Walawi 17 - Luganuzi Luswanu Kuli Wanhu Wose 2002

Wele we sakami

¹ Muwaha Mulungu yakamulonjela Musa,

² nayo Musa yamulonjele Haluni hamonga ne wanagwe, ne Waisilayeli wose wulajilize awu,

³ Mwiisilayeli wowose mono kowulaga ng'ombe, hamba ngholo, so kumulavizya Muwaha Mulungu,

⁴ hono yalece kuyiwulajila ha mulango we Lihema lyono lyelile, munhu yuyo kowa yabena wulajilize. Kamwaga sakami caka, holeka nayo, si kowalilizwa ne wanhu wo Mulungu.

⁵ Ne nhunizo ye lilajilizo lili, yoyi, i wanhu wa Isilayeli ku wulawa zuwali, weze kuzileta mitugo zawo kuli Muwaha Mulungu, mitugo zono waziwulajilaga ako na ako mu'si. Alu yiwanojeye wazilete zose kuli mukohani, ha mulango we Lihema lyono lyelile. Nawo waziwulajile baho, so cilavywa co mulamu.

⁶ Nayo mukohani yasole sakami, yayimize mu zimbavu zose ze cikumbicilo ca baho ha mulango we Lihema. Hanyuma yayikongoje mhama, ho yilete mhunjile swanu yono yikwendeza kuli Muwaha Mulungu.

⁷ Holeka aluno wanhu Waisilayeli, walecele lukulu kuwa si wehuwilwa kanyhi kuli Muwaha Mulungu, walece kuziwulaga kanyhi mitugo zawo caka caka ako na ako mu mawimbi, nha vyono walavyaga kuli milungu ye mvulati yono wayihembaga. Holeka i wanhu wa Isilayeli, yiwanojeye walikamise lilajilizo lili sunga mu vilo vyono vikuza.

⁸ Holeka Mwiisilayeli wo wose, hamba mujenzi mono kekalanaga nawo, mono yakulavya cilavywa cinyanywe, hamba cilavywa ce liwala lyo lyose,

⁹ kuli Muwaha Mulungu, mono kolavizya cilavywa cico caka caka ako na ako, yalece kuleta no kulavizya ha mulango we Lihema, munhu yuyo si kowalilizwa kanyhi hamonga ne wanhu wo Mulungu.

¹⁰ Na hono Mwiisilayeli wo wose, hamba mujenzi mono wekalane, hono yalye nyama hamonga ne sakami yayo, hodu Muwaha Mulungu komuleka, si kowalilizwa kanyhi hamonga ne wanhu wo Mulungu.

¹¹ Vyono, wumi wa muli vyose vyumi vya mono'nze, nha wuli mu sakami, na yiyi yo soko yono yikuleka Muwaha Mulungu yakulajiliza vyono sakami yose, yinojeye yitilwe mucanyha ye cikumbicilo, ho yinoze wilamule. Sakami yono wo wumi, yo yikunoza wilamule.

¹² Na yiyi yo soko yono yikuleka Muwaha Mulungu yakuwalonjela wanhu wa Isilayeli vyono, weneco hamba mujenzi mono yekalane nawo, walecele lukulu kulya nyama hamonga ne sakami yayo.

¹³ Na hono Mwiisilayeli hamba mujenzi mono yekalane nawo, yapelembe nimu, hamba ndeje, yono si iwifyo, ale yimunojeye yayite sakami yayo hasi, yayifucize no muhangha.

¹⁴ Vyono wumi we vyumi vyose vya mono'nze, nha wuli mu sakami. Na yiyi yo soko yono yikuleka Muwaha Mulungu yakuwalonjela wanhu Waisilayeli, vyono walecele lukulu kulya nyama hamonga ne sakami yayo. Na hono yunji yejelele, hodu munhu yuyo si kowalilizwa kanyhi ne wanhu wo Mulungu.

¹⁵ No munhu wo wose, hono yawe Mwiisilayeli hamba yawe mujenzi, mono kolya nyama ya nimu yo yose yono yifwiliye yeneco, hamba yono yiwulagwe ne zinimu za mu mbago, yimunojeye munhu yuyo yakanze myenda yakwe, yehovuje no muwili wakwe, ninga kojendelela kwikala nhavivyo sunga lizuwa kono lyoswela, nayo ho kowalwa vyono yakondya kwezwa.

¹⁶ Na hono yalece kuwutyatya wulajilize wuwu, munhu yuyo kolipicizwa.