Walawi 14 - Luganuzi Luswanu Kuli Wanhu Wose 2002

U wezwe, lono wakondya kunoga wutamwa wo wukoma

¹ Muwaha Mulungu yakamulonjela Musa yakatya,

² Aga go malajilizo go wezwe wa kuli munhu mono yakondya kunoga, mono yali yena wutamwa wo wukoma. Mwi'zuwa lono yuyo munhu yakwanzwa vyono yakondya kwela, ale yimunojeye yaletwe kuli Mukohani,

³ nayo mukohani yamusole yamutegule kunze ye nghambi yakamulanje kuko. Na hono yejele vyono wutamwa wakwe wakondya kunoga,

⁴ hodu mukohani yalajize ziletwe ndeje nyejete zono zelile zono zokwitumamilwa so wezwe, ne cibici co mubici wo muhagata, no mulejehe musisili mudunghu, ne cinhambi ce ezobu.

⁵ Nayo mukohani yalajilize ndeje monga muli zindeje zizilya zi nyejete, yayiwulajile mu ciya ce lilongo, mucanyha ye malenga momi.

⁶ Nayo mukohani yayisole ndeje yi yilya nyumi ye kejete, ne cibici ci cilya co mubici wo muhagata, no mulejehe wu wulya musisili mudunghu, ne cinhambi ce ezobu, yavizabice vyose hamonga mu sakami yiyilya ye ndeje yono yiwulagwe.

⁷ Hanyuma, mukohani yayisole sakami yiyo, yamumizize kali mupunghati, u munhu yuyo mono yakuhila kwezwa mu wulawa mu wutamwa wakwe. Hobaho yamwanze munhu yuyo vyono yakondya kwezwa. Hanyuma yayilecele yiyilya ndeje nyumi, yiguluce yibite mu mawimbi.

⁸ Nayo munhu yuyo yayikanze myenda yakwe, yacete ne zimvwili zakwe, kanyhi na mweneco yehovuje. Nayo hodu kowa yakondya kwezwa. Nayo lu yadahile kwinjila mu nghambi, ninga yalece kuhelela mwi'hema lyakwe, sunga vipulute vilo mupunghati.

⁹ Na mwizuwa lyo mupunghati, yazicetaje kanyhi zimvwili zakwe hamonga ne zindevu zose, sunga ne zinyhiti zakwe, ne zimvwili zakwe zose zono zili ako na ako mu muwili wakwe. Hanyuma yayikanze kanyhi myenda yakwe, yehovuje no muwili wakwe. Baho nhondo ho kowa yakondya kwezwa.

¹⁰ Na mwi'zuwa lyo munana, munhu yuyo yalete nduwilu nyejete, na ngholo nyhekulu monga, ya mwaka monga, zono nhelevu zisina cilema co cose. Hamonga na kilo yidatu zo wusaje wono muhanzahanzwe ne mafuta. Kanyhi ne mafuta cikombe cimonga.

¹¹ Nayo mukohani yamusole munhu yuyo hamonga ne vilavywa vivyo vyose, yamutegule sunga ko ku mulango we Lihema lyono lyelile.

¹² Mukohani yasole nduwilu monga ya muli zizo, hamonga ne mafuta cikombe cimonga. Yavilavye viwe cilavywa co wusutye. Yavinule ho viwe cilavywa cinule hali Muwaha Mulungu.

¹³ Mukohani yayiwulajile ngholo yiyo i hanhu hono helile, i hanhu hono zikuwa kuwulajilwa mitugo ye cilavywa co wubi, ne cilavywa cinyanywe. Mukohani yanojeye yetume nhavivi, hambi nha vyono cinha cilavywa co wusutye, ale, nhavivyo vyo cinha ne cilavywa co wubi, vyose vikuwa vyo mukohani, hambi nha vyelile muno muno.

¹⁴ Nayo mukohani yasole sakami ndodo ye ngholo, yayibace mu cisonje ce likutu lyo kulume, na mwi'dole kululu lyo muwoko wo kulume na mwi'dole kululu lyo mugulu wo kulume, vyo munhu yuyo, mono kokwanzwa vyono yakondya kwezwa.

¹⁵ Hanyuma mukohani, yasole mafuta madodo yagajidile mwi'ganza lyakwe lyo muwoko wo kucekulu,

¹⁶ yazabice cidole cakwe co muwoko wo kulume yagamize mafuta gago kali mupunghati hali Muwaha Mulungu.

¹⁷ Hanyuma yasole mafuta madodo gono gali mwi'ganza lyakwe, yagahanze hanze hamonga ne sakami ye ngholo, yamubace mu cisonje ce likutu lyo kulume, na mwidole kululu lyo muwoko wo kulume, na mwidole kululu lyo mugulu wo kulume vyo munhu yuyo mono kokwanzwa vyono yakondya kwezwa.

¹⁸ Mukohani kanyhi yagajidile mu mutwe wo munhu yuyo, i mafuta gono gakali gasigaye mwi'ganza lyakwe. Na mu nzila yiyi mukohani kowa yamunozeza wilamule u munhu yuyo hali Muwaha Mulungu.

¹⁹ Hanyuma mukohani ho yalavye cilavywa co wubi no kunoza wilamule. Hanyuma ya zizo, yawulaje mutugo so cilavywa cinyanywe.

²⁰ Yawe kucilavya hamonga ne cilavywa co wusaje, mu cikumbicilo. Na mu nzila yiyi, mukohani kowa yanoza wilamule kuli munhu yuyo. No munhu yuyo nayo, kowa yakondya kwezwa.

²¹ Na hono munhu yawe muciwa yasina cinji, mono si yakusuma ku wulavya cinji, hodu munhu yuyo, kosuma kuleta nduwilu monga du, so cilavywa cakwe co wusutye, so kumunozeza wilamule. Ho ciwe cilavywa cinulwe hali Muwaha Mulungu so mukohani. Kanyhi kosuma kuleta kilo monga du yo wusaje wono muhanzahanzwe ne mafuta, so cilavywa co wusaje, kanyhi yalete ne mafuta cikombe cimonga.

²² Kanyhi munhu yuyo yalete na nghunda nyejete, hamba nziwa nyejete. Yimonga yiwe so cilavywa co wubi, ne nzagwe nayo yiwe so cilavywa cinyanywe.

²³ Nayo yavilete kuli mukohani ha mulango we Lihema, mwi'zuwa lyo munana lyo wezwe wakwe.

²⁴ Nayo mukohani koyibocela yiyo ngholo ye cilavywa co wusutye, hamonga ne mafuta, yavinule, ho viwe cilavywa cinulwe hali Muwaha Mulungu.

²⁵ Nayo mukohani yayiwulaje ngholo yiyo, yasole sakami yayo, yayibace mo munhu yuyo mu cisonje ce likutu lyo kulume, yamubace na mwi'dole kululu lyo muwoko wo kulume, na mwi'dole kululu lyo mugulu wo kulume.

²⁶ Hanyuma mukohani yasole mafuta madodo, yagajidile mwiganza lyakwe lyo muwoko wo kucekulu,

²⁷ hanyuma yazabice cidole cakwe co muwoko wo kulume. Yagamize mafuta gago kali mupunghati, mucanyha hali Muwaha Mulungu.

²⁸ Nayo mukohani, yasole mafuta ganji, yagabace mo munhu. Yamubace mu mulya du mono yamubacile sakami, nha cinji, yamubace mu cisonje ce likutu lyo kulume, na mwi'dole kululu lyo muwoko wo kulume, na mwi'dole kululu lyo mugulu wo kulume.

²⁹ Ne mafuta gono gowa gakali gasigaye mwi'ganza lyakwe lyo muwoko wo kucekulu, yagajidile mu mutwe wo munhu yuyo. Na mu nzila yiyi, mukohani kowa yanoza wilamule kuli munhu yuyo.

³⁰ Na hanyuma yayo, mukohani yayilavye nghunda monga hamba nziwa monga ya muli zi zilya,

³¹ ho yiwe cilavywa co wubi, ne nzagwe nayo yiwe cilavywa cinyanywe, hamonga ne cilavywa co wusaje. Na mu nzila yiyi, mukohani kowa yanoza wilamule kuli munhu yuyo.

³² Na lili lyo lilajilizo lya kuli munhu mono yena wutamwa wo wukoma, ninga kuli munhu mono si yakusuma kulavya vilavywa vyono vikusakwa so wezwe wakwe.

Mumvulya wa mu zikaya

³³ Muwaha Mulungu yakawalonjela Musa na Haluni yakatya,

³⁴ Aga go malajilizo gono ganojeye gakamiswe kuli zo mumvulya wa mu zikaya, wono wutandalaga. (Na aga gali go malajilizo gono wanhu wa Isilayeli wali wanojeye wagakamise, lono wali wakondya kwinjila mu yisi ya Kanani, yono Muwaha Mulungu yawapela wayihale yiwe yawo).

³⁵ Hono munhu yunji yawone vyono Muwaha Mulungu yaleta wutamwa wo mumvulya mu kaya yakwe, ale munhu yuyo, yimunojeye yabite yakamumanyize mukohani nghani yiyo lwa kamonga.

³⁶ Nayo mukohani yalajilize vyono vinhu vyose vya mu kaya yiyo, viwuswe lwa kamonga, lono mwene yakali si nabita ho yakawulanje wuwo mumvulya. Na hono vinhu vilece kuwuswa mu kaya, hodu vinhu vyose vyokwanzwa vyono vyawa iwifyo.

³⁷ Ale nayo mukohani yabite ku kaya yiyo, yakawulanje wuwo mumvulya. Na hono gawe mogali mabandagu mu majinji, ge liwala lye dedede, hamba go wudunghudunghu, gono geza kuhimba na mu majinji,

³⁸ ale, munya kaya yahame mu kaya yiyo, nayo mukohani yayilanjilile vilo mupunghati.

³⁹ Na mwi'zuwa lyo mupunghati, mukohani yabite yakayilanje kanyhi kaya yiyo. Na hono yawone vyono mumvulya wakondya kutandala.

⁴⁰ Hodu mukohani yalajilize mabwe gose gono gakondya kwibatwa no mumvulya, gakumulwe, gatagwe i hanhu havufywe, kunze ye likaya.

⁴¹ Na hanyuma ya zizo yinojeye majinji gose ga mugati, gakung'unhwe wuhiliwe wayo. Ne malongo gayo, gatagwe i hanhu havufywe kunze ye likaya.

⁴² Hanyuma gasolwe mabwe ganji maswanu, gagomolezwe hanhu hono gawusigwe mayawo. Hanyuma majinji ge kaya ho gahiliwe wupya kanyhi.

⁴³ Na hono mumvulya wuwuyajile kanyhi mu kaya yiyo lono mabwe go mumvulya gakondya kuwuswa, sunga ne kaya yakondya kukumulwa wuhiliwe wayo, no kuhiliwa wupya kanyhi,

⁴⁴ ale mukohani yabite yakayilanje kaya yiyo kanyhi. Na hono yayagane mumvulya wutandaye kanyhi, hodu kaya yiyo yawa iwifyo.

⁴⁵ Ne kaya yiyo yikumulangwe yose i mabwe gayo, hamonga ne mabici gayo, sunga ne malongo go wuhiliwe wayo wose, gakunghwe gabite gakatagwe i hanhu havufywe kunze ye likaya.

⁴⁶ No munhu wo wose hono yejelele yenjile mu kaya yiyo lono yikali ndinde milango, hodu munhu yuyo kowa yeyavufya, sunga lizuwa kono lyoswela.

⁴⁷ No munhu wo wose mono kotambalala hasi mu kaya yiyo, hamba mono kolila zindigwa mu kaya yiyo, munhu yuyo yanojeye yakanze myenda yakwe.

⁴⁸ Na hono mukohani yaze yayilanje kaya yiyo, nayo yawone vyono mumvulya si wuwuyajiye kanyhi yaye, hodu mukohani yayanze kaya yiyo vyono yakondya kwezwa. Hambi mumvulya nha wakondya kuwucila lukulu.

⁴⁹ Nayo mukohani lono yeza kuhila kuyeza kaya yiyo, yasole ndeje nyejete, ne cibici co mubici wo muhagata, no mulejehe mudunghu musisili, hamonga na ezobu.

⁵⁰ Nayo mukohani yayiwulajile ndeje monga, mucanyha ye ciya ce lilongo mucanyha ye malenga momi.

⁵¹ Hanyuma mukohani yasole ci cilya cibici co mubici wo muhagata, na ezobu, na wuwulya mulejehe musisili mudunghu, hamonga na yiyilya ndeje yono yikali nyumi, yavizabice vyose hamonga mu sakami ye ndeje yi yilya yono yayiwulaje, kanyhi na mu malenga momi. Nayo yayimizize kaya yiyo kali mupunghati.

⁵² Na mu nzila yiyo kowa yakondya kuyeza kaya yiyo ne sakami ye ndeje, ne malenga momi ne ndeje nyumi, ne cibici co mubici wo muhagata, na ezobu, hamonga no mulejehe musisili mudunghu.

⁵³ Hanyuma hodu yayilecele ndeje yi yilya i nyumi, yiguluce yibite kono yikusaka yeneco kunze ye likaya mu mawimbi. Na mu nzila yiyi kowa yanoza wilamule we kaya yiyo. Nayo yowa yakondya kwezwa.

⁵⁴ Na wuwu wo wulajilize wa kuli matamwa go wukoma.

⁵⁵ Nha vyono genha, malonda, mapu, hamba wukulutu,

⁵⁶ hamba muli mumvulya wono wuli mu myenda hamba mu zikaya.

⁵⁷ No wulajilize wuwu, wunojeye wukamiswe no kwitumamilwa, kuli cinhu cocose ce liwifyo na kuli cono si ce liwifyo.