Walawi 23 - Luganuzi Luswanu Kuli Wanhu Wose 2002

Zi Sikukuu ze ci Dini

¹ Muwaha Mulungu yakamuloloseza Musa,

² “Wulajilize wono wunojeye wukamiswe lono wanhu wa Isilayeli wakunoza zisikukuu ze cidini, lono wakwihanguliza hamonga mu wuhembi.

³ Ho vili vilo mutandatu du vyono vinojeye mwitume milimo yenyu, ninga mweze kukumbucila vyono lizuwa lyo mupunghati, lyo lizuwa lye Sabato, ne lizuwa lilyo lyo lizuwa lyo kuceha. Holeka mwi'zuwa lilyo, mulece kwituma mulimo wunji, langa mwihangulizaje du so wuhembi. Hambi Sabato nha Sabato yo Muwaha Mulungu, hanhu ho hose hono mowa mwikaye.

⁴ Nanye munojeye muzanzalice zi sikukuu zizino zose nha vyono zinha, monga mwi'zuwa lyayo.”

Pasaka no mukate wono wusina cisase

⁵ “Sikukuu ye Pasaka, yeze kunozwa so cogopo ca kuli Muwaha Mulungu, nayo yeze kwanziza hono lizuwa likugwila, mwi'zuwa lye likumi na yine lyo mwezi mulongozi.

⁶ Na mwi'zuwa lye likumi ne 'hano, i sikukuu yo mukate wono wusina cisase baho ho yowa kwanziza. Na mu vilo mupunghati, mulecele lukulu kulya mukate wono wina cisase.

⁷ Na mwi'zuwa lilongozi lya mu vilo vivyo, munojeye mwihangulize hamonga so wuhembi du, hamba mulece kwituma mulimo wenyu wowose.

⁸ Mujendelele kumulavizya Muwaha Mulungu, cilavywa ce ndigwa nhondo zose, mu vilo vivyo vyose mupunghati. Ninga mwi'zuwa lyo mupunghati mwihangulize kanyhi hamonga muwe no wuhembi. Ninga mulece kwituma mulimo wunji wowose.”

⁹ Muwaha Mulungu yakamulonjela Musa yakatya,

¹⁰ “Na kolo mwenjila mu yisi yono Muwaha Mulungu yakumupelenyi, na kolo mwadudula wuhemba wenyu, ale mumuletele mukohani nhoto monga ye malimbuko.

¹¹ Nayo mukohani yagalavye nha cilavywa cinule hali Muwaha Mulungu, nanye ho musume kuvumilwa. Mukohani yanojeye yacilavye cilavywa cico mitondo yaco lono Sabato yakondya kupuluta.

¹² Na mwi'zuwa lilyo lono wukulavya cilavywa co wuhemba, ale wulavye hamonga ne cilavywa cinyanywe, ca nduwilu monga, ya mwaka monga, nhelevu yono yisina cilema co cose.

¹³ Hamonga na vivyo, wuleteleze no wusaje, lete no wusaje wa kilo nyejete wono muhanzahanzwe ne mafuta, wuwe cilavywa ce ndigwa. Ne mhunjile ye cilavywa cico, yikwendeza kuli Muwaha Mulungu. Kanyhi hamonga ne cilavywa cico, wulavye na lita monga ya divayi.

¹⁴ Ninga wulecele lukulu kuwulya wuhemba wuwo wupya, hamba hono mufijihe, hamba hono mukalinje, hamba wono mutelecelwe mukate, sunga langa kolo wakondya kumulavizya cilavywa cico Muwaha Mulungu, nagwe ho kosuma kuwulya. No wulajilize wuwu wunojeye wukamiswe mu zindelo zenyu zose sunga mu vilo vyose vyono vikuza.”

Sikukuu ye nhwanga

¹⁵ “Na mu wulawilila baho, ale wuwale sunga gapulute majuma mupunghati, mu wulawilila lizuwa lyono wuleteye cilavywa co wuhemba wupya, kumulavizya Muwaha Mulungu.

¹⁶ Na mwi'zuwa lye likumi ne hano, mitondo yaco, lono lizuwa lye Sabato yo mupunghati lyakondya kupuluta, ale wumulavizyaje kanyhi Muwaha Mulungu cilavywa co wuhemba wunji wupya.

¹⁷ Na kanyhi, yinojeye mhuga zose zimuletele Muwaha Mulungu mikate myejete myejete, ciwe cilavywa ce mikate minulwe hali Muwaha Mulungu. Ne mikate yiyo yose, yeze minozwe ko wusaje wono wunamuce, wa kilo nyejete nyejete, kanyhi yeze mitelekwe hamonga ne cisase. Nayo yiletwe kuli Muwaha Mulungu nha cilavywa cono cikulawa mu malimbuko.

¹⁸ Kanyhi hamonga no mukate wuwo, mhuga yose yinojeye yilete nyana mupunghati za ngholo, za mwaka monga monga, hamonga na nyehe monga, na nduwilu nyejete, na zose zeze nhelevu zisina cilema co cose. Navyo vinojeye vyose vilavywe nha cilavywa cinyanywe kuli Muwaha Mulungu, hamonga ne cilavywa co wusaje, ne cilavywa ce divayi. Ne mhunjile ye cilavywa cico yikwendeza kuli Muwaha Mulungu.

¹⁹ Hanyuma ho kanyhi, walete mvulati yiwe cilavywa co wubi hamonga na nyana za ngholo nyejete za mwaka monga, ziwe cilavywa co mulamu.

²⁰ Nayo mukohani yalavye mukate hamonga ne zinyana zinyejete ze zingholo, ziwe cilavywa cinulwe hali Muwaha Mulungu so wakohani. Ne vilavywa vivi vyelile.

²¹ Na mwi'zuwa lilyo, mulece kwituma mulimo wunji, langa mwihangulizaje hamonga du so wuhembi. Ne zindelo zenyu zose, yiwanojeye wawukamise wulajilize wuwu sunga mu vilo vyose vyono vikuza.

²² “Na lono muli mu wududuzi we migunda yenyu, mulece kududuliza vyono vili mu mhelo mhelo ye migunda yenyu. Hamba mulece kutondoleza ne mahalalwa gayo. Langa muwalecelaje wanhu waciwa, hamonga ne wanhu wajenzi. Ane yo nene Muwaha Mulungu wenyu.”

Sikukuu yo mwaka mupya

²³ Muwaha Mulungu yakamulonjela Musa yakatya,

²⁴ “Na mwi'zuwa lilongozi lya mu mwezi wo mupunghati, lizuwa lilyo lyowa yizuwa lyo wucehe. Nanye kolo mukuhulika mazi ge zindulele, munojeye mwihangulize hamonga so wuhembi.

²⁵ Mulete ne cilavywa ce ndigwa mumulavizye Muwaha Mulungu. Ninga mwi'zuwa lilyo mulece kwituma mulimo wunji.”

Lizuwa lyo Wilamule

²⁶ Muwaha Mulungu yakamulonjela Musa yakatya,

²⁷ “Lizuwa lye likumi lyo mwezi wo mupunghati, lyo lizuwa lyono munojeye munoze sikukuu yo mwaka, hambi lizuwa lilyo nha lyo lizuwa lyo wilamule. Na mwi'zuwa lilyo mulecele lukulu kulya cinhu cocose, langa mwihangulize du hamonga so wuhembi, muwe kumulavizya Muwaha Mulungu ne cilavywa ce ndigwa.

²⁸ Ninga mwi'zuwa lilyo mulece kwituma mulimo wunji wowose. Hambi nha lyo lizuwa lyo wilamule, lyo lizuwa lyo kunoza wilamule hali Mulungu wenyu.

²⁹ Na munhu wo wose mono kokwijelela yalye cinhu co cose mwi'zuwa lilyo, u munhu yuyo si kowalilizwa kanyhi hamonga ne wanhu wo Mulungu.

³⁰ Kanyhi, munhu wo wose hono yetume mulimo wunji wo wose mwi'zuwa lilyo, Mulungu komuwulaga munhu yuyo.

³¹ No wulajilize wu wuno wowa so nyenye, hamonga ne zindelo zenyu zose, hanhu ho hose hono mowa mwikaye.

³² Mukumbucile vyono munojeye mulisiwanule lizuwa lilyo, mulece kwituma mulimo wunji hamba kulya cinji co cose, ku wulawilila kolo lizuwa likugwila mwizuwa lye licenda, sunga kolo lizuwa likugwila mwizuwa lye likumi.”

Sikukuu ye Vibanda

³³ Muwaha Mulungu yakamulonjela Musa yakatya,

³⁴ “Nayo sikukuu ye vibanda, yinojeye yanze mwi'zuwa lye likumi ne hano lya mu mwezi wo mupunghati. Nayo yijendelele sunga vilo mupunghati.

³⁵ Na mwi'zuwa lilongozi lya mu vilo vivyo, munojeye mwihangulize hamonga so wuhembi du, hamba mulece kwituma mulimo wo wose.

³⁶ Mujendelele kumulavizya Muwaha Mulungu cilavywa ce ndigwa nhondo zose, mu vilo vivyo vyose mupunghati. Na mwi'zuwa lyo munana mwihangulize kanyhi hamonga so wuhembi, mumulavizye no Muwaha Mulungu cilavywa ce ndigwa. Ne lizuwa lilyo lyo lizuwa lyo wuhembi du, nanye mulece kwituma mulimo wunji.

³⁷ “Zizino zo sikukuu ze Cidini, zono zinojeye mumupele cogopo Muwaha Mulungu, mu nzila yo wihanguliza hamonga wenyu, so wuhembi wa hamonga, no kumulavizya vilavywa vye ndigwa, ne vilavywa vinyanywe, ne vilavywa vyo wusaje, ne makumbiko, hamonga ne vilavywa vye divayi, mu nghango nha vyono vikusakwa mwi'zuwa ne 'zuwa.

³⁸ Ne zi sikukuu zizo, zili hamonga ne mazuwa ge Sabato. Navyo vilavywa vivyo, vili hamonga ne vilavywa vyenyu vye nhondo zose, vilavywa vyono mukulavya so wufisiliza wilahize wenyu, sunga ne vilavywa vye lihewa vyono mukumulavizya Muwaha Mulungu.

³⁹ “Nanye kolo mwadudula migunda yenyu mwakondya, munoze sikukuu yiyino vilo mupunghati, mwanze kuyinoza mwi'zuwa lye likumi ne hano, lya mu mwezi wo mupunghati. Ninga lizuwa lilongozi, lyeze lizuwa lya kuceha du.

⁴⁰ Na mwi'zuwa lilyo, musole mikalo yinji miswanu ya mu mibici yenyu, ne manhambi ge mitende, ne manhambi ge mibici, gono gena mahamha menji, ho muwe kwanza kunoza sikukuu ze cidini, so kumupela cogopo u Muwaha Mulungu wenyu.

⁴¹ Nanye muyinoze sikukuu yiyi vilo mupunghati. Ne zindelo zenyu zose, yiwanojeye wawukamise wulajilize wuwu, sunga mu vilo vyose vyono vikuza.

⁴² Ne wanhu wose wa Isilayeli, yiwanojeye wawe wekaye mu vibanda sunga vilo mupunghati.

⁴³ Zindelo zenyu ho waze wamanye vyono Muwaha Mulungu yawanoza i wanhu Waisilayeli wekale mu vibanda lono yawawusiza mu yisi ya Misili. Yo nene Muwaha Mulungu wenyu.”

⁴⁴ Nayo Musa, yakawa kuwalonjela i wanhu wa Isilayeli wulajilize wono wunojeye, mu wibata i vilo vye zi sikukuu so kumupela cogopo Muwaha Mulungu.