Walawi 6 - Luganuzi Luswanu Kuli Wanhu Wose 2002

¹ Muwaha Mulungu yakamulonjela Musa yakatya,

² “Cilavywa, cinojeye cilavywe lono munhu yamusutizya Muwaha Mulungu, so wulema kumugomolela Mwiisilayeli muyagwe, cinhu cono yaleceywe no muyagwe nha mupinga, hamba cono yamuhizize muyagwe,

³ hamba kwilahiza ko wulambi, yakutya vyono si yaciwene cinhu co muyagwe cono cajiliye.

⁴ Na hono munhu yasutye nghani monga muli zizi, yimunojeye munhu yuyo yahalize co cose cono yena, ku soko yo wula wihuwilwa wakwe.

⁵ Na mwi'zuwa lyono kokwijelela vyono musutyi, yowa yimunojeye munhu yuyo, yamuhalize cinhu mututu yuyo munya cinhu, kanyhi yowa yimunojeye yahalize hamonga no wonjeleze we ligawo lye nghango ye makumi mejete kwe 'gana.

⁶ Nayo yanojeye yalete kuli mukohani, nduwilu hamba mhene nhelevu yono yisina cilema co cose. Ciwe co cilavye co wusutye kuli Muwaha Mulungu. Ne cifo cayo, ciweze ca nghango ye mapesa gono gakwitumamilwa mwi Hema lyono lyelile.

⁷ Nayo mukohani komunozeza wilamule munhu yuyo so wubi wakwe. No munhu yuyo konenelwa wubi wakwe.”

Wulavye we cilavywa cinyanywe

⁸ Muwaha Mulungu yakamulonjela Musa yakatya,

⁹ “Ale wumulonjelaje Haluni hamonga ne wanagwe wutye, cilavywa cinyanywe, cinojeye cikongogwe mu cikumbicilo, cilo cose sunga wele. No moto wa mu cikumbicilo weze kwaka vilo vyose.

¹⁰ Nayo mukohani yavwale vivwalo vyakwe vyo wukohani, yavwale musweko we bafuta, hamonga ne suluwale ye bafuta. Hanyuma yazole mavu ga mu cikumbicilo gono gahangahanjile ne mafuta, yagamwaje baho hasi ye cikumbicilo.

¹¹ Hanyuma, yawe kukawaniza vivwalo vyakwe, yawe kugasola mavu gago, yawe kugamwaga hanhu haswanu hono hanojeye gamwagwe.

¹² Nawo moto wono wuli mu cikumbicilo, awo weze kujendelela kwaka du, wulece kulecelezwa hamba hadodo wuzime. Nayo mukohani yeze kujendelela kutajila zingwagu mucanyha yayo nhondo zose, hakali mitondo, hamonga ne cilavywa cinyanywe mumo mu cikumbicilo, no kukongoga mhama so cilavywa co mulamu.

¹³ Ninga yinojeye moto weze kwikala wacile du mu cikumbicilo nhondo zose, wulece kuzimila lukulu.”

Cilavywa co wusaje

¹⁴ “Awu nawo wo wulajilize wono wunojeye kuli vilavywa vyo wusaje. Yiwanojeye wakohani walawi, walavye cilavywa co wusaje kuli Muwaha Mulungu, wacilavizye ha mwande ye cikumbicilo.

¹⁵ Hanyuma yasole yiganza limonga lyo wusaje ne mafuta, yawunyunyile no wuvumba hacanyha yayo, ho yawe kuwukongoga mu cikumbicilo, ciwe co citanjilo nha vyono wusaje wose walavywa kuli Muwaha Mulungu. Ne mhunjile ye cilavywa cici yikwendeza kuli Muwaha Mulungu.

¹⁶ Nawo wakohani wosuma kuwulya wusaje wono wusigaye. Ninga wusaje wuwo, wunojeye wutelekwe mukate wono wusina cisase, kanyhi yinojeye wulilwe i hanhu hono helile, mugati ye luwa ye Lihema lyono lyelile.

¹⁷ Hambi Muwaha Mulungu nha yawakomboleye wakohani, liwe lyo ligawo lyawo mu ndigwa ye vilavywa. Nawo mukate wuwo, welile nha vyono celile i cilavywa co wubi, kanyhi nha vyono celile i cilavywa co wusutye.

¹⁸ Na mu vilo vyose vyono vikuza, i wana wose wa Haluni wowa kulya, nalyo lyowa lyo ligawo lyawo lyono lyojendelela, lye ndigwa yono yilavigwe kuli Muwaha Mulungu. Na munhu wo wose mono koyipamiza ndigwa yiyo yono yilavigwe, u munhu yuyo kotamiswa ne ndigwa yiyo ku soko yo wele wayo.”

¹⁹ Muwaha Mulungu yakamulajiliza Musa wulajilize awu,

²⁰ “Kuli zo witilwe mafuta we wakohani Walawi. Mwi'zuwa lyono yakwitilwa mafuta mukohani Mulawi, yimunojeye yalete kilo monga ya wusaje, yiwe co cilavywa cakwe kuli Muwaha Mulungu, yalavye nusu yayo, hakali mitondo, ne nusu nzagwe, yayilavye cinyamihe.

²¹ Ninga wusaje wuwo, wunojeye wuhanzahanzwe ne mafuta, wukalinjilwe mu cikalango. Na hanyuma, ho wuwe kuletwa hali Muwaha Mulungu, yiwe nha cilavywa co wusaje. Ne mhunjile yayo yikwendeza kuli Muwaha Mulungu.

²² Na mu vilo vyose vyono vikuza, yinojeye cilavywa cici ceze kulavywa no munhu wo wose wa mu wana wa Haluni, mono yakwitumama mulimo wo Wukohani. Ninga yinojeye cilavywa cico, ceze kukongojezezwa lukulu, hambi nha yikumbiko kuli Muwaha Mulungu.

²³ Kanyhi hasina cibegulwa co cose ca mu cilavywa co wusaje, cono mukohani yatelece, cono cosuma kuligwa, langa cinojeye cilavywa cico cikongogwe cose.”

Cilavywa co wubi

²⁴ Muwaha Mulungu yakamulonjela Musa,

²⁵ “Yamulonjele Haluni hamonga ne wanagwe, wulajilize wuwu kuli cilavywa co wubi. Cilavywa co mutugo wono wukulavywa so cilavywa co wubi, mutugo wuwo wunojeye wuwulajilwe ku lubavu lwe sumuka ye cikumbicilo, i hanhu hono yikuwa kuwulajilwa mitugo ye vilavywa vinyanywe. Na cici co cilavywa cono celile muno muno.

²⁶ No mukohani mono yakwituma mulimo wo kulavya cilavywa cico ce likumbiko lyo mutugo wuwo, yimunojeye yayilile nyama yayo i hanhu hono helile, mugati ye luwa ye Lihema lyono lyelile.

²⁷ Na co cose cono cowupamiza mudunhu wo mutugo wuwo cowa cela. Na hono mwenda wowose wukwile sakami yo mutugo wuwo, yinojeye mwenda wuwo wukakanzizwe i hanhu hono helile.

²⁸ Ne nyungu yo yose yono yotelecelwa nyama yiyo, yinojeye nyungu yiyo yitulwe. Na hono yiwe nyama yiyo yitelecelwe mu sufuliya, ale sufuliya yiyo, yinojeye yikwemwe ne malenga ko kuyikusuwa muno muno sunga yele swee.

²⁹ No munhu wo wose we cilume wa mu mhuga ye wakohani, kosuma kuyilya nyama yiyo ye cilavywa, nayo yelile muno muno.

³⁰ Ninga hono sakami yo mutugo wuwo yinjizwe mwi 'Hema no kwitumamilwa so mulimo wo kunoza wilamule, hodu nyama yayo yilece kuligwa na munhu yaye, langa yikongogwe yose mu moto.”