Walawi 16 - Luganuzi Luswanu Kuli Wanhu Wose 2002

Lizuwa lyo wilamule

¹ U Muwaha Mulungu, yakamulonjela Musa, lono i wana wejete wa Haluni, wali wakondya kufwa, so wulavya moto wono si welile kuli Muwaha Mulungu.

² Muwaha Mulungu yakamulonjela Musa yakatya, “Mulonjelaje muwahawo Haluni, vyono yimunojeye yenjile kugati ye libupa lyo mwenda, ku Hanhu hono helile, helile muno, mu cidaha cono cinojeye du. Hambi hanhu baho nha ho hanhu hono nosuma kwilajilila mwi'vunde, hacanyha ye ligoda lyo lusungu mucanyha ye Lisanduku lye Cilagane. Na hono yalece kuwa ne cihuliko, kofwa.

³ Nayo kosuma kwinjila i Hanhu hono helile, helile muno, lono yena ne nzeku ye cilavywa co wubi, ne nduwilu so cilavywa cinyanywe.”

⁴ Muwaha Mulungu yakawa kumupela Musa wityatye awu, yakatya, “Lono Haluni yakali si nenjila mu Hanhu hono helile helile muno, yimunojeye yamule yehovuje, hanyuma yavwale ne myenda ye cikohani, nha cinji musweko we bafuta wono welile, ne suluwale ye bafuta, hamonga no musipi, no mukumbo.”

⁵ Nawo mhuga ye Waisilayeli, wamuletele Haluni mvulati nyejete, so cilavywa co wubi, na ngholo nyejete so cilavywa cinyanywe.

⁶ Nayo Haluni yalavye nzeku so cilavywa co wubi wakwe yenozeze wilamule, hamonga na we mhuga yakwe.

⁷ Hanyuma ho yazitegule zi zilya zimhene zi nyejete ha mulango we Lihema lyono lyelile.

⁸ Nayo baho, yatowe kula mu nzila yo kwitumamila mabwe mejete, gono limonga lyandicigwe, “Ku so Muwaha Mulungu.” Ne liyagwe lyandicigwe, “Ku so Azazeli.”

⁹ Nayo Haluni yayilavye mhene yono yiwajigwe ne libwe lyono lyandicigwe “Ku so Muwaha Mulungu,” yiwe so cilavywa co wubi.

¹⁰ Ne mhene ayilya yono yiwajigwe so Azazeli, yayilavye kuli Muwaha Mulungu yili nyumi. Hanyuma yayitegule ku nyika kuli Azazeli, ho yinoze wilamule kuli wanhu.

¹¹ Na lono Haluni yakulavya nzeku, cilavywa co wubi kuli mwene hamonga ne mhuga yakwe,

¹² yasole lizaye yalimemye makala gono gakulawa mu cikumbicilo. Yasole no wuvumba wuswanu muno maganza mejete. Yenjile navyo mu Hanhu hono helile, helile muno.

¹³ Na mumo mugati mwi Hema lyono lyelile, yasole wuwo wuvumba yawutajile mu moto, ne lyosi lyo wuvumba lyotitiliza cigubiko ce Lisanduku lye Cilagane, ho mwene yalece kuliwona, ho yalece kufwa.

¹⁴ Hanyuma ho yasole sakami ndodo ye nzeku ne cidole cakwe, yayimize mucanyha ye cigubiko ce Lisanduku, na yinji yayimize kali mupunghati ku mwande ye Lisanduku lye Cilagane.

¹⁵ Hanyuma ho yayiwulaje mhene so wubi we wanhu, yalete sakami yayo i Hanhu hono helile, helile muno, yayimize mucanyha ye cigubiko ce Lisanduku, na yinji yayimize ku mwande ye Lisanduku nha vyono yanozize mu sakami ye nzeku.

¹⁶ Na mu nzila yiyi, kowa yakondya kunoza wilamule we Hanhu hono helile, helile muno, ku wulawa mu wavufywe we wanhu wa Isilayeli, na mu wulawa mu wubi wawo wose. Kanyhi yimunojeye yanoze nhavivi sunga na mwi 'Hema, hambi nha yisimye hagati ye nghambi, hono si hezwe yaye.

¹⁷ Na lono Haluni yakwinjila mugati ye Hanhu hono helile, helile muno, ho yenozeze wilamule, munhu wo wose yalecele lukulu kuwa mugati ye Lihema mwi'pango lilyo, sunga kolo yakondya kwinozeza wilamule mweneco hamonga na we mhuga yakwe, ne mhuga yose ya Isilayeli no kulawila kunze.

¹⁸ Hanyuma ho kosuma luno kubita ku cikumbicilo ca kunze, co kulavizya cilavywa cinyanywe, no kucinozeza wilamule. Ninga yimunojeye Haluni, yasole sakami ndodo ye nzeku, hamonga ne sakami ndodo ye mhene, yayitajile mu mahembe ge cikumbicilo mbavu zose vyono yine.

¹⁹ Kanyhi yazabice cidole cakwe mu sakami, yayimize mu cikumbicilo kali mupunghati. Na mu nzila yiyi, kowa yanoza wezwe we cikumbicilo mu wulawa mu wubi we wanhu wa Isilayeli, no kucinoza ciwe celile.

Mvulati yo kwipunjila wubi

²⁰ Nayo Haluni kolo yakondya mulimo wo kuhanozeza wilamule i Hanhu hono helile, helile muno, hamonga ne Lihema lyono lyelile, ne cikumbicilo, ale, yayiletaje kuli Muwaha Mulungu yi yilya mvulati yono yikahagulwa ku so Azazeli.

²¹ Nayo yayijelece miwoko yakwe yose vyono myejete, mu mutwe we mvulati yiyo nyumi. Yawe kuvumilila mu mutwe we mvulati, masutya gose, no wubi wose, hamonga no wubedegazi wose we wanhu Waisilayeli. Na mu nzila yiyo, kowa yagawika masutya gose mu mutwe we mvulati yiyo. Hanyuma yayisole mvulati yiyo, yamwibatize munhu mono yamuwikanize mweneco, nayo munhu yuyo yayitegule sunga ko ku nyika.

²² Nayo mvulati yiyo yowudinghula wubi wawo wose sunga ku yisi yono si wekalaga wanhu wanji, nayo koyilecela mvulati yiyo mu nyika.

²³ Hanyuma Haluni yenjile mwi 'Hema, yavule myenda yakwe yo wukohani, yono yali yayivwala lono yali yakali nenjila mugati ye Hanhu hono helile, helile muno, yayilece mumo.

²⁴ Nayo yimunojeye yehovujile muwili wakwe i Hanhu hono helile, yavwale ne myenda yakwe yono si yo wukohani. Kolo yeza kukondya, yalawile kunze, yalavye cilavywa cinyanywe co wubi wakwe, hamonga no wubi we wanhu. No kunoza wilamule ku so mweneco, na ku so wanhu.

²⁵ Yasole mhama yo mutugo wuwo, yayikongojele mu cikumbicilo, so cilavywa co wubi.

²⁶ Nayo munhu yuyulya mono yayiteguye ku nyika mvulati kuli Azazeli, yimunojeye yakanze myenda yakwe, yehovuje no muwili wakwe, lono yakali si nenjila mu nghambi.

²⁷ Nayo nzeku, hamonga ne mvulati zono zitumamiywe mulimo we cilavywa co wubi, zono ne sakami yazo yitumamilwa mugati mu Hanhu hono helile, helile muno, so kuleta wilamule, zizo zisolwe zitegulwe kunze ye nghambi, zibite zikakongogwe kuko. Nyama yazo, ne nyhingo, ne matumbu gazo, vyose vinojeye vikongogwe.

²⁸ Nayo munhu mono kowituma mulimo wuwo wo kukongoga, yimunojeye yamule yakanze myenda yakwe, yehovuje no muwili wakwe, ho yenjile mu nghambi.

Wukumbucile we lizuwa lyo kunozezwa wilamule

²⁹ Awu nawo wowa wulajilize, wono munojeye muwukamise sunga mu vilo vyose vyono vyokuza. Mwi'zuwa lye likumi lya mu mwezi wo mupunghati, yinojeye wanhu wose Waisilayeli, hamonga ne wajenzi wono wekalane nawo, wose walece kulya mwi'zuwa lilyo, hamba kwituma mulimo wunji.

³⁰ Hambi mwi'zuwa lilyo, nha monozezwa wilamule, so wezwe wo wubi wenyu, ho muwe mwelile.

³¹ Ne lizuwa lilyo, yo sabato yo wucehe no kunoza wuhembi munojeye mulinoze liwe lyelile muno muno, lyo lizuwa lyono woleka kulya, kanyhi walece kwituma hamba mulimo wunji wowose. No wulajilize wuwu wunojeye wukamiswe sunga mu vilo vyose vyono vikuza.

³² No Mukohani Muwaha mono yetiywe mafuta no kusiwanulwa, ho yawe mukohani mu hanhu ho sogwe, yuyo yo konoza wilamule yavwalile ne myenda yo wukohani,

³³ ho yahanozeze wilamule i Hanhu hono helile, helile muno, ne Lihema lyono lyelile ne cikumbicilo, ne wakohani, hamonga ne wanhu wose we mhuga yose.

³⁴ No wulajilize wuwu wunojeye wukamiswe sunga mu vilo vyose vyono vikuza. No wuhembi wuwu wunojeye wuwe kunozwa kamonga mu mwaka, so kuwanozeza wilamule i wanhu Waisilayeli ku so wubi wawo wose. Nayo Musa yaketuma zose nha vyono Muwaha Mulungu yamulajiliza.