Walawi 4 - Luganuzi Luswanu Kuli Wanhu Wose 2002Cilavywa so masutya go kusutya wula kumanya 1 Muwaha Mulungu yakamulajiliza Musa, 2 “Yawalonjele wanhu wa Isilayeli vyono, munhu wo wose mono kosutya, no kubena lilajilizo limonga, lya muli malajilizo go Muwaha Mulungu wula kumanya, munhu yuyo yowa yimunojeye yatyatye wulajilize awuno. 3 Hono yiwe mukohani mweneco yo yasutya no kuwasutizya wanhu, yowa yimunojeye yalavye nzeku nhelevu, yamulavizye Muwaha Mulungu so wubi wuwo wono yawitumile. 4 Yayilete nzeku yiyo sunga ha mulango we Lihema lyono lyelile, yajelece muwoko wakwe mu mutwe wayo, yawe kuyiwulajila baho hali Muwaha Mulungu. 5 Hanyuma yayisole sakami nyhefu ya yiyo nzeku, yayitegule mwi 'Hema mugati. 6 Yazabice cidole cakwe mu sakami, yayimize kali mupunghati mwi 'bupa lyo mwenda lye hanhu hono helile. 7 Hanyuma yuyo mukohani yasole sakami yinji kanyhi, yayitajile mu mahembe ge cikumbicilo, mu zinhuzi zose ze cikumbicilo co kufusiza wuvumba mumo mugati ye Lihema. Ne sakami yono yowa yikali yisigaye, yayite hasi ha cikumbicilo ce vilavywa vinyanywe cono cili hanze yo mulango we Lihema lyono lyelile. 8 Nayo mukohani yasole mhama yose ya mu nzeku yiyo, ne mhama ya mu'nda, 9 ne zifigo ne mhama yayo, ne nhandamala yono yili mwi'toga. 10 Mukohani yavisole vinhu vivyo vyose yavikongojele mu cikumbicilo ce vilavywa vinyanywe, yanoze nha vyono kanozaga zi mhama zo mutugo wono wukuwa kuwulagwa so cilavywa co mulamu. 11 Langa nyhingo yayo ne nyama yose, no mutwe wayo, ne vima ne viwoko vyayo, ne nhumbula, ne mapupu gayo, hamonga no wutumbu wayo, 12 avi vyose yavisole yavitegule kunze ye nghambi, i hanhu haswanu hono wagamwagaga mavu, yavikongojele baho mucanyha ye zingwagu. 13 “Na hono yiwe mhuga yose ya Isilayeli wo wasutizye, no kubena lilajilizo limonga lyo Muwaha Mulungu wula kumanya, 14 no wubi wuwo vyono wukumanyika du, ale mhuga yose walete nzeku lwa kamonga, wayilavye cilavywa co wubi. Wayilete sunga he 'Hema lyono lyelile. 15 Nawo wanyamhala we mhuga, wajelece miwoko yawo mu mutwe we nzeku yiyo, hanyuma wawe kuyiwulajila baho hali Muwaha Mulungu. 16 Nayo mukohani yayisole sakami yayo yinji, yayinjize mwi 'Hema. 17 Yazabice cidole cakwe mumo mu sakami, yayimize kali mupunghati ku mwande ye libupa lyo mwenda. 18 Kanyhi yayitajile sakami yinji mu mahembe ge cikumbicilo, mu zinhuzi zose ze cikumbicilo co kufusiza wuvumba mumo mugati ye Lihema. Ne sakami yono yowa yikali yisigaye, yayite hasi ha cikumbicilo ce vilavywa vinyanywe, cono cili hanze yo mulango we Lihema. 19 Hanyuma yasole mhama yayo yose yayikongojele mucanyha ye cikumbicilo. 20 Mukohani yayinozezaje nzeku yiyo, nha vyono kanozaga mu nzeku yono yikuwa kuwulagwa so cilavywa co wubi. Na mu nzila yiyo, mukohani kowa yawanozeza wilamule, nawo wanhu wonenelwa wubi wawo. 21 Hanyuma yayisole nzeku yose mututu, yayitegule kunze ye nghambi, yakayikongojele kuko, yanoze nha vyono kakongogaga nzeku yono kalavyaga so wubi wakwe mweneco. Na cico co cilavywa co wubi so mhuga yenyu yose. 22 “Na hono mulongola yo yasutye, no kuwa musutyi so wubena lilajilizo limonga lyo Muwaha Mulungu wula kumanya, 23 ale, yimunojeye baho baho du lono yakumanya vyono yasutizye, yalavye cilavywa ca mvulati nhelevu yono yisina cilema co cose. 24 Nayo yajelece muwoko wakwe mu mutwe wayo, hanyuma yabite yayiwulajile ku lubavu lwe sumuka ye cikumbicilo kono wawulajilaga mitugo ye cilavywa cinyanywe. Hambi ayi nha cilavywa co wubi. 25 Nayo mukohani yazabice cidole cakwe mu sakami yiyo ye mvulati, yayibace mu mahembe ge cikumbicilo, mu zinhuzi zose vyono yine, hanyuma sakami yono yisigaye yayite baho hasi ye cikumbicilo. 26 Na hanyuma yawe kuyikongoga mhama yayo yose mu cikumbicilo, nha vyono kakongogaga mhama ye mitugo zose, zono zikuwa kulavywa no kuwulagwa so vilavywa vyo mulamu. Na mu nzila yiyi mukohani mo komunozeza wilamule so wubi, no mulongola yuyo konenelwa wubi wakwe. 27 “Na hono munhu yunji wowose yasutye no kubena lilajilizo limonga muli malajilizo go Muwaha Mulungu wula kumanya, 28 yimunojeye baho baho du lono yakumanya vyono yasutizye, yalavye cilavywa ce mhene nyhekulu nhelevu yono yisina cilema co cose. 29 Nayo yajelece muwoko wakwe mu mutwe wayo, hanyuma yabite yayiwulajile ku lubavu lwe sumuka ye cikumbicilo, kono wawulajilaga mitugo ye cilavywa cinyanywe. 30 Nayo mukohani yazabice cidole cakwe, mu sakami yiyo ye mhene, yayibace mu mahembe ge cikumbicilo, mu zinhuzi zose vyono yine, hanyuma sakami yono yowa yisigaye, yayite baho hasi ye cikumbicilo. 31 Hanyuma yawe kuyiwusa mhama yayo yose, nha vyono kanozaga mhama ye mitugo zose, zono zikuwa kulavywa no kuwulagwa so vilavywa vyo mulamu. Nayo mukohani yayikongojele mu cikumbicilo. Mhunjile yayo ho yimwendeze Muwaha Mulungu. Na mu nzila yiyi, mukohani mo komunozeza wilamule so wubi wo munhu yuyo, no munhu yuyo konenelwa wubi wakwe. 32 “Na hono munhu yalavye ngholo, yiwe co cilavywa co wubi, ngholo yiyo yiweze ngholo nyhekulu nhelevu, yono yisina cilema co cose. 33 Nayo munhu yuyo yajelece muwoko wakwe mu mutwe we ngholo yiyo, hanyuma yabite yayiwulajile ku lubavu lwe sumuka ye cikumbicilo, kono wawulajilaga mitugo ye cilavywa cinyanywe. 34 Nayo mukohani yazabice cidole cakwe mumo mu sakami ye ngholo yiyo, yayibace mu mahembe ge cikumbicilo, mu zinhuzi zose vyono yine, hanyuma sakami yono yowa yisigaye, yayite baho hasi ye cikumbicilo. 35 Hanyuma yawe kuwusa mhama yayo yose, nha vyono kanozaga mhama ye zingholo, zono zikuwa kulavywa no kuwulagwa, so vilavywa vyo mulamu. Nayo mukohani yawe kuyikongojela mu cikumbicilo, hamonga ne cilavywa ce ndigwa yono yilavigwe kuli Muwaha Mulungu. Na mu nzila yiyi, mukohani mo komunozeza wilamule so wubi wo munhu yuyo, no munhu yuyo konenelwa wubi wakwe.” |
Cigogo Bible © Bible Society of Tanzania, 2002.
Bible Society of Tanzania