Walawi 18 - Luganuzi Luswanu Kuli Wanhu Wose 2002

Wulemezwe we makani go wusenyha

¹ Muwaha Mulungu yakamulonjela Musa

² yawalonjele wanhu Waisilayeli yatye nhavi, “Ane yo nene Muwaha Mulungu wenyu.

³ Holeka mulecele lukulu kutyatya i mikalile ye wanhu wa ku Misili kono mwekalaga, hamba mikalile ye wanhu wa ku Kanani, kuko kono neza kumutegulenyi.

⁴ Langa muzikamisaje zose zono nghumulajilizenyi. Hambi ane nha yo nene Muwaha Mulungu wenyu.

⁵ Holeka muyityatyaje mikalile hamonga ne malajilizo gono nghumupelenyi, holeka nanye mowumipa hono mugakamise. Hambi ane nha yo nene Muwaha Mulungu.”

⁶ Muwaha Mulungu yakalajiliza yakatya, “Yili mwiko mukali, mulecele lukulu kugona na yunji wo wose wa muli wandugu zenyu.

⁷ Wulecele lukulu kumukoza sogo cevu, so kugona no nyina yako. Kanyhi wulecele lukulu kumukoza cevu u nyina yako.

⁸ Wulece kumukoza cevu sogo so wugona na yumonga wa muli wagolece zakwe.

⁹ Wulecele lukulu kugona no lumbulyo, hamba yawe lumbulyo mutumulwa mono yaleligwe no sogo hamba no nyina yako, mono yawilusizwe mu nyumba yo sogo, hamba yawe si muwiluciye wose hamonga mu nyumba yo sogo.

¹⁰ Wulecele lukulu kugona no mwizukuluwo we cicekulu, hambi nha nghani ya cevu muno kuli'gwe.

¹¹ Wulecele lukulu kugona no lumbulyo mono muhanjile nayo sogo yenyu, hamba nyina yenyu, hambi nayo yuyo nha lumbulyo.

¹² Wulecele lukulu kugona no lumbulye lyo sogo,

¹³ hamba muwahawe hamba mwanakwawe wo nyina yako.

¹⁴ Wulecele lukulu kugona no mugolece wo sogo muwaha, hamba wo sogo mudodo, hambi 'gwe, nha nyina yako.

¹⁵ Wulecele lukulu kugona no mugolece wo mwanago,

¹⁶ hamba mugolece wo muwahawo.

¹⁷ Wulecele lukulu kugona no mwana we cicekulu, hamba mwizukulu wo mucekulu mono mwakondya kugona nayo, hambi wawa nha wanduguzo. Hambi nha yowa nha munhu mono yakugona no mwanagwe we cicekulu.

¹⁸ Wulecele lukulu kumutola muwahawe hamba mwanakwawe wo mugolece wako, lono mugolece wako yakali mumi.

¹⁹ “Kanyhi wulecele lukulu kugona no mucekulu, lono yali mu vilo vyakwe vyo mwezi, hambi nha yakali yeyavufye.

²⁰ Wulecele lukulu kugona no mugolece wa munhu yunji, hambi nghani yiyo nha yokunoza wuwe wuli mwavufywe.

²¹ “Kanyhi mulecele lukulu kuwalavya i wana wenyu we cicekulu, wetumamilwe mu wuhembi wo mulungu Moleki. Hambi nghani yiyo, nha yoliletela cevu litagwa lyo Muwaha Mulungu.

²² “Kanyhi munhu wo wose we cilume, yalecele lukulu kugona no mulume muyagwe, hambi Mulungu nha si yakuzisacila lukulu ze liwala lilyo, hambi nha iwifyo kuli'nye.

²³ Kanyhi go munhu wo wose we cilume hamba we cicekulu, wulecele lukulu kugona ne nimu ye liwala lyo lyose, hambi awu nha wuhodanji.

²⁴ “Holeka, wulecele lukulu kwiyambalila ko kwiyavufya go mweneco, so wituma limonga lya muli makani gago. Hambi makani ge liwala lilyo, nha go gakuwavufya we makungugo wono wekaye mu yisi yono mukuyibitila kuyihala, yisi yono Muwaha Mulungu yakuwawinga, anye ho mukayihale.

²⁵ Hambi metumo gawo nha gayinoza yisi yiwe iwifyo. Holeka Muwaha Mulungu yakuyilipiciza yisi, no kuyinoza yisi vilemwe ne wanhu wono wekaye mumo.

²⁶ Nawo wakagetuma makani ga gano, no kuzipitulanya zono zinojeye, no kuyinoza yisi yiwe iwifyo. Ninga anye mulecele lukulu kugetuma makani ge liwala lilyo.

²⁷ Nanye wose muli nyenye, hono nyenye mo Waisilayeli, hamba wajenzi wono mwikalane nawo, munojeye wose mugakamise malajilizo go Muwaha Mulungu, hamonga no wulajilize wayo.

²⁸ Holeka nanye si mokwilemwa ne yisi yiyo, nha vyono vyelemwa na we makungugo, wono wamulongolelenyi kwikala mu yisi yiyo.

²⁹ Kanyhi mumanye vyono, munhu wo wose mono kokwituma linji lya mu mawifyo gaga, munhu yuyo si kowalilizwa kanyhi hamonga ne wanhu wo Mulungu.”

³⁰ Muwaha Mulungu yakalonga kanyhi yakatya “Ale, mugakamisaje malajilizo gose gono namupelenyi, kanyhi mulecele lukulu kwiga mikalile ye wanhu wono wamulongolelenyi kwikala mu yisi yiyo. Kanyhi mulecele lukulu kwiyambalila ko kwiyavufya nyo weneco, so wituma limonga lya muli makani gaga. Hambi ane nha yo nene Mulungu wenyu.”