Walawi 15 - Luganuzi Luswanu Kuli Wanhu Wose 2002

Wavufywe so wufila wa mu muwili

¹ Muwaha Mulungu yakawalonjela Musa na Haluni yakatya,

² Walonjele wanhu wa Isilayeli wulajilize awuno wutye nhavi, Hono munhu yejele yakulawa wufila mu muwili wakwe, ale munhu yuyo yaweza mwavufywe so wuwo wufila wakwe,

³ hamba yiwe wufila wakwe wukulawila hamba wuwe si wukulawila, mwene yawa mwavufywe du so wufila wakwe.

⁴ Ne citanda co cose cono munhu yuyo kukwikalila, hamba kutambalala mucanyha yaco, ne citanda cico naco cawa iwifyo.

⁵ No munhu wo wose mono kocipamiza cico citanda cakwe,

⁶ hamba kwikala mucanyha ye cinhu co cose cono cakondya kwikalilwa no munhu yuyo, yinojeye yakanze myenda yakwe, kanyhi yehovuje no muwili wakwe. Kanyhi yajendelele kuwa mwavufywe sunga lizuwa kono lyoswela.

⁷ No munhu wo wose mono kumupamiza yuyo munhu mono yakulawa wufila, yimunojeye yakanze myenda yakwe, yehovuje no muwili wakwe. Ninga kojendelela kuwa mwavufywe sunga lizuwa kono lyoswela.

⁸ No munhu mono yena wufila, hono yamufunyile mate munhu muswanu, munhu yuyo mono yafunyiywe mate, yimunojeye yakanze myenda yakwe, yehovuje no muwili wakwe, ninga kojendelela kuwa mwavufywe sunga lizuwa kono lyoswela.

⁹ No munhu wo wose hono yekalile matandiko ge ndogowe, hamba cikalilo co cose cono munhu mono yena wufila yakondya kwikalila, munhu yuyo nayo, yaweza mwavufywe.

¹⁰ No munhu wo wose mono kopamiza cinhu co cose, cono yakondya kwikalila munhu yuyo wo wufila, hodu yaweza mwavufywe sunga lizuwa kono lyoswela. No munhu wowose mono kodinghula cinhu co cose, cono yakondya kwikalila munhu mono yena wufila, yimunojeye yakanze myenda yakwe, yehovuje no muwili wakwe, ninga kojendelela kuwa mwavufywe sunga lizuwa kono lyoswela.

¹¹ No munhu mono yena wufila, lono yakali nezuguza miwoko yakwe, hono yunji wo wose yamupamize munhu yuyo nayo mono yamupamize, yimunojeye yakanze myenda yakwe, yehovuje no muwili wakwe, ninga kojendelela kuwa mwavufywe sunga lizuwa kono lyoswela.

¹² Ne ciya co cose ce lilongo cono munhu yuyo mono yena wufila kocipamiza, cinhu cico cinojeye citulangwe. Langa cinhu cocose ce mabici, cono kocipamiza munhu yuyo mono yena wufila, aco cinojeye cizuguzwe du mu malenga.

¹³ No munhu kolo yakondya kunoga mu wutamwa wakwe wo kulawa wufila mu muwili wakwe, yimunojeye yamule yekale vilo mupunghati, hanyuma yakanze myenda yakwe, yehovuje muwili wakwe mu malenga momi, nayo kowa yakondya kwezwa.

¹⁴ Na mwizuwa lyo munana, yasole nghunda nyejete hamba nziwa nyejete, yazilete ha mulango we Lihema lyono lyelile, yamupele mukohani.

¹⁵ Nayo mukohani yayilavye monga, yiwe so cilavywa co wubi, ne nzagwe so cilavywa cinyanywe. Na mu nzila yiyi, mukohani kowa yanoza wilamule kuli munhu yuyo hali Muwaha Mulungu.

¹⁶ Na hono munhu yalavye mbeyu yakwe yo lulelo, yimunojeye yehovuje muwili wakwe, kanyhi yajendelele kuwa mwavufywe sunga lizuwa kono lyoswela.

¹⁷ Ne cinhu co cose cono colagalilwa na yiyo mbeyu yakwe yo lulelo, hono ciwe cinozwe na nyhingo hamba mwenda, cinhu cico cinojeye cikanzwe, kanyhi cojendelela kuwa iwifyo sunga lizuwa kono lyoswela.

¹⁸ Kanyhi mulume lono yawe yakondya kugona no mucekulu, no kulavya mbeyu yo lulelo yiwanojeye wose vyono wejete, wehovuje miwili yawo, kanyhi wojendelela kuwa wavufywe sunga lizuwa kono lyoswela.

¹⁹ Na hono mucekulu yawe yali mu vilo vyakwe vyo mwezi, yekalaje mwavufywe sunga vilo mupunghati vipulute. No munhu wowose mono komupamiza, nayo kowa yakondya kwiyavufya sunga lizuwa kono lyoswela.

²⁰ Sunga ne cinhu cocose cono kokwikalila, hamba kutambalala mucanyha yaco, lono yali mu vilo vyakwe vyo mwezi, i vinhu vivyo vyowa iwifyo.

²¹ No munhu wowose mono kocipamiza citanda cakwe, hamba cinhu co cose cono yakondya kwikalila,

²² munhu yuyo yanojeye yakanze myenda yakwe, yehovuje no muwili wakwe,

²³ ninga kojendelela kuwa mwavufywe sunga lizuwa kono lyoswela.

²⁴ Na hono munhu yagone nayo, lono yakali yali mu vilo vyakwe vyo mwezi, munhu yuyo yakwitajila wavufywe no lukwe lwakwe. Holeka munhu yuyo kokwikala mu wavufywe vilo mupunghati. Sunga ne citanda cono yakugonela naco cawa iwifyo.

²⁵ Na hono mucekulu, yawe yakuzaza sakami mu vilo vyono si vya mu vilo vyakwe vyo mwezi, hamba hono yawe yakujendelela kuzaza sakami na lono vilo vyakwe vyo mwezi vyakondya kupuluta. Hodu, mucekulu yuyo yajendelele kuwa mwavufywe, mu nghango ye vilo vyakwe vyose, vyono yajendeleye kuzaza sakami yakwe, nha vyono kawezaga lono yali mu vilo vyakwe vyo mwezi.

²⁶ Sunga ne citanda cakwe cono yakugonela, ne vinhu vyose vyono yakwikalila mwidaha lilyo, vyose vyawa iwifyo.

²⁷ No munhu wo wose mono kovipamiza vinhu vivyo, nayo yawa mwavufywe, na kanyhi yimunojeye yakanze ne myenda yakwe, yehovuje no muwili wakwe, ninga kojendelela kuwa mwavufywe, sunga lizuwa kono lyoswela.

²⁸ Na lono wuzaze we sakami yakwe wuwe waduma, yamule yekale vilo mupunghati. Ne vilo vivyo mupunghati kolo vyapuluta, hodu nayo kowa yakondya kwezwa.

²⁹ Na mwi'zuwa lyo munana yasole nghunda nyejete, na nziwa nyejete yazilete kuli mukohani ha mulango we Lihema lyono lyelile.

³⁰ Nayo mukohani yayilavye monga, yiwe so cilavywa co wubi, ne nzagwe so cilavywa cinyanywe. Na mu nzila yiyi, mukohani kowa yanoza wilamule kuli mucekulu yuyo hali Muwaha Mulungu.

³¹ Muwaha Mulungu yakamulonjela Musa yawalonjele wanhu wa Isilayeli, welanjilile muno muno kuli zo wiyavufye, ho walece kulyavufya Lihema lyakwe lyono lyelile, lyono lyali yisimye haciligati ye nghambi, vyono hono wejelele du, wofwa.

³² Nago gaga go malajilizo ga kuli munhu mono yakulawa wufila, hamba mono yakulavya mbeyu yo lulelo ya mu muwili wakwe,

³³ na kuli mucekulu mono yali mu vilo vyakwe vyo mwezi, hamba kuli munhu mono yakugona no mucekulu mono yali mu wavufywe.