Walawi 20 - Luganuzi Luswanu Kuli Wanhu Wose 2002

Wulipicizwe ku so cibede

¹ Muwaha Mulungu yakamulonjela Musa,

² yawalonjele wanhu wa Isilayeli yatye nhavi, “Yunji wa muli nyenye, hamba wa muli wajenzi wono mwikalane nawo, mono komulavya yumonga wa muli wanagwe, yetumamilwe mu wuhembi wo mulungu Moleki, munhu yuyu yatowangwe ne mabwe ne mhuga yose ya Waisilayeli sunga yafwe.

³ No munhu wo wose mono kumulavya yumonga wa muli wanagwe kuli mulungu Moleki, no kulinoza Lihema lyangu lyono lyelile liwe iwifyo, no kulipela cevu litagwa lyangu, nane nomuleka munhu yuyo hamba si nomuwaliliza kanyhi hamonga ne wanhu wangu.

⁴ Na hono mhuga ye Waisilayeli walece kuzicelelela zizo zono yetumile, hamba kumuwulaga,

⁵ nene no mweneco nomwizila munhu yuyo hamonga na we mhuga yakwe wose, sunga na wose wono wowa vihanjile nayo mu wu wula wihuwilwa kuli'ne, wono wakumuhemba Moleki. Ane nane si nowawaliliza kanyhi hamonga ne wanhu wangu.

⁶ “Hono munhu wo wose yabite kuli we macisi, hamba kuli wahawi, kulondola wutazi kuli wene, nane nomwizila, hamba si nomuwaliliza kanyhi hamonga ne wanhu wangu.

⁷ Mweze mwelile, hambi 'ne nha yo nene Muwaha Mulungu wenyu.

⁸ Mugakamise malajilizo gangu, hambi ane nha nili Muwaha Mulungu, nane nghumunozenyi muwe mwelile.”

⁹ Muwaha Mulungu yakalajiliza yakatya, “Hono munhu wowose yamulijite sogwe hamba nyina, munhu yuyo yanojeye yawulagwe. Hambi nha kesacila kufwa mweneco.

¹⁰ “Na hono munhu yebatwe yakusenyha no mugolece wo Mwiisilayeli muyagwe, awo wose mulume no mucekulu wanojeye wawulagwe.

¹¹ No munhu wowose mono kogona no yumonga wa muli wagolece wo sogwe, yakumukoza cevu sogwe. Awo nawo vyono wejete mulume no mucekulu, wanojeye wawulagwe. Hambi nha wesacila lifwa weneco.

¹² No munhu hono yagone no mugolece wo mwanagwe, wose vyono wejete wanojeye wawulagwe, hambi nha vigona munhu no mwanagwe. No wuwulagwe wawo yowa nghani yawo weneco.

¹³ Na hono munhu mulume yagone no mulume muyagwe, wawo wetuma nghani ya cevu muno muno, holeka wose yiwanojeye wawulagwe. Hambi nha wesacila lifwa weneco.

¹⁴ Na hono munhu yawatole yawahanze, mwana no nyina yakwe, awo wose vyono wadatu, wanojeye wakongogwe mu moto sunga wafwe, ku soko ya nghani ye cevu yono wayitumile. Ne nghani ye liwala lili, yinojeye yilece kulecelezwa hamba hadodo, yitumwe muli nyenye.

¹⁵ Na hono munhu yagone ne nimu, munhu yuyo hamonga ne nimu yiyo wose wawulagwe.

¹⁶ Na hono mucekulu yejelele nayo yagone ne nimu, mucekulu yuyo hamonga ne nimu, wose wawulagwe. Hambi nha wesacila lifwa weneco.

¹⁷ “Na hono munhu yamutole lumbulye hamba u lumbulye mono wahanjile sogo yawo hamba nyina yawo, wanojeye wakozwe cevu calinze, kanyhi wakomwe mu mhuga. Hambi nha vigona no lumbulye, holeka wanojeye wawubocele wulipicizwe wayo.

¹⁸ Na hono munhu yagone no mucekulu mono yali mu vilo vyakwe vyo mwezi, awo wose vyono wejete wanojeye wakomwe mu mhuga, hambi nha wabena wulajilize wo wavufywe.

¹⁹ Na hono munhu yagone no muwahawe wo nyina yakwe, hamba no lumbulye lyo sogwe, wose vyono wejete wanojeye wabocele wulipicizwe wawo.

²⁰ Na hono munhu yagone no mugolece wo sogwe muwaha, hamba wo sogwe mudodo, wose vyono wejete wokwidinghulila wubi wawo, kanyhi wofwa wasina wana.

²¹ Na hono munhu yatole mugolece wo muwahawe hamba wo mwanakwawe, nawo wofwa wasina wana. Hambi nha ketuma nghani ye 'wifyo, no kumukoza cevu muwahawe.”

²² Muwaha Mulungu yakatya, “Ale mugakamisaje malajilizo gangu hamonga no wulajilize, ho yisi ya Kanani yilece kumulemenyi, yisi yono nghumutegulenyi.

²³ Mulece kusolela myoto ye wanhu wono wekaye mumo. Hambi 'ne nha nghuwawinga we makungugo, anye ho musume kwinjila mu yisi yiyo. Hambi nha wanghoza cevu ku so metumo gawo mabi gono wakwituma.

²⁴ Ninga lu, nghondya kumwihuwizizenyi yisi yiyo, yono yina wugoli wose hamonga no moso mwinji, ho yiwe yisi yenyu, ane nomupelenyi nyenye. Ane yo nene Muwaha Mulungu wenyu, yo nene mono namusiwanulenyi ku wulawa mu makungugo ganji.

²⁵ Ho musume kumanya kuzisiwanula zi nimu ne zi ndeje, zono nyezwe na zono si nyezwe. Nanye mulecele lukulu kulya zi nimu ne zindeje ze liwifyo. Hambi nha nakondya kuzanza vyono zili iwifyo, na hono mulye, mokwavufywa.

²⁶ Munojeye muwe mwelile, kanyhi muli wangu, hambi 'ne nha yo nene Muwaha Mulungu, nelile. Nane nghamusiwanulenyi mu wulawa mu makungugo ganji, ho muwe muli wangu nene du nili wene.

²⁷ “No munhu wo wose hono yawe mulume hamba mucekulu, hono yabite kuli we macisi ne wahawi kulondola wutazi kuko, munhu yuyo yatowangwe ne mabwe sunga yafwe. No munhu wo wose mono kokwituma zono zinha zizi, kokwisacila lifwa mweneco.”