Walawi 22 - Luganuzi Luswanu Kuli Wanhu Wose 2002

Wele we vilavywa

¹ Muwaha Mulungu yakamulajiliza Musa,

² yamulonjele Haluni hamonga ne wanagwe, yatye nhavi, “Mulecele lukulu kuliletela cevu litagwa lyangu lyono lyelile. Holeka muvinozeze cogopo vilavywa vyono wanhu wa Isilayeli wakusiwanulila 'ne, ane no Muwaha Mulungu.

³ Holeka yumonga wa mu lulelo lwenyu, hono yasejelele behi ne vilavywa vyangu vyono vyelile, vyono wanhu wa Isilayeli wasiwanuliye 'ne akuno ho yeyavufye. Munhu yuyo si kolosumila lukulu kanyhi kwituma ha cikumbicilo. Na zizi zinojeye zikamiswe sunga mu vilo vyose vyono vikuza.”

⁴ “Kanyhi mu wana wa Haluni, hasina munhu mono kosuma kulya vilavywa vyono vyelile, akuno ho yena no wutamwa wo wukoma, hamba mono yakulavya wufila mu muwili wakwe. Langa yalindile sunga kolo yakondya kwezwa. No mukohani wo wose hono yapamize cinhu co cose cono cili 'wifyo, nha cinji, mu wupamiza muvimba, hamba munhu mono mbeyu yakwe yo lulelo yikulawila,

⁵ hamba kupamiza nimu ye liwifyo, hamba u munhu mwavufywe.

⁶ No mukohani wo wose hono yeyavufywe, hodu yimunojeye yajendelele kuwa mwavufywe sunga lizuwa kono lyoswela. Hamba nhavivyo, si kosuma kulya vilavywa vyono vyelile, langa sunga kolo yehovuga muwili wakwe.

⁷ Nalyo lizuwa kolo lyakondya kugwila, hodu nayo kowa yakondya kwezwa. Nayo ho kosuma kulya nhondo vilavywa vyono vyelile, ku soko yo ndigwa yakwe.”

⁸ Kanyhi mukohani yalecele lukulu kulya nyama ye nimu yono yifwiliye yeneco, hamba yono yiwulagwe ne malimu ga mu mbago, hambi nha yomwavufya. Ane yo nene Muwaha Mulungu.

⁹ “Yiwanojeye wakohani wose wagebate malajilizo gose gono namupelenyi. Na hono si nhavivyo, wowa wasutyi, na wofwa, vyono si wagakamise malajilizo gono gelile. Ane yo nene Muwaha Mulungu, yo nene mono nghuweza.

¹⁰ “No munhu yunji wo wose si yakomboywe yalye vilavywa vyono vyelile, langa wa mu mhuga yo mukohani du, yo yakomboywe yalye. Ninga hamba yunji wo wose mono vikalane hamonga no mukohani, hamba mwitumami wakwe, awo si wakomboywe walye yaye.

¹¹ Langa i wawanda wo mukohani, wono yawagulile ne sawo yakwe mweneco, hamba wono waleleywe mumo mu kaya yakwe, awo wosuma kulya i ndigwa yono yakupegwa mukohani.

¹² Nayo mwana we cicekulu wo mukohani, hono yatolwe no munhu mono si mukohani, nayo yalecele lukulu kulya vivyo vilavywa vyono vyelile.

¹³ Nayo muhinza mufwile, hamba mono yalecigwe no mulume, na kanyhi yawe yasina wana, hono yawe yawuya kwikalana no sogwe, kanyhi yawe yajendeleye kwikala yali wene du, ale, yuyo kosuma kulya ndigwa yono sogwe yakupegwa yo wukohani. Ninga munhu wo wose mono si Mwiisilayeli yalece kuyilya.

¹⁴ “No munhu wo wose mono si wa mu mhuga yo wukohani, hono yalye cilavywa co cose cono celile wula kumanya, ale munhu yuyo yimunojeye yahalize cono celile mu nghango ye cifo cayo yamupele kuli mukohani, hamonga ne ngomola ye makumi mejete kwe 'gana.

¹⁵ Nawo wakohani yiwanojeye walanjilile, walece kuvyavufya i vilavywa vyono vyelile,

¹⁶ mu nzila yo kumuleceleza munhu mono si yanojeye yalye. Ne nghani yiyi, yomuletela munhu yuyo masutya hamonga no wulipicizwe wuwaha muli mwene. Ane yo nene Muwaha Mulungu, yo nene mono nghuweza.”

¹⁷ Muwaha Mulungu yakamulajiliza Musa

¹⁸ yamupele malajilizo aga Haluni hamonga ne wanagwe, sunga ne wanhu wose wa Isilayeli, “Hono hawe hoyuli munhu Mwiisilayeli, hamba mujenzi mono vikalane hamonga ne Waisilayeli, mono yawe yakulavya cilavywa cinyanywe, hono yawe yakulavya so wufisiliza wilahize wakwe, hamba wula wilahize. Ale mutugo wuwo weze mutelevu wusina cilema co cose.

¹⁹ No mutugo wuwo ho wusume kubocelwa, yeze nume nhelevu yono yisina cilema cocose.

²⁰ Na hono mutugo wuwe wina cilema, hodu mutugo wuwo yalece kuwulavya, hambi Muwaha Mulungu nha si kowubocela yaye.

²¹ Na hono munhu yunji yakumulavizya cilavywa co mulamu Muwaha Mulungu, hono yawe yakulavya so wufisiliza wilahize wakwe, hamba cilavywa ce lihewa, ale mutugo wuwo weze mutelevu wusina cilema, hono yisakwe yivumilwe.

²² Kanyhi mulecele lukulu kumulavizya Muwaha Mulungu mutugo wono wuli cibofu, hamba yono yibenece mugulu, hamba ye cilema, hamba yono yina malonda, hamba yo wupele, hamba yono yina wukulutu. Mulece kulavya mu cikumbicilo mitugo ye liwala lilino ho yiwe cilavywa ce ndigwa.

²³ Langa mu vilavywa vye lihewa, mosuma kulavya mutugo we cilema hamba yono yicepuciywe vilunzwa vyayo vinji. Ninga mu vilavywa vyo wilahize, mutugo wuwo si wovumilwa yaye.

²⁴ Kanyhi mulece kumulavizya Muwaha Mulungu mutugo wono mupaswe hamba wono mutulangwe hamba zono zitemigwe. Azi zose si zikomboligwe mu zitumamile mu yisi yenyu.

²⁵ Mulece kulavya cilavywa ce ndigwa co mutugo wono wulawile kuli munhu mujenzi. Hambi mitugo ze liwala lilyo nha zikuwalwa vyono zina vilema, holeka si zikuvumilwa yaye.”

²⁶ Kanyhi Muwaha Mulungu yakamulonjela Musa yakatya,

²⁷ “Nzeku hamba nyana ye ngholo, hamba nyhinda, kolo yalelwa, yilece kugobozwa ko nyina yayo, sunga vipulute vilo mupunghati. Na kolo vyapuluta vilo vivyo, ale ho yosuma kuvumilwa yisume kulavywa yiwe cilavywa ce ndigwa.

²⁸ Mulece kuziwulaga hamonga ne nyana yayo, hamba mhene hamonga ne nyana yayo mwizuwa limonga.

²⁹ Na lono mukulavya yikumbiko lyo wulumbe kuli Muwaha Mulungu, yinojeye muwutyatye wulajilize vyono winha ho musume kuvumilwa.

³⁰ Kanyhi munojeye muyilye nyama yiyo mwi'zuwa lilyo du, mulece kuyisigaza sunga mitondo yaco. Ane yo nene Muwaha Mulungu.”

³¹ Muwaha Mulungu yakutya, “Mukamise malajilizo gangu. Ane yo nene Muwaha Mulungu.

³² Mulecele lukulu kulikoza cevu litagwa lyangu lyono lyelile. Ne wanhu wose wa Isilayeli yiwanojeye wamanye vyono, ane nelile. Ane yo nene Muwaha Mulungu mono nghumwezenyi.

³³ Nane yo nene mono namuwusenyi mu yisi ya Misili, ho niwe Mulungu wenyu. Ane yo nene Muwaha Mulungu.”