Walawi 19 - Luganuzi Luswanu Kuli Wanhu Wose 2002

Wulajilize so wele, ne ling'ani

¹ Muwaha Mulungu yakamulonjela Musa,

² yawalonjele wanhu we mhuga ya Isilayeli yatye nhavi, “Mweze mwelile hambi 'ne no Muwaha Mulungu wenyu, nha nelile.

³ Na wose muli nyenye, yimunojeye munhu yawogope nyina no sogwe. Kanyhi muyibataje Sabato nha vyono namulajilizenyi. Ane yo nene Muwaha Mulungu wenyu.

⁴ Mulece kundeka no kuhemba milungu yo wulambi. Kanyhi mulecele lukulu kwinozeza milungu myenjedulwe no kuyihemba. Ane yo nene Muwaha Mulungu wenyu.

⁵ “Na lono mukumuwulajila Muwaha Mulungu mutugo, so cilavywa co mulamu, ale mulanjilile, mutyatye nha vyono namulajilizenyi, nane ho nosuma kucibocela cico cilavywa cenyu.

⁶ Ne nyama yo mutugo wono wuwulagwe, yinojeye yiligwe mwi'zuwa lilyo lyono yiwulajiywe, hamba mwi'zuwa lye kejete. Ne nyama yo yose yono yowa yikali yisigaye sunga mwi'zuwa lye kadatu, nyama yiyo yowa yinojeye yikongogwe mu moto,

⁷ hambi nha yakondya kuwa iwifyo, na hono yunji yejelele yayilye, nane hamba si nocivumila ne cilavywa.

⁸ Nayo munhu wowose hono yayilye nyama yiyo, hobaho kowa musutyi, vyono kenjiza liwifyo muli zo Muwaha Mulungu zono zelile. No munhu yuyo si kowalilizwa kanyhi hamonga ne wanhu wo Mulungu.

⁹ “Na lono muli mu wududuzi we migunda yenyu, mulece kududuliza vyono vili mu mhelo mhelo ye migunda yenyu. Hamba mulece kutondoleza ne mahalalwa gayo.

¹⁰ Hamba mulece kuwuyajila mu migunda yenyu ye mizabibu muwe kuhalaliza zabibu zono zisigaliye, hamba kutondoleza zono zigwiye hasi. Munojeye azo muwalecele wanhu waciwa hamonga ne wanhu wajenzi. Ane yo nene Muwaha Mulungu wenyu.

¹¹ “Wulece kuwa wuli muhizi hamba wuli mungwele, hamba wuli mulambi.

¹² Kanyhi wulecele lukulu kwilahiziza mwi'tagwa lyangu, hono wuwe wumanyile vyono si kosuma kuwufisiliza wihuwizo wako. Hambi wunoza nhavivyo, nha wukuliletela cevu litagwa lyangu. Ane yo nene Muwaha Mulungu wenyu.

¹³ “Wulece kumugalila muyago, hamba kumuhiziza yaye. Kanyhi wulece kucela kumulipa musahala munhu mono yakwitumiye mulimo, wulece kugona hamba lizuwa limonga, wuwe wukali si namupela.

¹⁴ Wulece kumulijita munhu we ciziwi, hamba kumuwicila cikobazo we cibofu ho yekobaze. Wunyogopaje, hambi 'ne nha yo nene Muwaha Mulungu wako.

¹⁵ “Weze mwihuwilwa, kanyhi wuli ling'ani, lono wukulamula mu vyalo. Wulece kuhijila mbejele kuli muciwa, hamba kumuwonela cevu munhu mugoli.

¹⁶ Wulece kutandaza zinghani ze maheho kuli munhu wo wose. Na hono hawe hoyuli munhu yunji mono yena calo cono comwambuza yawulagwe, nagwe hono wuwe wina wuhomelezi wono wosuma kumutaza wumi wakwe, ale, wuhomelele calinze ho wumutaze. Ane yo nene Muwaha Mulungu.

¹⁷ “Wulece kuwa no lusulo kuli yunji wo wose, ninga viswanu mwilamule nayo, ho wulece kutuga wubi ku soko yakwe.

¹⁸ Wulece kwilipiciza kuli munhu wo wose, hamba kujendelela kumusula, langa yikunojeye wumwende muyago nha vyono wiyendile gwegwe go mweneco. Ane yo nene Muwaha Mulungu.

¹⁹ “Mugakamisaje malajilizo gangu, mulece kulezya mitugo zenyu ne mbeyu yono yisimajiye. Mulece kuhadika mbeyu yono yisimajiye mu mugunda monga. Mulece kuvwala mwenda wono wina mawala mejete gono gesimajiye.

²⁰ “No munhu hono yagone no muwanda we cicekulu wo munhu yunji, mono yakali nakombozwa hamba kulekwa mwelecele, ale wose vyono wejete wanojeye walipicizwe, ninga walece kuwulagwa, hambi mucekulu yuyo nha muwanda du.

²¹ Ninga munhu yuyo, yanojeye yalete nduwilu ha mulango we Lihema lyangu lyono lyelile, yiwe co cilavywa co wusutye.

²² Nayo mukohani yayisole nduwilu yiyo yamunozeze wilamule munhu yuyo, ku so wubi wakwe. No Mulungu komunenela.

²³ “Nanye kolo mweza kwinjila mu yisi ya Kanani, na kolo mwahadika mawala gose ge mibici yono yikulela mana, ale mukumbucile, mugawonaje mana ge mibici yiyo vyono iwifyo, holeka mulece kugalya sunga yipulute myaka midatu. Na mu cipango cico cose mulecele lukulu kugalya.

²⁴ Na mu mwaka we kane, mana gose ge mibici gosiwanulwa, gawe cilavywa cono cikulajila lilumbo lyenyu kuli'ne no Muwaha Mulungu.

²⁵ Ninga mu mwaka we 'hano, mosuma kulya mana ge mibici. Na hono munoze nhavivi, mibici yenyu yolela mana kuciza. Ane yo nene Muwaha Mulungu wenyu.

²⁶ “Mulece kulya nyama hamonga ne sakami yayo. Mulece kwitumamila zinghani ze cigangaganga, hamba kutowa cisangu.

²⁷ Mulece kuyisilula mitwe yenyu, hamba kuceta cidevu.

²⁸ Mulece kwisalanga masale mu miwili yenyu, hamba kwikakata no moto so wulilila wono wafwiye. Ane yo nene Muwaha Mulungu.

²⁹ “Mulece kuwakoza cevu wana wenyu we cicekulu ko kuwanoza wawe wasenyha. Hambi hono munoze nhavivyo, nha moyiwuyila milungu yo wulambi, no kuyinoza yisi yimemywe no wusenyha.

³⁰ Wuyikamise Sabato, kanyhi muhapelaje cogopo i hanhu hono ane nghuhembelwa. Ane yo nene Muwaha Mulungu.

³¹ “Mulece kuwabitila we macisi, hamba i wahawi, no kulondola wutazi kuli wene. Hambi hono munoze zizo, nha mowa mweza wavufywe. Ane yo nene Muwaha Mulungu wenyu.

³² “Mweze kuwapela cogopo i wakombi, no kuwapela lilumbo lyawo. Munyogope nene, ane no Muwaha Mulungu.

³³ “Mulece kuwegalila i wajenzi wono mwikalane nawo mu yisi yenyu.

³⁴ Muwanozeze viswanu nha vyono mukuwanozeza Iwaisilayeli wayenyu, kanyhi muwendaje nha vyono mwiyendile nyenye nyo weneco. Mukumbucile vyono nanye mwali wajenzi mu yisi ya Misili. Ane yo nene Muwaha Mulungu wenyu.

³⁵ “Mulece kwitumamila vipimo vyo wukonji mu wuzito, no wutali na mu winji.

³⁶ Langa mwitumamile vipimilo vye ling'ani, vipimo vyo wuzito, ne mizani ye ling'ani. Ane yo nene Muwaha Mulungu wenyu. Nane yo nene mono namuwusenyi mu yisi ya Misili.

³⁷ Mugakamisaje malajilizo gangu gose, hamonga no wulajilize wangu. Ane yo nene Muwaha Mulungu.”