Walawi 26 - Luganuzi Luswanu Kuli Wanhu Wose 2002

Wulugutwe so wuwa ne cihuliko

¹ Muwaha Mulungu yakatya, “Mulece kwinozeza vihwani vye milungu yo wulambi, hamba mulece kwiyinulila cihwani ciseswe, hamba lisumbili lye libwe, hamba mabwe makakate, ho mugahembe. Ane yo nene Muwaha Mulungu wenyu.

² Holeka muzikamisaje zi sikukuu ze cidini. Kanyhi muhapelaje cogopo i hanhu hono mukuhembela 'ne. Ane yo nene Muwaha Mulungu.

³ “Hono muwukamise wulajilize wangu no kwibata malajilizo gangu.

⁴ Nane nomutonyezezenyi mvula mwi'daha lyono likwiliye, i mibici ho yilele mana, ne yisi nayo yilele nhwanga mbaha.

⁵ Ne nhwanga yenyu yokonjelezeka muno, nayo yomunozenyi mujendelele kududula du sunga na mu mapango go kuhepela zabibu. Nanye mowa mukali mujendeleye kuhepa zabibu, sunga na mwidaha lyono lyowa lyo kupanha no kuhadika wuhemba. Nanye movituga vyose vyono mukuvisaka ku wulye, kanyhi mokwikala mupolile mu yisi yenyu.

⁶ “Nane nomupelenyi mulamu mu yisi yenyu. Nanye mowa kugona mupolile, musina kanyhi mono komogofyenyi yaye. Nane noziwinga zinimu zose zono zina mbali ziwuce mu'si, kanyhi mowa musina wulugu wo wose mumo.

⁷ Nanye mowasumiza walugu wenyu wose.

⁸ Ne wanhu wahano du muli nyenye, wosuma kuwasumiza wanhu yigana, ne wanhu yigana limonga, wosuma kuwasumiza wanhu elufu yikumi.

⁹ Nane nomulugutizenyi, kanyhi nomupelenyi wana wenji. Nane nocikamisa cilagane cangu cono nalagana nanye.

¹⁰ Sunga ne nhwanga yenyu yowa mbaha yono yosuma kulimuka sunga ku mwaka. Hamba nhavivyo, si mosuma kuyimala yaye, langa mowa kuwumwaga wuhemba wuhuma, ho mutuje cilejeho mu madongha go kutajila wuhemba wupya.

¹¹ Nane nowa hamonga nanye mwi Hema lyangu lyono lyelile, kanyhi hamba si nolomulecenyi yaye.

¹² Nowa nili hamonga nanye. Nane nowa Mulungu wenyu, nanye mowa wanhu wangu.

¹³ Ane, no Muwaha Mulungu, u Mulungu wenyu, yo nene mono namuwusenyi mu yisi ya Misili, ho mulece kuwa wawanda kanyhi. Nghavibenanjiza vilungo vyono vyali vimwibatenyi. Nghamunozenyi mujende mugoloka.”

Wulipicizwe ku so wu wula cihuliko

¹⁴ Muwaha Mulungu yakutya, “Hono mulece kugebata malajilizo gangu, motuga wulipicizwe.

¹⁵ Na hono mulece kuwibata wulajilize wangu, hamonga ne malajilizo gangu, kanyhi mubene ne cilagane cono nacinoza nanye.

¹⁶ Mbeka molipicizwa. Ane noleta wongomezwe muli'nye. Noleta matamwa gono gasina miti, gono si gosumika no kuwulagulwe, hamonga ne mapungo gono gomunozenyi mubofule, no kumuwulajenyi. Kanyhi mohadika zimbeyu, ninga hamba si mokwambulila cinji, hambi walugu wenyu nha womusumizenyi, no kulya vyose vyono mwali mwalima.

¹⁷ Nane nomulecenyi, walugu wenyu wamusumizenyi, na wono wakumusulenyi, wo wolotema muli'nye. Nanye molokogofywa muno muno, sunga muwe manghanga caka, na lono hasina munhu mono yakumuwinjenyi.

¹⁸ “Ninga hono zizi zose ziwe zakondya kupuluta, nanye ho muwe mukali vyo muli bamba du, hamba si mukuhulika, nane nokonjeleza wulipicizwe wenyu kali mupunghati.

¹⁹ Nociwusa cibede cenyu, hamonga no wu wula cihuliko wenyu, na howa hasina mvula, ne yisi yenyu yonyala yiwe nghavu kotya cuma.

²⁰ Sunga ne milimo yenyu yose yono mokwituma muhidimbaye, yowa nghani ya bwete du, hamba si mokwambulila cinji co cose, hambi yisi nha si yosuma kulela kanyhi, sunga ne mibici yenyu siyolela mikalo yaye.

²¹ “Na hono muwe mukali mujendeleye kwisumaniza nane, no wu wula cihuliko wenyu kuli'ne, nane nokonjeleza wulipicizwe wenyu kanyhi kali nghanghulo zinji mupunghati.

²² Noleta malimu makali muli'nye, nago gowawulaga i wana wenyu, gohodanga ne mitugo zenyu, no kumusigazenyi muli wacefu, ne zinzila zenyu zowa zisina munya kuzitumamila.

²³ Ne magazo gaga gose, kolo geza kupuluta, nanye muwe vyo mukali du si mukuhulika 'ne yaye, kanyhi muwe mukali vyo mumbedegaye du,

²⁴ ale, nane nomuzizenyi, nimulipicizenyi muno muno kali mupunghati si nha ha lulongozi kusoko yo wubi wenyu.

²⁵ Nane noleta wulugu muli'nye, ho nimulipicizenyi so wubena cilagane wenyu. Na kolo mukwikongholela mu makaya genyu, ho mutuje mulamu, nane noleta matamwa gono gasina miti, gono si gosumika na ku wulagulwe yaye. Nanye baho ho modindimizizwa mwikombole kuli walugu wenyu.

²⁶ Nane nocepula zindigwa zenyu, ne wacekulu yikumi, wose wosaka watelecele mukate mwi 'figwa limonga. Hanyuma wamugawilenyi cipimo co wanjize, nanye molya hamba kwiguta yaye.

²⁷ “Na zizi zose kolo zapuluta, nanye muwe vyo mukali mujendeleye du kumbedegala, no kuwa musina cihuliko kuli'ne.

²⁸ Nane nomuzizenyi mwi'kuwo lyangu, nokonjeleza wulipicizwe wenyu mu nzila mbi muno muno kali mupunghati si nha wa halulongozi.

²⁹ Ne zinzala zenyu zowa mbaha, modabuka muno muno, nanye mowalya sunga ne wana wenyu we cilume na we cicekulu.

³⁰ Nane nohahodanga sunga ne hanhu henyu ho kuhembela mucanyha ye matunda, nogatulanjiza ne makumbicilo genyu go kufusiza wuvumba, noyigumila ne mivimba yenyu, mucanyha ye vihwani vyenyu vye milungu, vyono vigwiye hasi, no mutima wangu womusulenyi.

³¹ Noganoza makaya genyu gawe matongo, nohahodanga hanhu henyu ho wuhembelo, nogalemela lukulu no kugabocela ne makumbiko genyu.

³² Nane noyihodanjila lukulu yisi yenyu, sunga ne walugu wenyu wono wakwikala mumo, wezine so wongomezwe wayo.

³³ Noleta wulugu muli'nye, kanyhi nomwiyagazenyi mwiyagalile mu zi'si zo wujenzi. Ne yisi yenyu yowa matongo, ne makaya genyu golekwa gagwiye caka.

³⁴ “Nayo yisi yosangalalila wucehe wono si mwali mudahile kuyipela.

³⁵ Yosigala nyhiwa, nayo yoceheza, lono anye muli mu wuwinjilizwe, muli mu yisi ye walugu wenyu.

³⁶ Nawo wayenyu wono wosigala, nowapela woga wuwaha muno, u woga wono wowanoza, hamba wahulice lizi lye mbeho du yikuputa lihamha, hodu wene wowa kutiza du. Nanye mowa kumangha nha munhu mono yakuwingwa ku wulugu, mogwa caka sunga na hono hasina mulugu mono yali behi nanye.

³⁷ Kanyhi mowa kwikobala munhu no muyagwe na hono hasina munhu wo wose mono yakumutyatililenyi mu nyuma yenyu. Mowa musina vilungo vyo kwihoma ne walugu wenyu.

³⁸ Nanye mofwila kuko ku wuwinjilizwe, momelwa ne yisi ye walugu wenyu.

³⁹ Na wawo wacefu wa muli'nye, wono wowa womi mumo mu yisi ye walugu wenyu, nawo wolokwambuka bwete, ku soko yo wubi wenyu na so wubi we walezi wenyu.

⁴⁰ “Ninga i wana wenyu wo wolonena u wubi wawo, no wubi we walezi wawo, vyono wesumaniza nane, wakambedegala,

⁴¹ wakeyambuza weneco, nane nghawaleka wabite ku wuwinjilizwe mu yisi ye walugu wawo. Ninga hanyuma, kolo i wana wenyu wakwinenenyheza no kuvumila wulipicizwe, so wubi wawo, hamonga no wubedegazi wawo,

⁴² nane ho nolocikumbucilila cilagane cangu kuli Yakobo na Isaka, hamonga na Abulahamu. Nane nolowusipula wihuwizo wangu wo kuwapela yisi wanhu wangu.

⁴³ Hamba nhavivyo, yinojeye yisi yilekwe ne wanhu wayo, ho yisume kuwusangalalila wucehezwe wayo. Nawo wanhu, yowa yiwanojeye wavumile vyono walema wulajilize wangu hamonga ne malajilizo gangu.

⁴⁴ Ninga hamba yiwe nhavivyo, lono wakali wali mu yisi ye walugu wawo, ane si nosuma kuwaleka hamba si nowongomeza yaye. Hambi nghani yiyo nha yocidumya cilagane cangu kuli wene, nane kumbe ho nili Muwaha, u Mulungu wawo.

⁴⁵ Ninga ane nolocisipula cilagane cono nacinoza kuli walezi wawo, lono nalajilila vilungo vyangu kuli makungugo gose, mu nzila yo kuwawusa wanhu wangu ku Misili, ane, ho sume kuwa Mulungu wawo. Ane yo nene Muwaha Mulungu.”

⁴⁶ Nawo wuwu, wo wulajilize hamonga ne malajilizo, gono Muwaha Mulungu yamulajiliza Musa mwi'tunda lya Sinayi, ho yawalonjele i wanhu wa Isilayeli.