Walawi 13 - Luganuzi Luswanu Kuli Wanhu Wose 2002

Malajilizo ku so wutamwa wo wukoma

¹ Muwaha Mulungu yakawapela malajilizo gaga Musa na Haluni, yakawatya,

² Hono lunji munhu wo wose yawe yena wupele hamba wukulutu, hamba wulalawuce, vyono vyosuma kuwa nha wutamwa wo wukoma. Munhu yuyo yanojeye yategulwe kuli Haluni mukohani.

³ Nayo mukohani yalilanje livimbe lilyo. Na hono yijele zimvwili zono zili he 'vimbe, zagaluka zawa nzelu, ne futa ye livimbe likwijela yikombo mu nghuli yakwe, ale wuwo weza wutamwa wo wukoma. Holeka mukohani komwanza munhu yuyo vyono mwavufywe.

⁴ Ninga hono livimbe liwe yizelu, kanyhi likwijela lisina yikombo mu nghuli, sunga ne zimvwili zayo ziwe si zizelupe, ale, mukohani komukoma munhu yuyo vilo mupunghati.

⁵ Ninga hanyuma mukohani ho yamulanje kanyhi mwi'zuwa lyo mupunghati, na hono yawone vyono livimbe likali lili nhavivilya du hamba si lipituce liwala, hamba si lyonjelezece yaye, hodu mukohani komukoma kanyhi vilo mupunghati.

⁶ Nayo mukohani yamulanje kanyhi mwi'zuwa lyo mupunghati. Na hono yawone livimbe likucepuka hamba si lyonjelezece yaye, hodu mukohani komwanza munhu yuyo vyono si mwavufywe yaye, langa lyali yivimbe du. Nayo munhu yuyo yayikanze myenda yakwe no kwiyeza.

⁷ Langa livimbe hono liwe likujendelela kuvimba kanyhi, lono mukohani yali yakondya kumulanga munhu yuyo, no kwanzwa zo wezwe wakwe, ale munhu yuyo yowa yimunojeye yelajile kanyhi kuli mukohani.

⁸ Nayo mukohani yamulanje kanyhi, na hono mukohani yawone vyono livimbe likonjelezeka, hodu komwanza munhu yuyo vyono mwavufywe, yawa nhamwa yo wukoma.

⁹ Na hono munhu wo wose yawe yena wutamwa wo wukoma, yimunojeye munhu yuyo yaletwe kuli mukohani,

¹⁰ ho yalangwe. Na hono hawe holili yivimbe yizelu mu nghuli yakwe munhu yuyo, lyono lina mvwili nzelu hamonga no wufila,

¹¹ ale lilyo lyakondya kuwa wutamwa wo wukoma. Nayo mukohani komwanza munhu yuyo vyono mwavufywe. Hamba howa hasina kanyhi soko yo kukomwa ne wayagwe. Hambi nha yaweza mwavufywe cagalanze.

¹² Na hono wutamwa wuwe wakondya kumutandala munhu mu muwili wose ku wulawilila ku migulu sunga ko ku mutwe,

¹³ ale, mukohani yamulanje kanyhi. Na hono mukohani yawone vyono, mbeka wutamwa wutandeye mu muwili wose, hodu komwanza munhu yuyo vyono yakondya kwezwa. Vyono hono nghuli yose yo munhu yuyo yiwe yawa nzelu swee, hodu yakondya kwezwa.

¹⁴ Ninga hono livimbe likopozoce, hodu munhu yuyo kowa mwavufywe.

¹⁵ Nayo mukohani komulanga kanyhi, na hono yawone livimbe likopozoce, hodu yamwanze vyono mwavufywe. Hambi wukopozoce nha wukulajila vyono awo weza wutamwa wo wukoma, sunga no munhu yuyo yawa mwavufywe.

¹⁶ Ninga hono livimbe linoje no kupituka kuwa kanyhi yizelu, hodu munhu yuyo yanojeye yabite kanyhi kuli mukohani,

¹⁷ ho yamulanje kanyhi. Na hono mukohani yawone vyono livimbe lyapituka lyawa yizelu, hodu mukohani komwanza munhu yuyo vyono yakondya kwezwa.

¹⁸ Na hono munhu yawe yali yena yipu, lyono ninga alu lyakondya kunoga,

¹⁹ ninga kanyhi ho yejele yatuga wuvimbe wuzelu, hamba vipelepele vyono vihanjile wuzelu no wudunghu, ale munhu yuyo, yanojeye yabite kuli mukohani.

²⁰ Nayo mukohani yamulanje, na hono mukohani yawone vyono lyahimba yikombo, sunga ne zimvwili zayo zawa nzelu, hodu mukohani yamwanzaje munhu yuyo vyono mwavufywe. Hambi nha lyaweza wutamwa wo wukoma wono wukwamuliziza mwi'pu.

²¹ Ninga hono mukohani yalilanje yawone vyono zimvwili si zinawa nzelu, kanyhi liwe si lihimbile yikombo, ninga lyakondya kwanza kutukuwala, hodu mukohani yamukomaje munhu yuyo mu wayagwe vilo mupunghati.

²² Ninga hono vipelepele viwe vikujendelela kutandala, hodu mukohani yamwanzaje munhu yuyo vyono mwavufywe, hambi nha yakondya kwibatwa ne nhamwa.

²³ Ninga hono liwe si lipituce liwala, hamba si litandaye yaye, langa lisigaye yikovu du baho he 'pu, ale mukohani yamwanze munhu yuyo vyono yakondya kwezwa.

²⁴ Na kuli munhu mono yapiye moto, cilonda co moto, hono ciswelulile, hamba lunji ciwe no wuswelulile wo wudunghudunghu,

²⁵ ale, mukohani yamulanje munhu yuyo. Na hono yijele zimvwili za mu cilonda zisweluliye, na liwe lyahimba yikombo, ale wuwo waweza wutamwa wo wukoma wono wamulizize mu cilonda, so wupye wo moto wono wumunyanyile. Holeka mukohani yamwanzaje munhu yuyo vyono mwavufywe.

²⁶ Ninga zimvwili zayo, hono ziwe si zisweluliye yaye, kanyhi hamba si lihimbile yikombo, ninga lyakondya kwanza kutukuwala, ale mukohani yamukomaje munhu yuyo mu wayagwe vilo mupunghati.

²⁷ Ninga mukohani yamulanje kanyhi mwizuwa lyo mupunghati. Na hono lijele lilonda likujendelela konjelezeka, ale wuwo weza wutamwa wo wukoma. Holeka mukohani yamwanzaje munhu yuyo vyono mwavufywe.

²⁸ Ninga hono liwe si lipituce yiwala, hamba si litandaye yaye, ninga lyakondya kwanza kutukuwala, ale wutamwa wuwo wowa wutamwa wono si wa wukoma yaye. Holeka mukohani yamwanze munhu yuyo vyono yakondya kwezwa. Hambi nha lisigaye lyo likovu du lyo wupye wo moto.

²⁹ Na hono munhu we cilume hamba we cicekulu, yawe yatuga cilonda mu mutwe wakwe, hamba mu cidevu,

³⁰ ale mukohani yamulanje munhu yuyo cico cilonda cakwe. Na hono cilonda cico cijele cihimbile yikombo, ne zimvwili zayo ziwe zawa zili manjano, kanyhi mugati yayo muwe movili viwembe wembe visisili, ale wuwo waweza wutamwa wo wukoma. No munhu yuyo yanzwe no mukohani vyono mwavufywe.

³¹ Na lono mukohani yawe yamulanga, yawone vyono cilonda si cihimbile yikombo, ninga zimvwili zayo ziwe zikali si zinatukuwala yaye, ale mukohani yamukomaje muli wayagwe vilo mupunghati.

³² Ninga mukohani yamulanje kanyhi mwi'zuwa lyo mupunghati. Na hono yawone vyono lilonda si litandaye yaye, kanyhi lisina zimvwili ze manjano mugati yalyo, kanyhi hamba si lihimbile ng'o,

³³ hodu mukohani yamunyonyole munhu yuyo zimvwili zakwe zose, ninga yazinje du hono holili lilonda. Hanyuma mukohani yamukomaje kanyhi munhu yuyo mu wayagwe vilo mupunghati.

³⁴ Ninga mukohani yamulanje kanyhi kolo vyeza kupuluta vilo mupunghati. Na hono lilonda liwe si litandaye hamba si lihimbile yikombo, hodu mukohani yamwanzaje munhu yuyo vyono yakondya kwezwa. Nayo munhu yuyo yayikanze myenda yakwe, nayo kowa yezwa.

³⁵ Ninga lono yakondya kwanzwa vyono yezwa, na kanyhi lilonda lyakwe ho liwuye ne nyuma no kutandala kanyhi,

³⁶ ale, mukohani yamulanje kanyhi. Na hono yijele vyono lilonda lyakwe lyatandala kanyhi, hodu kowa kusina soko kanyhi yo kuwona hono zimvwili zawa zili manjano, hambi munhu yuyo nha yakondya kwijela cagalanze vyono mwavufywe.

³⁷ Na mu wulanje wo mukohani, hono yawone vyono lilonda si likutandala sunga ne zimvwili zinhitu zakondya kucindika, hodu lilonda lilyo lyakondya kunoga, na mukohani yamwanzaje munhu yuyo vyono yakondya kwezwa.

³⁸ Na hono munhu we cilume hamba we cicekulu, yawe yatuga wulalawuce mu nghuli yakwe,

³⁹ mukohani yamulanje munhu yuyo. Hono yijele vyono wulalawuce wuwo wuli buli yono yihanzize no wuswelulile, ale gago go malila-ga-mbuli gono, galalawuce du mu nghuli, no munhu yuyo yelile.

⁴⁰ Na hono munhu yatuje cipala ku cigosi

⁴¹ hamba muhalu, awo si wavufywe yaye.

⁴² Langa hono cilonda cimwime mu cipala hamba mu muhalu, ale, awo langa weza wutamwa wo wukoma.

⁴³ No mukohani yamulanje munhu yuyo, na hono mukohani yawone cilonda cico cina wuswelulile wo wudunghudunghu,

⁴⁴ hodu mukohani yamwanzaje munhu yuyo vyono mwavufywe, ku soko yo wutamwa wo wukoma wono yena nawo mu mutwe wakwe.

⁴⁵ No munhu mono yena wutamwa wo wukoma, yimunojeye yavwale myenda yono yidemukanjice, kanyhi yalece kuswamula ne zimvwili zakwe, kanyhi yagubicize no mwenda mulomo wakwe wa kucanyha, yawe kuzoza yakutya, “Ane nili mwavufywe! Ane nili mwavufywe!”

⁴⁶ Nayo kojendelela kuwa mwavufywe mu vilo vyakwe vyose vyono yakali mutamwa. Kanyhi yimunojeye munhu yuyo, yekale kunze ye nghambi kutali ne wayagwe.

Wulajilize kuli zo mumvulya

⁴⁷ Hono hawe howuli mwenda wawe watuga mumvulya, hono wuwe mwenda wa bafuta hamba mwenda wa wuhamba,

⁴⁸ hamba yiwe mu mwenda we 'wala lyo lyose, lunji mu mwenda we bafuta, lunji wo wuhamba, hamba mwenda we nguwo, hamba muli cinhu co cose cono cinozwe na nguwo.

⁴⁹ Hono mumvulya wuwo wuwe we 'wala lye dedede, hamba lidunghu, awo weza wutamwa wo wukoma. Holeka yowa yinojeye wulajilwe kuli mukohani.

⁵⁰ Nayo mukohani kowulanga mwenda wuwo, nayo yawusole yawuwice kutali muno ne wanhu, wikale kuko vilo mupunghati.

⁵¹ Nayo mukohani yawulanje kanyhi mwi'zuwa lyo mupunghati, na hono yawone vyono mumvulya wujendeleye kutandala, hodu mwenda wuwo waweza iwifyo.

⁵² Mukohani yawusolaje yawutakamize mu moto, vyono weza mumvulya wono wukutandala, wono wunojeye wutakamizwe mu moto.

⁵³ Ninga mukohani lono yakucilanga cinhu cico, ho yawone vyono mumvulya si wutandaye mu cinhu cico,

⁵⁴ hodu yalajilize cinhu cico cikwemwe ne malenga, yaciwice kutali ye wanhu vilo mupunghati kanyhi.

⁵⁵ Hanyuma ho yacilanje kanyhi, na hono yawone vyono mumvulya wu wulya wukali hamba si napituka liwala, hamba wuwe si wutandaye mu cinhu cico, ninga cinhu cico cowa cikali cili iwifyo du. Nanye munojeye mucitakamize mu moto, hamba cinhu cico ciwe cakondya kuwola mugati yayo, hamba munze yayo.

⁵⁶ Ninga mukohani lono yakucilanga kanyhi, yagane mumvulya hono ho wuli wakondya kunyala, hodu mukohani yahademulaje baho hono hali ho wuli, mu mwenda hamba mu nguwo.

⁵⁷ Na hono mumvulya wuwo wijele kanyhi, no kutandala, ale, munya cinhu cico yacitakamizaje mu moto.

⁵⁸ Na hono yacikweme mu malenga sunga libanhi lyajilile, ale, yowa yimunojeye yawuyajile kucikwema kanyhi lwe kejete, ne cinhu cico, cowa cakondya kwezwa.

⁵⁹ Nawo wu wuno wo wulajilize wa kuli zo mumvulya wono wuli mu mwenda. Hamba wuwe mu mwenda wo wuhamba, hamba mu mwenda we bafuta, hamba wuwe mu cinhu co cose cono cinozwe na nyhingo. Nawo awu wo wulamuzi wono wunojeye wukamiswe kuli vyose vye liwifyo, na kuli vyono si vye liwifyo.