Walawi 27 - Luganuzi Luswanu Kuli Wanhu Wose 2002

Wulajilize ku so vilavywa vya kuli Muwaha Mulungu

¹ Muwaha Mulungu yakamulonjela Musa,

² “Wityatye, wono wityatizye ho yawalonjele wanhu wa Isilayeli. Hono munhu yalavywe cilavywa kuli Muwaha Mulungu, so wufisiliza wilahize wakwe. Munhu yuyo kosuma kukombozwa ne liwalo ali lye zipesa zono zikwitumamilwa mwi Hema lyono lyelile nha vyono nhavivyo.

³ Kuli munhu mulume mono yena myaka makumi mejete sunga makumi mutandatu, zeze fweza makumi mahano.

⁴ Mu nghango ye zipesa zono zikwitumamilwa mwi 'Hema lyono lyelile. Nayo munhu mututu we cicekulu, zeze fweza makumi madatu.

⁵ No mwana mudodo we cilume, mono yena myaka mihano sunga myaka makumi mejete, yiweze fweza makumi mejete. Nayo mwana mudodo we cicekulu, ayo zeze fweza yikumi limonga.

⁶ Kuli wana wagalika, u mwana we cilume, mono yakali naficila myaka mihano, ayo zeze fweza yihano. Nayo we cicekulu, zeze fweza yidatu.

⁷ Na hono munhu yawe yaficila kuciza myaka makumi mutandatu, kuli walume, zeze fweza yikumi ne 'hano. Na kuli we cicekulu, zeze fweza yikumi limonga.

⁸ Na hono munhu mono yelahize yawe muciwa, si yakusuma kulavya liwalo lyono kosakwa yalavye, hodu yamulete munhu yuyo kuli mukohani. Nayo mukohani yamucepulile liwalo, yamuwalile munhu yuyo liwalo yidodo lyono kosuma kulavya.

⁹ “Na hono wilahize wuwo, wuwe wilahize wa kuli mutugo wono wuvumiywe kumulavizya cilavywa Muwaha Mulungu, ale ne vilavywa vyose vyono munhu yakumulavizya Muwaha Mulungu, vyowa vyelile.

¹⁰ No munhu yuyo mono yelahize, si yimunojeye kanyhi yawukawanize mutugo wuwo no mutugo wunji. Na hono yejelele yanoze nhavivyo, hodu mitugo zizo zose vyono nyejete zowa sawo yo Muwaha Mulungu.

¹¹ Langa hono wilahize wuwe wuli so mutugo wono mwavufywe, wono si wukuvumilwa wuwe cilavywa kuli Muwaha Mulungu, u munhu yuyo yawusolaje mutugo wuwo, yawutegule kuli mukohani.

¹² Nayo mukohani kotemya wuguzi wayo, mu nghango yo wuswanu wayo wo muwili hono yijinile hamba yigandile, no wuguzi wayo vyo wowa winha.

¹³ Na hono munhu yuyo yasace yayikomboze, yimunojeye yalavye wuguzi wuwo kanyhi yonjeleze hamonga ne makumi mejete kwe 'gana yo wuguzi wayo.

¹⁴ “Na hono yunji yawe kuyisiwanulila kaya yakwe kuli Muwaha Mulungu, yinojeye mukohani yayitemezezye wuguzi wayo, mu nghango yo wuwe we kaya vyono yowa yinha, hono yikamile hamba yisakaye, no wuguzi wayo vyo wowa winha.

¹⁵ No munhu yuyo mono yayisiwanuliye kaya yakwe kuli Muwaha Mulungu, hono yawe yena wuhile wo kuyikomboza, ale yimunojeye yalavye wuguzi wuwo, kanyhi yonjeleze hamonga ne makumi mejete kwe 'gana yo wuguzi wayo.

¹⁶ “Na hono munhu yawusiwanulile mugunda wakwe kuli Muwaha Mulungu, wuguzi wayo wuwagwe mu nghango yo winji we mbeyu yono yohadikwa mu mugunda wuwo, zeze fweza yikumi, kwa kilo nyejete nyejete ze mbeyu ya shayili.

¹⁷ Ninga hono yawusiwanule kamonga du, lono u mwaka wo wuhogolwe wakondya kupuluta, baho langa, yanojeye yalavye wuguzi wose wo mugunda weneco.

¹⁸ Ninga langa hono yawusiwanule lono vilo vinji viwe vyakondya kupuluta ku wulawa ha wumalilicile wo mwaka wo wuhogolwe, ale mukohani yatemye wuguzi wayo, wuwe mu nghango ye myaka yono yisigaliye, sunga wuze wufice kanyhi mwaka we sikukuu ye Jubilii wono wukutyatya, ninga yacepule liwalo lye makumi mejete kwe'gana.

¹⁹ Na hono munhu mono kowa yawusiwanuye mugunda wakwe, nayo ho yasace kuwukomboza, ale, yalavye wuguzi wayo wose, kanyhi yonjeleze hamonga ne liwalo lye makumi mejete kwe 'gana.

²⁰ Na hono yawuguze mugunda wuwo kuli munhu yunji, lono yakali si nawukomboza ku wulawa kuli Muwaha Mulungu, hodu munhu yuyo kowa yakondya kwajiliza ling'ani yakwe yo kuwukomboza kanyhi.

²¹ Kolo weza kufika mwaka wo wuhogolwe, mugunda wuwo hodu wowa weza sawo yo Muwaha Mulungu vilo vyose, nawo wowa sawo ye wakohani.

²² “Na hono munhu yawusiwanule mugunda wono nayo mweneco kumbe yawugulile,

²³ ale mukohani yatemye wuguzi wayo mu nghango ye myaka yono yisigaliye sunga wufice mwaka wo wuhogolwe. Ninga munhu yuyo yimunojeye yalavye wuguzi wuwo baho baho du lwa kamonga. Ne zipesa zizo yo sawo yo Muwaha Mulungu.

²⁴ Na mu mwaka wo wuhogolwe, mugunda wuwo wugomolwe kuli munghalaco, hamba kuli wanagwe.

²⁵ No wuguzi wose weze wuli mu nghango ye mapesa gono gakwitumamilwa mwi 'Hema lyono lyelile.

²⁶ “Ninga zinyana ze mitugo zinongozi kulelwa, azo zakondya kuwa sawo yo Muwaha Mulungu, holeka yunji yalece kwisiwanulila ciwe cilavywa cakwe ce lihewa. Nha cinji, ng'ombe, hamba nyana ye ngholo, hamba nyhinda, avyo vyose yo sawo yo Muwaha Mulungu.

²⁷ Langa zinyana zinongozi kulelwa ze zinimu zono nyavufywe, azo zosuma kukombozwa mu nzila ye mapesa gono gakwitumamilwa mwi 'Hema lyono lyelile, hamonga ne nyonjeza ye makumi mejete kwe 'gana. Na hono yilece kukombozwa, ale yiguzwe kuli munhu wo wose mu wuguzi wa mu zipesa zono zikwitumamilwa mwi 'Hema lyono lyelile.

²⁸ “Ninga munhu wowose si kosuma kuguza hamba kukomboza cinhu cono yamusiwanuliye Muwaha Mulungu, hono yawe munhu, hamba mutugo, hamba mugunda. Hambi avyo i visiwanulwe nha sawo yo Muwaha Mulungu vilo vyose.

²⁹ No munhu wo wose mono yasiwanuywe ne wanhu, si kosuma kukombozwa, langa yanojeye yawulagwe du.

³⁰ Ne zaka ya muli vyose vye vilimwa vyenyu, hono wuwe wuhemba, hamba mikalo, vivyo vyose yo sawo yo Muwaha Mulungu.

³¹ Na hono munhu yasace kuvikomboza cimonga ca muli vinhu vivyo, yowa yimunojeye yagule ko wuguzi wono wuling'aniye, kanyhi yonjeleze hamonga ne liwalo lye makumi mejete kwe 'gana.

³² Kanyhi, mutugo monga wa muli mitugo yikumi, ayo yo sawo yo Muwaha Mulungu. Na lono mukuwala zi mitugo zenyu, mweze kumanya vyono, muli mitugo yikumi, mutugo monga yo sawo yo Muwaha Mulungu.

³³ Kanyhi mulanjilile, munya mitugo yalecele lukulu kuhagulila 'ne mutugo wono wutimbile, hamba yalece kuyikawa na yunji. Na hono yejelele yayikawe na yunji, hodu mitugo zizo zose vyono nyejete, zowa sawo yo Muwaha Mulungu, hamba si zosuma kanyhi kukombozwa yaye.”

³⁴ Nago gaga go malajilizo gono Muwaha Mulungu, yamulajiliza Musa mwi'tunda lya Sinayi, ho yawalonjele i wanhu wa Isilayeli.