Walawi 2 - Luganuzi Luswanu Kuli Wanhu Wose 2002

Cilavywa co wusaje

¹ “Na lono yunji yawe yakulavya cilavywa co wusaje kuli Muwaha Mulungu, yimunojeye yalavye wusaje wono wunamuce viswanu. Kanyhi yimunojeye yawuhanzahanze ne mafuta hamonga no wuvumba,

² ho yawe kuwuleta kuli wana wa Haluni i wakohani. Nayo Mukohani mono yakulongoza wuhembi, yasole yiganza limonga lyo wusaje wuwo, hamonga ne mafuta, no wuvumba wose, yavikongoje vyose mu cikumbicilo, ho ciwe citanjilo cono cikulajila nha vyono vyose vilavywa kuli Muwaha Mulungu. Ne cilavywa ci cino ce ndigwa, co cikwendeza kuli Muwaha Mulungu.

³ No wusaje wono wowa wusigaye, awo wowa sawo ya Haluni hamonga ne wanagwe, hambi nha welile, vyono wusigala mu wulawa mu ndigwa yono yilavigwe kuli Muwaha Mulungu.

⁴ “Na hono cilavywa ciwe ca mukate wono wuteleceligwe mu nyungu, weze mukate mutelece, wono wusina cisase. Kanyhi yeze mikate yono yina njiga mbaha, minozwe no wusaje wono wunamuce, wono muhanzahanzwe ne mafuta, hamba lunji ziwe bisikuti zono njidile mafuta.

⁵ Na hono cilavywa ciwe ca mukate wono wuteleceligwe mu cikalango, weze mukate wono wutelecigwe no wusaje wono muhanzahanzwe ne mafuta, ninga weze wusina cisase.

⁶ Wutiwaje wuwo wusaje ho wuwe kujidila mafuta mucanyha yayo, lono wukuwulavya kuli Muwaha Mulungu nha cilavywa.

⁷ Na hono cilavywa ciwe ca mukate wono mutelecele mu nyungu, mukate wuwo weze wa wusaje wono wunamuce, wuhanzahanze ne mafuta.

⁸ Nagwe wuwuletaje nha cilavywa, mu nzila yo mukohani mono yo kosuma kuleta cico cilavywa cako ku cikumbicilo.

⁹ Nayo mukohani yasole cibegulwa cidodo co mukate, yacikongoje mu cikumbicilo, ciwe nha citanjilo cono cikulajila nha vyono, vyose vyakondya kulavywa kuli Muwaha Mulungu. Ne mhunjile ye cilavywa ci cino ce ndigwa, yikwendeza kuli Muwaha Mulungu muno muno.

¹⁰ Ne cilavywa cono cowa cisigaye, cowa sawo ye wakohani, hambi nha celile muno, vyono cisolwa ku wulawa mu ndigwa yono yilavigwe kuli Muwaha Mulungu.

¹¹ “Holeka halece kuwa na cilavywa co cose co wusaje cono wukumulavizya Muwaha Mulungu, cono cowa cina cisase. Wulecele lukulu kwitumamila cisase hamba wuci mu ndigwa yono yilavigwe kuli Muwaha Mulungu.

¹² Kanyhi weze kumulavizya malimbuko gako Muwaha Mulungu mu mwaka na mwaka, ninga langa wulece kugakongoga mu cikumbicilo.

¹³ Langa du weze kumbucila kutajila mwino mu vilavywa vyako vyo wusaje, hambi wuwo mwino, nha wo wukulajila i cilagane co Mulungu nagwe. Holeka yikunojeye weze kutajila mwino mu vilavywa vyako vyose.

¹⁴ Na lono wukumulavizya Muwaha Mulungu vilavywa vye malimbuko, yikunojeye wulavye cimhombogwa, hamba mhece zo wuhemba, zono fijihwe ku wulawa mu maso gayo.

¹⁵ Ninga langa, wujidile mafuta hamonga no wuvumba.

¹⁶ Nayo mukohani yasole mhece nyhefu, yazikongoje mu moto hamonga ne mafuta, ciwe cikumbucizo, kanyhi yakongojeze hamonga no wuvumba, yiwe ndigwa ndavye kuli Muwaha Mulungu.”