo, hamonga ne mhama ya mu mucila wayo, ne mhama ya mu wutumbu,

4 ne zifigo ne mhama yazo, ne nhandamala ya mwi'toga.

5 Nayo mukohani yavikongoje vyose mu cikumbicilo, ciwe cilavywa kuli Muwaha Mulungu. Naco co cilavywa co wusutye.

6 No munhu wo wose we cilume wa mu mhuga ye wakohani, kosuma kuyilya nyama yiyo. Ninga yinojeye yililwe i hanhu hono helile, vyono yene yelile muno muno.

7 Kanyhi ko wuli wulajilize wono wihwanile na we cilavywa co wubi, ne cilavywa co wusutye, nha cinji, i nyama yayo yikuwa yo mukohani mono yetumile mulimo wuwo wo kuwunozeza wilamule.

8 Sunga ne nyhingo yo mutugo wuwo wono, walavywa so cilavywa cinyanywe, wowa wo mukohani mono yetumile mulimo wuwo we likumbiko.

9 Kanyhi, sunga ne vilavywa vyose vyo wusaje, vyono vikalinjigwe mu nyungu, hamba mu nghalango, vyowa vyo mukohani, mono yetumile mulimo wuwo we likumbiko kuli Muwaha Mulungu.

10 Ninga cilavywa co wusaje cono si cikalinje, hono ciwe cihanzahanzwe ne mafuta hamba ng'o, aci cowa so wakohani wose Walawi. Ninga yiwanojeye wagawane wose muling'ano.”


Cilavywa co mulamu

11 “Awu nawo wo wulajilize wa kuli vilavywa vyo mulamu vyono vikulavywa kuli Muwaha Mulungu.

12 Hono munhu yawe yakulavya cilavywa cono cinha ci cino, so kumulumba Mulungu, yimunojeye yalete cilavywa co mukate wono wusina cisase, hamba mikate yono yijinhaye yono mitelece ko wusaje wono muhanzahanzwe ne mafuta, hamba bisikuti zono zijidiywe mafuta, hamba keki zono nhelece ko wusaje wono muhanzahanzwe ne mafuta. Hamonga ne vivyo vyose, munhu yuyo yaleteleze no mutugo we likumbiko.

13 Ninga hamonga na zizo, munhu yuyo yadahile kulavya hamba mikate yono yina cisase.

14 Kosuma kuleta cibegulwa cimonga cimonga ku wulawa mu mikate ye mawala gose, yiwe co cilavywa cinulwe hali Muwaha Mulungu. Navyo vibegulwa vivyo, vyowa vyo mukohani mono koyisola sakami no kuyimiza mu cikumbicilo.

15 Ne nyama yo mutugo, yinojeye yiligwe mwi'zuwa lilyo du lono linozezwe likumbiko, yinji yilecele lukulu kusigala sunga wele hakali mitondo.

16 Na hono munhu yawe yakuleta cilavywa co mulamu ku so wilahize wakwe, hamba lunji ku soko vyono keyendela mweneco du, ale, si nghani yaye, hamba hono nyama yayo yilece kuligwa yose mwizuwa lilyo lyono yilavigwe, na hono nyama yiyo yisigale, yosuma kuligwa hamba mitondo yaco hakali mitondo.

17 Langa hono nyama yayo yinji yiwe yikali yisigaye sunga lizuwa lye kadatu, ale nyama yiyo yikongogwe mu moto.

18 Vyono nyama yiyo yono yowa yikali yisigaye sunga mwi'zuwa lye kadatu, hono yiligwe, Mulungu nayo hamba si kocivumila cilavywa cico co munhu yuyo. Ne cilavywa cico hamba si cosuma kuwalwa vyono yakondya kuhaliza, langa cowa iwifyo du, no munhu wo wose mono koyilya nyama yiyo, kotuga wulipicizwe so nghani yiyo.

19 “Ne nyama hono yiwe yipamize cinhu cocose cavu, yilece kuligwa yaye, langa yitakamizwe mu moto. Kanyhi munhu wo wose mono si yeyavufye, yuyo yo yadahile kulya nyama ye likumbiko,

20 ninga munhu mono yakondya kwiyavufya, hono yayilye nyama ye likumbiko, munhu yuyo si kowalilizwa kanyhi hamonga ne wanhu wo Mulungu.

21 Kanyhi munhu wo wose hono yayilye nyama yiyi ye cilavywa, lono yakondya kupamiza cinhu cavu, lunji mu wulawa muli munhu hamba mu mutugo, munhu yuyo si kowalilizwa kanyhi hamonga ne wanhu wo Mulungu.”

22 Muwaha Mulungu yakamupela Musa wulajilize awuno,

23 “Kuli wanhu wa Isilayeli yakatya. Walonjele wanhu wa Isilayeli vyono, walecele lukulu kulya mhama ya ng'ombe hamba ya ngholo, hamba ye zimhene.

24 Ne mhama yo mutugo wono wifwiliye weneco, hamba wono wuwulagwe ne zinimu, walece kuyilya. Langa mhama yiyo yosuma kwitumamilwa so mulimo wunji du.

25 No munhu mono koyilya mhama yo mutugo, wono wali mulavywe nha cilavywa ce ndigwa kuli Muwaha Mulungu, munhu yuyo si kowalilizwa kanyhi hamonga ne wanhu wo Mulungu.

26 Ne hanhu ho hose hono mowa kwikala, mulecele lukulu kulya sakami ye zindeje, hamba ye zimitugo.

27 No munhu wo wose mono kobena wulajilize wuwu, munhu yuyo si kowalilizwa kanyhi hamonga ne wanhu wo Mulungu.”

28 Muwaha Mulungu, kanyhi yakamupela Musa wulajilize awuno kuli wanhu wa Isilayeli yakatya,

29 “Munhu wo wose mono yakulavya cilavywa co mulamu, yimunojeye yalete cibegulwa cayo, ciwe co cilavywa cakwe co mulamu kuli Muwaha Mulungu,

30 kanyhi yimunojeye yacilete kwe miwoko yakwe mweneco nha cilavywa ca ndigwa. Yalete mhama yo mutugo wuwo hamonga ne nyama ye ng'hwa, ho yinulwe, yiwe cilavywa cinulwe hali Muwaha Mulungu.

31 Nayo mukohani yayisole mhama yayitakamize mu moto mu cikumbicilo, ninga nyama ye ng'hwa, ayo yowa ye wakohani.

32 Langa nyama yo mugulu we cima co kulume co mutugo,

33 ayo yapegwe mukohani yuyo, mono kokwituma mulimo we cilavywa ce sakami, hamonga ne mhama ye cilavywa co mulamu.

34 Nayo nyama ye ng'hwa yo mutugo wuwo cowa cilavywa cinulwe, hamonga nayo ne nyama yo mugulu we cima co kulume nyinulwe, navyo Muwaha Mulungu yakondya kuvisola ku wulawa mu wanhu wa Isilayeli, no kuwapela wakohani. Ne zinyama zizo, zo wanojeye wanhu wa Isilayeli wawe kuwapela wakohani vilo vyose.

35 Nalyo lyo ligawo lye ndigwa yono yilavigwe kuli Muwaha Mulungu, ndigwa yono yapegwa Haluni hamonga ne wanagwe, mwi'zuwa lyono wetililwa mafuta wawe wakohani.

36 Mwi'zuwa lilyo Muwaha Mulungu yawalajiliza wanhu wa Isilayeli, wawapele Haluni hamonga ne wanagwe, ligawo lili lye cilavywa. Ne lilajilizo lili linojeye wanhu wa Isilayeli walikamise vilo vyose.

37 Awu nawo wo wulajilize wa kuli cilavywa cinyanywe, ku so cilavywa co wusaje, ne cilavywa co wubi, ne cilavywa co wusutye, ne vilavywa co witilwe we mafuta, sunga ne likumbiko lye vilavywa vyo mulamu.”

38 Muwaha Mulungu yalonga na Musa kwi'tunda lye Sinayi, yakamupela malajilizo gaga, mwizuwa lono yawalonjela wanhu wa Isilayeli wawe kulavya vilavywa vyawo.

Cigogo Bible © Bible Society of Tanzania, 2002.

Bible Society of Tanzania
ကြှနျုပျတို့နောကျလိုကျပါ:



ကြော်ငြာတွေ