Walawi 3 - Luganuzi Luswanu Kuli Wanhu Wose 2002

Cilavywa co mulamu

¹ “Na lono yunji yawe yakulavya ng'ombe monga ya mwi'tewa lyakwe, yiwe cilavywa co mulamu, ng'ombe yiyo hono yiwe nume hamba nyhekulu, yeze nhelevu yisina cilema co cose.

² Nayo yuyo munya ng'ombe, yajelece muwoko wakwe mu mutwe we ng'ombe yiyo, hanyuma yayiwulajile ha mulango we Lihema lyono lyelile. Nawo wakohani i wana wa Haluni, wayimize sakami yo mutugo wuwo, mu cikumbicilo mu zimbavu zayo zose vyono yine.

³ Hanyuma wamulavizye Muwaha Mulungu mhama yose ya mu'nda,

⁴ hamonga ne zifigo ne mhama yayo, ne nhandamala yono yili mwi'toga, yiwe ndigwa ye cilavywa kuli mwene.

⁵ Nawo wakohani wavikongojele vivyo vyose mu cikumbicilo hamonga ne vilavywa vinyanywe. Ne mhunjile ye cilavywa ce ndigwa yiyi, yikwendeza muno kuli Muwaha Mulungu.

⁶ “Na hono ngholo hamba mhene yiwe yikwitumamilwa mu cilavywa co mulamu, yidahile yiwe nume hamba nyhekulu, ninga yinojeye yiwe nhelevu yono yisina cilema co cose.

⁷ Na hono munhu yunji yawe yakulavya ngholo,

⁸ munhu yuyo yajelece muwoko wakwe mu mutwe we ngholo yiyo, hanyuma yayiwulajile ha mwande ye Lihema lyono lyelile. Nawo wakohani i wana wa Haluni wayimize sakami yayo mu cikumbicilo mu zimbavu zayo zose vyono yine.

⁹ Ninga mhama yose yo mutugo wuwo, hamonga no mucila wayo wose wono mudumulile ha cigugu ce ngholo, ne mhama yose ya mu wutumbu,

¹⁰ ne zifigo ne mhama yayo, ne nhandamala yono yili mwi'toga lyayo vivyo vyose, wamulavizye Muwaha Mulungu.

¹¹ Nayo mukohani mono yakulongoza wuhembi, yavikongojele vyose mu cikumbicilo, yiwe yo ndigwa ndavye kuli Muwaha Mulungu.

¹² “Na hono munhu yunji yalavye mhene,

¹³ munhu yuyo yajelece muwoko wakwe mu mutwe we mhene yiyo, hanyuma yayiwulajile ha mwande ye Lihema lyono lyelile. Nawo wakohani i wana wa Haluni, wayimize sakami yayo mu cikumbicilo mu zimbavu zayo zose vyono yine.

¹⁴ Wamulavizye Muwaha Mulungu mhama yose ya mu'nda,

¹⁵ hamonga ne zifigo ne mhama yayo, ne nhandamala yono yili mwi'toga lyayo, viwe ndigwa ye cilavywa kuli mwene.

¹⁶ Nayo mukohani yavikongojele vivi vyose mu cikumbicilo, yiwe ndigwa ya cilavywa, yono yikwendeza kuli Muwaha Mulungu. Mhama yose yo yo Muwaha Mulungu.

¹⁷ Kanyhi hasina Muisilayeli wo wose mono yakomboywe kulya mhama hamba kung'wa sakami. Ne lilajilizo lili munojeye mulikamise cibitilila mu zindelo zenyu zose ho hose hono mowa kubita.”