Walawi 21 - Luganuzi Luswanu Kuli Wanhu Wose 2002

Wele we Wakohani

¹ Muwaha Mulungu yakamulajiliza Musa yawalonjele wana wa Haluni, yawatye nhavi, “Mukohani wowose yalece kwiyavufya so wulongoza wuhembi we maziko, lono yafwilwa no nduguye.

² Langa hono sogwe yawe yo yafwiye, hamba nyina, hamba mwanagwe, hamba mwanagwe we cicekulu, hamba muwahawe,

³ hamba lumbulye mono yakali natolwa, mono wekalane mu kaya monga.

⁴ Hamba yalece kwiyavufya mu vililo vye wanduguze wa mwi'zenjele.

⁵ Mukohani wo wose yalece kwisilula ho hose mu mutwe wakwe, hamba kuceta ndevu, hamba kwisalanga masale mu muwili wakwe, ho yalajile vyono yali mu cililo.

⁶ Mwene yanojeye yawe yelile, hamba yalece kulikoza cevu litagwa lyangu. Hambi mwene nha kalavyaga cilavywa ce ndigwa kuli 'ne, holeka yimunojeye yeze yelile.

⁷ Kanyhi mukohani yimunojeye yalece kutola mucekulu musenyha, hamba mucekulu mono yakondya kumanya walume, hamba mucekulu mono yalecigwe no mulume wakwe, vyono mwene mukohani yelile kuli Mulungu wakwe.

⁸ Ne wanhu, wanojeye wamuwone mukohani vyono yo munhu mono yelile, hambi nha yo kandavizyaga ane no Muwaha Mulungu i vilavywa vye ndigwa. Ane yo nene Muwaha Mulungu mono nimwezajenyi 'nye, nha nelile.

⁹ Na hono mwana we cicekulu wo mukohani yenjile mu wusenyha, yuyo yakumukoza cevu u sogwe, holeka yanojeye yakongogwe mu moto sunga yafwe.

¹⁰ “Mukohani Muwaha yetilwa mafuta go witile mu mutwe wakwe, nayo musiwanulwe, ho yavwale myenda yo wukohani, holeka si yanojeye yalece mvwili zakwe si swamule, hamba lunji yademulanje myenda yakwe, yakulajila vyono yali mu cililo.

¹¹ Hambi mwene nha musiwanulwe so nene. Holeka si yinojeye yeyavufye mweneco, hamba kulyavufya Lihema lyangu lyono lyelile,

¹² so wu wuka mwi 'Hema, no kwinjila mu kaya mono mowuli muvimba wo munhu mono yafwiye, hamba yawe sogwe hamba nyina.

¹³ Kanyhi yimunojeye mukohani, yatole mucekulu mono yakali namanya walume.

¹⁴ Yalece kutola mucekulu mufwile, hamba mono yalecigwe no mulume wakwe, hamba mucekulu mono kawezaga musenyha. Langa yatole du mono yakali namanya walume, mono kolawa mu wanhu wakwe.

¹⁵ Hono si nhavivyo, iwana wono kolela, wowa wavufywe, hamba si wowa welile, nha vyono wakusakwa wawe. Ane yo nene Muwaha Mulungu nimusiwanula nha Mukohani Muwaha.”

¹⁶ Muwaha Mulungu yakamulajiliza Musa yakatya,

¹⁷ ya mulonjele Haluni yatye, “Mu lulelo lwako lose, munhu mono kowa yena cilema mu muwili wakwe, ayo si kowa yanojeye yandavizye cilavywa ce ndigwa. Ne nghani yiyi yinojeye yikamiswe na mu vilo vyose vyono vikuza.

¹⁸ Hamba hasina munhu wo wose mono yena cilema mu muwili wakwe, mono kosuma kulavya yikumbiko, nha cinji, mubofu, hamba mono yakusenzegula, hamba mono yahodanjice mhula, hamba mono yena cilebeto,

¹⁹ hamba mono yabenece mugulu, hamba muwoko.

²⁰ Hamba mono yafunhuce mugongo, hamba munghulimba, hamba mono yena likopo mu liso limonga, hamba mono yena wutamwa wo wupele, hamba mono mupaswe.

²¹ Holeka munhu mono kowa yena cilema mu lulelo lwa Haluni mukohani, yuyo si kosuma kundetela cilavywa ce ndigwa.

²² Munhu we liwala lilyo, mwene kosuma kulya ndigwa yono ndavye kuli'ne, hamonga ne ndigwa yono yelile, sunga ne ndigwa yono yelile muno muno.

²³ Ninga ku soko ye cilema du cono yena mu muwili wakwe, holeka si kosuma kusejelela behi ne libupa lyo mwenda, hamba kusejelela ha cikumbicilo. Ho yalece kuvitajila iwifyo vinhu vivyo vyono vyelile. Hambi ane, nha yo nene Muwaha Mulungu. Nane yo nene mono nghuvyeza.”

²⁴ Na zizi zo Musa yamulonjela Haluni, hamonga ne wanagwe, sunga na kuli wanhu wose Waisilayeli.