Walawi 24 - Luganuzi Luswanu Kuli Wanhu Wose 2002

Wulajilize so wukamise we Tala

¹ Muwaha Mulungu yakamulonjela Musa,

² yawalonjele wanhu Waisilayeli wityatye awuno wono wityatizye yawatye, “Ale letenyi mafuta malengu maswanu getumamilwe so tala yono yili mugati ye Lihema lyono lyelile, ho yiwe kwikala yacile du nhondo zose.

³ Nayo Haluni yowa yimunojeye yawe kuyikoleleza cinyamihe nhondo zose. Yayilece yikwaka sunga wele, kononze ye libupa lyo mwenda lye Lihema lyono lyelile ha mwande ye Lisanduku lye Cilagane, lyono lili i Hanhu hono helile, helile muno. Ne lilajilizo lili linojeye likamiswe sunga mu vilo vyono vikuza.

⁴ Nayo Haluni, yimunojeye yazikamise zitala mu wuwiko wayo we zahabu nengu, kanyhi yazilanjilile ziwe kwikala zacile du hali Muwaha Mulungu.”

Kuli ze mikate milavywe kuli Muwaha Mulungu

⁵ “Ale, wusole wusaje wa kilo yikumi na nyejete, wunoze mikate yikumi na myejete.

⁶ Wuyitandalice mu micilili myejete, mucilili monga mikate mutandatu, no muyagwe nawo nhavivyo, mucanyha ye meza i hiliwe zahabu nengu, yono yili mwi Hema lyono lyelile.

⁷ Hanyuma wusole wuvumba wono wunamuce muno, wuwutajile mucanyha ya yiyo micilili, yiwe citanjilo ce cilavywa ce ndigwa kuli Muwaha Mulungu, cono cikuhalila hanhu ha mikate.

⁸ Na mu Sabato zose, mu vilo vyose vyono vikuza, yinojeye mukate wuwe kuwikwa ha mwande yo Muwaha Mulungu. Na wuwu wowa wo mulimo we Waisilayeli cibitilila.

⁹ No mukate wuwo, wowa wa Haluni hamonga ne zindelo zakwe. Nawo yiwanojeye wawulile i hanhu hono helile du, vyono mukate wuwo welile muno, we ndigwa ndavye kuli Muwaha Mulungu so Wakohani.”

Wulipicizwe wo muling'ano

¹⁰ Kwali na munhu mono u sogwe yali Mumisili, ninga u nyina yali Mwiisilayeli, litagwa lyakwe Shelomiti, u mwana we cicekulu wa Debili wo mulango wa Dani. Nayo munhu yuyo, vikagombana no Mwiisilayeli mumo mu nghambi.

¹¹ Na mu wugombane wawo wuwo, munhu yuyo yakamutovula Mulungu. Nawo wakamusola wakamutegula kuli Musa,

¹² wakamuwika hasi yo wulindilizi, wakawa kulindila Muwaha Mulungu yawalonjele vyono wamutendele.

¹³ Muwaha Mulungu yakamulonjela Musa yakatya,

¹⁴ “Musolaje munhu yuyo, wumutegule kunze ye nghambi. Ne wanhu wose wono wamuhulice vyono yakutovula, wabite wakajelece miwoko yawo mu mutwe wakwe, wuwe wo wuhomelezi vyono munhu yuyo kanoza masutya. Hanyuma, mhuga yose ye Waisilayeli, wamutowanje ne mabwe sunga yafwe.

¹⁵ Wuwalonjele ne wanhu wa Isilayeli, vyono munhu wowose mono komutovula Mulungu, munhu yuyo kokwidinghulila wubi wakwe mweneco,

¹⁶ nayo kowulagwa. No munhu wowose mono komutovula Mulungu, hono yawe Mwiisilayeli hamba mujenzi mono mwikalane, munhu yuyo yatowangwe ne mabwe ne mhuga yose sunga yafwe.

¹⁷ “No munhu wowose mono kowulaga munhu, ale munhu yuyo nayo yawulagwe.

¹⁸ No munhu wowose mono kowulaga mutugo wo muyagwe, munhu yuyo yimunojeye yayihalize. Ninga nghani mbaha muli zizi, wo wumi kwa wumi.

¹⁹ Na hono munhu wo wose yamupele muyagwe cilema, munhu yuyo yatendelwe nha vyono yamutendeye muyagwe.

²⁰ Hono yawe kamubena muyagwe lifupa, nayo yabenwe lifupa lyakwe. Na hono yawe kamutula muyagwe liso, nayo liso lyakwe litulwe. Na hono yawe kamubena lino, nayo lino lyakwe libenwe. Cinhu co cose cono munhu komutendela no kumupela muyagwe cilema, ale cico nayo co kotendelwa du.

²¹ No munhu wo wose mono kowulaga mutugo, munhu yuyo kohaliza yinji, ninga munhu mono kowulaga munhu muyagwe, u munhu yuyo langa yawulagwe du.

²² Ne lilajilizo lilino lili so nyenye wose kono mwalila, kuli Waisilayeli, na kuli wajenzi wono mwikaye nawo. Hambi ane nha yo nene Muwaha Mulungu wenyu.”

²³ Nayo Musa yali yeza kukondya kulonga zizo kuli wanhu Waisilayeli, hodu wakawa kumusola munhu yu yulya, wakawa kumutegula kunze ye nghambi, wakawa kumutowanga ne mabwe sunga yakafwa. Na mu nzila yiyi, i wanhu wa Isilayeli wakazifisiliza zono Muwaha Mulungu yamulajiliza Musa.